انا نزلت التحرير النهاردة ..

[silverlite]

الان ..لحظه الحقيقه !! ولا بديل امام العسكر الا التحرك سريعا لاحتواء الموقف ...قبل ان يجد الملايين يحتلون ميادين مصر....البرادعى طوق نجاه !! و لا يقبل ان يكون عصام شرف الثانى - هذا مؤكد - ! و لذلك فهو الاختيار الامثل و ربما الوحيد لانقاذ البلاد من مصير مظلم ...نسيت اوجه الشكر للاخ الدكتور صاحب الموضوع...وهو نموذج متكرر - والحمد لله - للانسان للمصرى ..شكرا و عرفانا لكل من فى التحرير الان..

[dr.wael7yran]

المشاركة الأصلية كتبت بواسطة jojojojojo مع احترامي لك يادكتور ومع احترامي لجميع شباب التحرير وتعاطفي مع المصابين وربنا يصبر اهل الشهداء بس انا شايف ان برضه التظاهر السلمي مش كده ديه فوضي وهمجيه وتنتهي بينا الي عراق جديد لاقدرالله وان لازم احترام الامن وليس مهاجمته ومهاجمه اقسام الشرطه ومديريه الامن واللي هيدفع التمن في الاخر انا وانت واختك وامي واختي وولادك استحاله يكون هوه ده التظاهر انا كرهت الثوره بسبب الهمجيه وعدم الاحترام احنا بامانه همجيين ولا نعرف عن الديمقراطيه اي شيء وان اللي بيعمله الامن ده اقل حاجه ممكن تعمل جي تهاجمني في بيتي عايزني اطبط عليك ده حتي مش عايزين يتظاهروا في الميدان بس لا بيهجموا مديريات الامن انت حضرتك مشفتش تعامل الامن في ويل ستريت مع المتظاهرين ولا تعامل الامن في بريطانيا علي خلفيه مشاكل عنصريه واليونان عشان الازمه الاقتصاديه وحتي لو احنا عندنا حق ميجيش كده ولو هيجي كده بامر بلطجه وصياعه احنا مش عايزينه للاسف هنضيع بلدنا عشان مصالحنا الشخصيه وبنقتل النفس التي حرمها الله الا بالحق بايدينا ياجماعه لحد الوقتي 24 قتيل و125 مصاب ولسه هتزيد والشباب ماشيه ورا عصابات والله اذ كان سلفين او اخوان او ليبرالي او عملاء والبلد في حاله فوضي زي ايام 25 يناير احنا بنتاخر بالله عليكم اهدوا وارجعوا بيوتكم احنا بنضيع يا جماعه وهتوصلنا احنا الشعب اللي ملناش لا في السياسه ولا في الاحزاب ولا في المظاهرات واحنا الغلبيه ان احنا نكره الثوره 25 اللي خلصتنا من الظلم فياريت ادوا فرصه ان البلد تقوم والانتخابات تتم عشان علي الاقل نلحق تونس ونوصل للطريق الصحيح علي الفكره الحاله اللي احنا فيها ديه سببها برضه حكومه ضعيفه جدا ومجلس عسكري واحنا برضه يارب احفظ مصر وبارك لها واهدي اهلها واهدينا الي طريق الصواب

1375 مصاب حاولوا اختراق الداخلية
كتيبة كاملة قررت تهاجم وزارة الداخلية ... صح ؟؟؟

يا استاذ جوجو في اوامر صريحة باخلاء الميدان .. و كلام الهجوم على الداخلية و القناصة اللي يا عيني بينشنوا على افراد الشرطة ده مشفتهوش الا على القناة الاولى و بس ..
في ناس شايفة انه هيبتها و كراسيها اهم من شباب مصر و شباب الامن المركزي الغلابة و الضباط و الوقيعة اللي بتحصل بين الجيش و الناس ..

و الناس دي لازم تتخلع و تكون عبرة لكل بني ادم ممكن يستحل دم اي شاب مصري ..

الناس دي لو كانت نضيفة و خايفة على مصلحة البلد - زي عصام شرف كده - كانت تتنحى في حالة فشلها في مهمتها اللي هي حماية الشباب المصري موش قتله و فقع عينيه

و لا مليون مشير و لا مليون حسني مبارك = دم شاب مصري واحد مات او خسر عينيه او ايديه او رجليه علشان وقف و قال لأ .. سواء هو صح او هو غلط من حقه يقول لأ زي ما هو عايز ..

و من الاخر .. مفيش حاجة صح اتعملت في الثورة دي الا بوقفة الناس في الميدان ..
خلع مبارك ..
خلع احمد شفيق ..
الاستفتاء ..
محاكمة قتلة الثوار ..
محاكمة الفلول ..
محاكمة مبارك ..
خلع حكومة شرف ..
قانون الغدر ..
و قريبا اذا استمر الغباء.. خلع المجلس ذات نفسه ..

[dr.wael7yran]

خبر جميل جدا ..
اصر الدكتور حسين خيري " العميد المنتخب لكلية طب القصر العيني " ..
على نزول الاساتذة و الاساتذة المساعدين لاستقبال مصابين الثورة ..
و مفيش استاذ روح قبل الساعة الخامسة صباحا ..
و دي معجزة يا اخوانا ..
يعني مفيش نايب صغير مد ايده في علاج اي مصاب للثورة .. و الناس اللي راحت القصر العيني اتعالجت على ايدين امهر جراحين في مصر ..
هو ده الكلام

[Neo206]

يا رب أصلح حال بلادى
و ولى أمورنا من يصلح حال البلاد و العباد

[MmFFoR]

المشاركة الأصلية كتبت بواسطة dr.wael7yran السلام عليكم .. رغم عدم اهتمامي بالسياسة و عدم المامي بكل الظروف اللي ادت الي اللي بيحصل في التحرير دلوقتي .. انما انا نزلت بناء على نداء نشره هنا احد الاعضاء المحترمين في احد المواضيع انه المستشفى الميداني في حاجة ماسة للاطباء و التبرعات الطبية .. و كطبيب و بدون اي صفة اخرى توجهت الى المستشفى الميداني .. و هناك الحمد لله لقيت ناس كتير من زمايلي لبوا النداء .. و اطباء جراحين و اطباء طوارئ و على كافة الاعمار و المستويات .. و كلهم ما شاء الله خبرة( احسن مني على الاقل انا طبيب اطفال) و منظمين و مسيطرين على الوضع .. و كانسان انا هالني الوضع يا جماعة .. اكتر من 500 مصاب في المستشفى صباحا نتيجة لمواجهات الامس .. شباب زي الورد .. مخنوق و مضروب و متكسر و معظمهم - ان لم يكن كلهم - حاصلين على مؤهلات عليا او لسه طلبة .. ولاد ناس يعني موش بلطجية و لا قلة مندسة و لا اجندات خارجية ... ناس شافت القمع و الضرب من جندي متخلف واخد اوامر من ظابط متخلف زيه واخدين اوامر من قيادة متخلفة تماما.. ناس لسه فاكرة انه احنا هنفضل بقر .. هيضربونا بالكرابيج فهنمشي و هنسيب حقنا .. انا اكرر انا موش عارف الناس نزلت ليه .. و هل صح نزولهم و لا لأ انا موش شايف الصورة على بعضها .. بس اي كان سبب نزول الناس ..فلا يوجد مبرر واحد للتعامل بكل هذا العنف مع الشعب المصري .. انا موش عاجبني حال البلد .. انا من حقي اني اعترض لاني انا حر .. انما انت موش حقك انك تموتني او تضيعلي عيني او ايدي او رجلي علشان انا عليك .. انت لا ربنا و لا الرسول - حاشا لله- علشان اموت لما اقولك لأ.. مطلوب استقالة المتخلف عن الوصول لهذه الحالة و الناس لازم تتعلم انه الرد يبقى بالعقل موش بالمدرعة و الخرطوش و الغاز المسيل للدموع .. لو المجلس السمكري فضل يتعامل بنفس اسلوب النظام القديم هتبقى مجزرة و الدنيا هتخرب .. سامحوني لانفعالي بس فعلا منظر الشباب و هو عمال يتطحن حاجة تحزن و تغلي الدم يغلي لاي بني ادم .. انا اضطريت للرجوع لأني اطلبت في المستشفى عندي و دول عيانين برده و ليهم عليا حقوق بس هاخلص و ارجع فورا للميدان .. رغم عدم معرفتي ايه اللي خلى الامور توصل لكده .. و الله الموفق

انا عايز اخد شهادتك دي و احطها في عين بعض الناس اللي ربنا عماها و خلاها متشوفش برغم انهم منضربوش بخرطوش او رصاص مطاطي في عينيهم

ربنا يرحمنا من المأجورين و المرتزقة و من عاونهم من المتخاذلين و الرعاع