في رأيك هل يمكن إصلاح جهاز الشرطة بقيادته الحالية

[khaled al sharif]

المشاركة الأصلية كتبت بواسطة cheetosmini فى شخصيات لو الشرطة متعملتش معاهم كدة هيركبوهم زى المدرس بالظبط فى المدرسة لازم العيال تحترمة ولو محترمتوش تخاف منة والا.....

أنا بعترض وبشدة علي الرأي ده .... وهوده إللي كان مدخلهم لإزلال الشعب ... كل إللي مش عاجبهم ومخالف للنظام يبقي إرهابي أو يتلفقه تهمه .... كان خالد سعيد مجرم ولا إرهابي ... كان سيد بلال مجرم ولا إرهابي .... كان شهداء الثورة مجرمين ولا إرهابيين ....يا سيدي رجال الشرطة وتجار المخدرات حبايب .. ومش عايز أقولك وفيه تعاون بينهم كمان إنهم يعملوا مرشدين ليهم ضد معارضي النظام مقابل التغاضي عن إجرامهم ..... وبعدين الدول المتحضره بتعرف إزاي تطبق القانون بدون تنكيل وتعذيب .....لا يمكن تبرير وحشية ومهانة إسلوب هذا الجهاز الفاشل تحت أي مسمي

[khaled al sharif]

المشاركة الأصلية كتبت بواسطة lol64 انا رايى الشخصى ان طبعا فيه ناس اشراف فى الشرطه وانا اعرفهم ياجماعه اى مهنه سواء دكتور مهندس ضابط جيش او شرطه فيها الصالح والطالح فيه مثلا بعض الدكاتره البشريين بيتعاملوا مع الناس من مناخيرهم وبقرف وطبعا كلنا واخدين بالنا من الناس دى انا بس بدى مثال وعموما كل اناء ينضح بما فيه لو الضابط جاى من بيئه صالحه وتربيته كويسه هايكون كويس وانسان وبيخاف ربنا فى كل خطوه ولو العكس هايكون العكس المشكله اللى انا حاسس بيها ان الشرطه حاليا وبعد الثوره بقوا زى القطط والناس كلها اتجرات عليها بالحق او بالباطل ياجماعه لازم يكون ليها هيبه والا البلطجيه هى اللى هاتحكم مصر وهانكون زى جنوب افريقيا من بعد المغرب لاتامن على حياتك فى الشارع

إزيك يالول ... وحشني ياراجل حارمني ليه من مداخلاتك الذكية .....
بص أنا مش معاك
إنت خلطت ما بين المهنه والسلطة ....الشرطة بتمثل السلطة وأداه لتطبيق القانون أم المحاسب والطبيب والمهندس مش مطلوب منهم إجبار الأخرين علي إتباع قانون ودستور البلد والحفاظ علي الأمن العام وحماية المجتمع من البلطجية والمجرمين
فلازم أفراد الشرطه يتميزو بصفات ذي الجرأة والعدل والأمانه بالإضافة للتدريب البدني والمهاري للسيطرة علي المجرم وإخضاعه وده مفهوم طبعا ....لكن مش طول النهار الظابط واقف في الشارع ولا قاعد في القسم ولا في الجوازات ولا في إدارات المرور ولا في أمن البنوك والمصالح بيتعامل مع مجرمين .. التعامل الأكثر مع القاعدة العريضة الشريفة في المجتمع والإستثناء هو التعامل مع المجرمين ..... ولا يبرر لهم الإستثناء تعميم قاعدة التعامل مع البلطجية والحرامية معاملة الشعب زي البلطجية والحرامية
هيبة رجل الشرطة مقترنه بقدرته علي رد الحقوق وحماية الضعيف وحفظ المظالم وتحقيق أمن المواطن مع حسن معاملة الناس .... السلاح إللي شايله ضابط الشرطه في جنبه عشان كده مش عشان الكبر والمنظرة وقهر المظلومين وحماية الحكام

[khaled al sharif]

المشاركة الأصلية كتبت بواسطة hazem_khidr فعلا فيه فئه معينه من الشعب ما ينفعش معاها الحنيه و الذوق و كله شاف بعنيه لما حد من اللجان الشعبيه كانت بتمسك حرامي كان بيتوسل اليهم يسلموه لضابط الجيش قبل مكا يخلصوا علي حياته يعني برضه الشعب بيتعمال مع المجرم بنفس اسلوب الشرطه و العن كمان انا من رأيي مافيش اي زيادات في مرتباتهم و تشديد الرقابه عليهم علشان بعد كده اللي يدخل شرطه يعرف انها تكليف مش تشريف و يحافظ علي ادبه كويس وبعدين مربتات الشرطه مش وحه ولا حاجه دا بيجي لهم و فيه منهم اللي بيقبض فوق ال 2000 جنيه و 3000 جنيه و هو لسه ما كملش 25 سنه!!!!

بصراحة يا حازم كلامك مظبوط .... مشكلة جهاز الشرطة مش مشكلة مادية ... مشكلة أخلاقية ... ومفاهيم .... قهرية تأسس عليها هذا الجهاز لابد من هدمها وإعادة بناء العقلية والشخصية لرجل شرطة محترم ...يفهم إن وظيفته تكليف مش عنطظه ...والوظيفة الأول ليها حماية دماء وأعراض وأموال الشعب ... مش الحكام والحرامية
التغيير يبدأ من المبادي والمفاهيم إللي إتربي عليها الجيل الحالي من لواءات وضباط وأمناء الشرطه ...إن الشعب مش هو عدوه

مشكلة جهاز الشرطة مش مادية بقدر ماهي أخلاقية أتفق معك في ذلك

[khaled al sharif]

(فى إعتقادى أن الثوره أعطتنا دفعه روحيه ومعنويه قويه نستطيع بها أن نغير المفاهيم مره أخرى مع الوقت .
فى أعتقادى أن هذه المفاهيم ستتغير لو الحكومه القادمه أحسسنا معها بالعدل والامان على ارزاقنا ومستقبلنا ومستقبل أبناءنا .)

الله ينور عليك يا دكتور كمال ...لازم نكمل ثورة التغيير
دي فرصة مش ها تتكرر ...ومننتظرش الحكومة هي إللي تغير لازم إحنا الشعب والثورة نتابع أداء ومعطيات التغيير ده وإلا الثورة في حالة إنعقاد دائم حتي إنجاز مهمة تطهير البلد من القتلة والمفسدين واللصوص

[momen_bondok]

انا شايف انة لا بد من صلاح الشعب الأول ثم سياتى لا محالة صلاح الشرطة
يعنى لازم الشعب يفوق من الغيبوبة اللى هو فيها لا يعطى رشوى مهما كان الأمر
واذا شاف اى تقصير لابد من إبلاغ اجهات المختصة علشان تعاقب من اخطاء
بارك الله فيك