الاذاعة الشعبية الموحدة لقائدى السيارات على الطريق 89.4 FM

[ramy safwt]

المشاركة الأصلية كتبت بواسطة محمد شهاب معلش سؤال بسيط بعد اذن حضراتكم انا سالت فى اكتر من محل عن اف ام ترانسميتر وكانت الاجابة اما ماعرفوش او مش موجود اللى هية برضه ماعرفوش بس مهذبة وفيه محل قال لى اسال عن مايك اف ام هوة ده اللى انت عاوزه السؤال هل الكلام ده مظبوط طيب المايك ده حجمه هايكون كبير واكيد هايعمل لخمة للى بيسوق انا متخيل ان اف ام ترانسميتر حجمه صغير ممكن يتثبت فى ياقة القميص مثلا زى سماعة الموبايل ياترى فيه احجام مختلفة مثلا وبالنسبة لمدى الارسال هل فيه مدى اكبر من 500 متر حتى لو اغلى شوية مع خالص الشكر لصاحب الموضوع ووالشكر موصول لكل اللى هايتعب نفسه ويرد عليا تحياتى للجميع

احيانا بيكون اسمه مايك اف ام و ده مش معناه ابدا انه يكون بحجم المايك اللى انت متخيله بيكون كله عقلتين صباع

عشان يجيب اكتر من 500 متر بتحتاج تضيف عليه low noise amp و شوية تجهيزات ليه ب 5 جنيه كلهم على بعض

ميزة المايك فى الشاسيه بتاعه انه بيلقط من محيط 10 متر و انت لو حطيته فى اى ركنة فى العربية هيلقط منك عادى فمتقلقش منه

المشاركة الأصلية كتبت بواسطة AbOnOrA من ابونورا لعبقرينو مصر موتورز الحادى عشر حول مينفعش ترمى الفكرة وتسيبها لازم تدينا نموذج عملى سهل التطبيق فمثلاً لو افترضنا ان الحكومة مش هتقبض علينا وتقفلنا الموقع على اعتبار اننا معندناش ترخيص او اى تلكيكه من اياهم فاحنا محتاجين على قد فهمى FM Walkie Talkies مش ترانسميتر فقط او على الاقل ترانسميتر يكون فيه line in ويركبله مايك او الحل العملى المتبع فى عربيات الشرطة والاستخدمات اللى زيها وبيكون حاجة زى كدة بس معرفش سعره ممكن يوصل لكام ومدى توفره فى مصر وصححلى طبعاً over

المشكلة ان الموضوع بيترمى و محدش بيهتم بيه بعد كده غير اما يظهر بعد كام شهر حد يرجع يهتم دية مشكلتى مع المنتديات عموما مش هنا بس و ده خلى دخولى قليل و فى اوقات الفراغ اللى بيكون الترافك ليها قليل بأستثناء انهارده قولت اغتال ساعتين فى دوشة الشغل واليوم المتلج ده

مثلا موضوع المعادن مات

موضوع زى الارهاب و العربيات اللى ممكن تكون مفخخة و ازاى نتصرف مات مع ان اللى حصل بعد كده كان محتاج لده و كان ممكن ينقذ ناس كتير

مواضيع التعديلات اغلبها بح موضوع الايرو دينامك محدش يعرفه اساسا


المهم نرجع لموضوع هنا فكرة الموبايل اعتمادها الكلى على الانترنت و احنا محتاجين حاجه من غير فلوس يصرفها المستخدم كل شوية و اى حد يستخدمها سواقين النقل مثلا فى امريكا كلهم مربوطين بشبكة لاسلكى و ليهم موجة خاصة بيهم عشان يعرفو و يتابعو مع بعض حالة الطرق و يقعدو يرغو عشان ميناموش وهما سايقين فى اساسا ناس بتعمل مواقع تبيع بث النقل و كلامهم بينهم وبين بعض بفلوس و فى مواقع بتعمل بث ابراج مراقبة الطيران للتسلية


قانونا عشان انا سائل فيها طالما انت المدى بتاعك اقل من 1 كيلو انت حر و محدش ليه حاجه عندك لو المدى بتاعك اقل من واحد كيلو لكن قوة الاشارة اعلى من واحد وات دية مشكلة عشان ممكن تدخل اشارتك مكان اشارة موجه اذاعية محجوزة من الدولة


لو الموضوع مهم عند الناس و عندها استعداد تطبقه ممكن ننظم ورش عمل وكل واحد يخرج بالترانسميتر بتاعه فى ايده و نعيش اصلا السيركيت بسيطة و صغيرة و ممكن تتعمل على تيست بورد بتراكات قليلة جدا حتى مش محتاجين نطبعها الا لو هنعمل كمية فنوفر وقت و نطبعها شيت A4 واحد يطلع 20 جهاز

[mody112]

استاذ / ramy safwat اهنيك على الفكرة العبقرية دى واعذرنى لو مكنتش متابع لكل مواضيعك التانية اللى اشرت ليها بالاعلى دلوقتى انا عاوز شوية توضيح لكيفية عمل هذه الفكرة يعنى لما نجيب الف ام ترانسميتر ده هنجيبو منين وهتبقى وظيفته ايه ارسال ولا استقبال يعنى ده هيبقى بدل المايك انا ممكن ارسل منه طب ولو عاوز استقبل من شخص اخر فى محيط ال 500 م هستقبل عن طريق الموجة 89.4والصوت هيطلع عادى من السماعات تمام كده . لو هى الفكرة كده يبقى الاف ام ترانسميتر ده للارسال يعنى هو هيترجم الصوت بتاعنا الى موجة الراديو ويرسلها الى اى شخص فاتح نفس الموجة فى المجال - تما كده ؟ طيب لو جيبنا الاف ام مودليتور ده هيشتغل زى الاف ام ترانسميتر ولا ازاى ؟ معلش انا سالت كتير بس لان الفكرة جامدة وياريت نطبقها كلنا مع بعض وان شاء الله مش هتموت زى الافكار اللى قبلها بس انت تستوفيها شرح وتشوف ايه المطلوب ونتجمع ونعمله .

[ramy safwt]

كلامك كله مظبوط الموديلتور ليه تطبيقات تانية و اغلى احنا بنحكى فى حاجه بتمن ولاعة سجاير

[michohat]

متابع معاك والله المواضيع
وخصوصا موضوع الايرو دينامك شغال فيه بحاول اجيب مغناطيسات للتثبيت قبل ما ابدء علشان اضمنهم الاول

بالنسبة للجهاز مفيش حد قريب مني ممكن اسئله عليه و عندي ف العربية اللي هو الmp3 اللي ع الولاعه فهل يشتغل ولا ده حاجه تانيه