|
#196
19-12-2008, 02:47 AM
|
||||
|
||||
*** مصر التانية داخل الكمباوند ***
نتيجة لظروفي عملي مرتبطة بعملاء في اماكن مختلفة و الشغل في بيوتهم
اتاحلي ذلك اني اخش ما يسمي بالكمباوند ذلك المكان المغطي باسوار عالية مادية و معنوية و انا اتكلم هنا عن الكمباوند اللي هوا فلل و قصور فقط و ليست التماحيك اللي بتعمل سور حوالين اي مجموعة مباني و تسميها كمباوند يعني نستبعد الرحاب و المصراوية و الأشجار و زيزينيا و اكيد طبعا الحاجات الجديدة عند كارفور بالمناسبة زي ما قرينا ان مدينتي هتغير اتجاهتها نحو الفلل اكتر لأنها اكتشفت ان ده اللي عليه اقبال مصر التانية مع فكرة الكمباوند حاليا مش معقول مصر التانية تروح تبني فللها و قصورها زي زمان في المريوطية و المنصورية و انشاص او حتي قري القليوبية و الشرقية و يعدوا في المدقات المكسرة و ما بين اكواخ و عشش الفقراء الحاقدين غير بعد المسافة عن القاهرة العامرة و طبعا الأحياء الراقية راحت عليها مش معقول تنزل تعوم في البسين بتاعك و قدامك برج 12 دور او مواطن بسيط بيتلصص علي خصوصيتك ده غير فكرة الونس انهم يتلموا في حتة حوالينها سور يعزلهم عن مصر بتاعتنا اللي قدمت انا دخلت تلات حتت من مصر التانية القطامية هايتس (ما يسميه المصريين العاديين الجولف في التجمع الخامس ) و الميراج سيتي في التجمع الأول و جاردينيا في اكتوبر و غيرهم كتير مايفير في الشروق و الجولف في العبور ،،، الخ ،، بس دول اقواهم و اكثرهم عمرانا و حياة كفاية نعرف ان القطامية هايتس اتشال من قدامها مساكن الشباب و اتعمل نفق مخصوص يطلع من الدائري عليها و جاردينيا يقطنها احمد نظيف و الميراج سيتي صفوت الشريف و ابنائه في سلسلة قصور بديعة طبعا دول بس اللي بسمع عنهم و احلاهم و اكثرهم جمالا القطامية هايتس مبدئيا بيستقبلك امن في قمة الصرامة و انتا داخل و لا يتنازل انه ياخد اثبات شخصيتك و يتأكد انك فعلآ داخل لحد اول ما تخش يلفت انتباهك ان الجو جميل و متسألنيش ايه السبب تبتدي تلف في الشوارع المخططة بانحناءات و مرتفعات و ميداين صغيرة تكسر الملل و تساعدك علي ان تتأمل اللاند سكيب و الخضرة الجميلة مع وجود بعض لمسات بسيطة من مصر بتاعتنا رصيف لسه مكملش شوية ردش علي جنب لزوم البنا و طبعا تبتدي تتأمل جمال البيوت و الأسوار المكلفة و ابداع كل مالك و ذوقه مع ملاحظة ان سكان مصر التانية اكثر التزام و محافظة علي التناسق عن مصر بتاعتنا طبعا فيه مول صغير و كانتري كلوب مش عارف ليه بيسموه كده و ده اللي تقدر تاخد فيه درينك مع باقي زملائك في مصر التانية و لو بتحب تلعب جولف او تنس و مفيش كور شراب و بنج بونج هتلاحظ حاجة و انتا ماشي في شوارع مصر التانية مبتشوفش حاجة غير واجهات الفلل الفخمة مبتشوفش البحيرات و ملاعب الجولف و الحاجات اللي حكولك عنها في مصر بتاعتنا و ده نتيجة للتخطيط المعماري اللي بيخلي كل الفلل و القصور بتبص من بره علي الشارع و من الداخل علي البحيرات و ملاعب الجولف ايمكن زيادة للخصوصية و اكيد عشان تبقي عايش في جنينتك و قدامك بسينك و مشهد الأفق جميل نخيل و بحيرات و ملاعب جولف و بعد كده عرفت من فرد مبيعات ان الفيلا اللي علي بحيرة مش دايما كويسة عشان رطوبة البحيرة بتبوظ واجهتها بسرعة و طبعا ده ميفرقش معانا احنا سكان مصر بتاعتنا و بما إننا في منتدي سيارات فلازم الاحظ ايه نوعيات العربيات اللي واقفه المفاجأة إن العربيات اللي واقفة عادية جدا و لكن ل زودت التلصص لداخل البيوت الحالمة لازم هتشوف يا مرسيدس يا بي إم و معاهم حاجة فور باي فور ده أساسي و كمان عربية معفنة من بتوعنا تقريبا دي بتاعت الخضار و بعد كده كل واحد و مزاجه ممكن هامر او لاند روفر ممكن حاجة سبور نبتدي بقه نخش جوه واحد من هذه البيوت الحالمة اللي بتتشابه لحد كبير طبعا هيا ميتزدش عن دورين و البدروم و ما اسعدنيش الحظ اشوف الروف عامل ازاي زي ما قلنا قبل كده قبل كده واجهة الفيلا بتبقي علي الشارع و مفيش قدامها جنينة يعني خمسة ستة متر كده منظر في الأول الجراج ابو باب بيفتح بالريموت عشان اخويا احمد اللي بيسأل علي البواب ابو حجر ، عوايد مصر بتاعتنا ،، ينزلك علي البدروم اللي في ناس بتستخدمه برده منطقة العاب خفيفة غير غرف الخدم و غرفة الكهربا عشان مفيش عك زي بتاع مصر بتاعتنا و التكييف اللي مدلل بره و سلك الدش اللي مرمي من السطوح كله مدروس حتي شباكات الكمبيوتر لازم تبقي موجودة و متجهزة من الأساس و كله مدفون في الحيطان و الأسقف و كل الإختراعات اللي سمعتها عن التشطيبات هتلاقيها شبابيك و ابواب دوبل عشان عزل الحرارة و الصوت ، الكهربا حاجات تانية غير المفتاح البيتشينو بتاعنا فيها شاشات و حركات تركن عربيتك و تطلع بالاسانسير الزجاجي الدور الأول ده الرسبشن علي مساحة الفيلا و فيه المطبخ الرئيسي لزوم الحفلات الإن دور و اخر الرسبشن يطلع علي الجنة الغائبة و الدور الثاني فيه الليفنج و غرف النوم و مطبخ صغير برده غرف نوم العيال بتبص علي ناحية الشارع المعفنة او الحدائق الجانبية و ان كان كل اوده ليها حمامها الغرفة الرئيسية صاحبة اكبر تراس علي البحيرات و ملاعب الجولف و البسين و مفيش دولاب طبعا ،، درسينج رووم ملحقة ،، عشان تغير هدومك براحتك و تستوعب لبسك و جزمك يعني الغرفة الرئيسية دي بتعتبر جناح مستقل كامل الليفنج اساسي فيه الهوم ثيتر ، البلازما التسعين بوصة و البلازمات دي بتلاقيها مرمية في كل الأود ملحوظة مفيش اي نوع من تشجيع الصناعة المحلية اهم و احلي حتة اللي بيسموها بره الباك يارد و علي عكس بلاد بره الباك يارد دي هيا الحديقة الرئيسية اللي فيها البسن و البرجولات و النوافير و الشوايات عشان حفلات الباربكيو و بتبص علي مناظر البحيرات و ملاعب الجولف و دي بقه كل واحد بيتفنن ان اللاند سكيب بتاعها يبقي تحفة دي كده خطوط عامة ،، عشان محدش يضحك عليكو لما تنووا ملحوظة كل الكلام ده عن الجيل السابق القديم من الكمباوندات ،، و بقال إن الجيل الجديد بتاع إعمار و دماك حاجة تانية خالص ،، و كمان ناس قالتلي سوان ليك و ليك فيو احلي من كده بكتير اللي يغيظ الحاجات دي مش مائة فيلا مثلا دي الافات ،، و الكمباوندات مبنية علي مساحات مهولة ،، القطامية هايتس دي جزء كبير جدا من التجمع الخامس و شوفوها علي جوجل ايرث و الإقبال فظيع و كل شوية خبراء العقارات يقولوك الإسكان الفاخر هيحصله كساد عشان المعروض اكثر من المطلوب في بلد المفروض إنها فقيرة بس كل مشروع ينزل الإقبال عليه اكتر من اللي قبله و لو لقيت بخصوص القناعة طبعا هيا كنزا لا يفني ،، مثلآ كان مرة معاي واحد من هواة قصور احمد عرابي علي طريق مصر اسماعيلية و قصور مصر اسكندرية ،، كان بحتقر الكمباوندات دي و بيقول عليها علب الكبريت الملزقة في بعضها ،، ههههههه كل واحد و مزاجه مش عارف العمارات الاتناشر دور و البواب ابو حجر و المدخل ابو قصريتين زرع يبقي اسمها ايه ،،، ربنا يديمها نعمة بخصوص الأسعار أقل حاجة التاون هاوس ،، ممكن في مدينتي بتبتدي من تلاتة مليون علي ما اعتقد ،، بس التاون هاوس ده حاجة تعبانة نسبيا تعتبر شقة مائتان و خمسين متر علي دورين و جنينة اربعة متر في ثلاث نواحي و الناحية الرابعة لازقة في فيلا تانية بس في القطامية هايتس و الميراج مفيش كلام قبل خمستاشر مليون علي ما اعتقد و حتي في مدينتي عالجوا اخطاء الرحاب فصلوا مناطق الفلل عن مناطق العمارات تماما ، و عملوا لبتوع الفلل نادي غير بتوع العمارات دول يلعبوا جولف و دول يلعبوا حوكشة منعا لإختلاط الطبقات
__________________
 
|
|
#197
19-12-2008, 11:27 AM
|
|||
|
|||
|
رد: *** مصر التانية داخل الكمباوند ***
نظيف ساب جاردينيا من فتره .... مش مستوى دلوقتي
حتى مينا جاردن سيتي قدمت .... اكتوبر خلاص ... يمكن سيتي فيو و بالم هيلز علشان فيهم ناس من الكبار لكن كله دلوقتي في التجمع.... حتى الشروق مش اد التجمع .... معلش ما انت عندك 5% من البلد مليارديرات (مليونير بقت حاجه صغيره دلوقتي ) 5% من 80 مليون .... يعني 5 مليون ..... يعني اكتر من مليون اسره .... لو كل واحد فيهم مجابش قصر ليه وكام قصر صغير للولاد قبل ما يكبروا والدنيا تغلى عليهم .... يبقى مين حيجيب ونسيت ليه الفور سيزون .... فرست ريزيدانس ... نايل بلازا .... سان ستيفانو .... ولا الجناح ابو 18 مليون ده ميساويش حاجه قدام القصور وملاعب الجولف بس فيه كتير عرب بيشتروا الكلام دا .... مش كلهم مصريين .... امرا و فنانيين وسفرا لبلادهم اللهم لك الحمد والشكر بما انعمت علي ربنا لاتجعل الدنيا اكبر همنا ربنا لاتجعل الدنيا مبلغ علمنا اللهم اني ظلمت نفسي فاغفر لي
|
|
#199
19-12-2008, 08:55 PM
|
||||
|
||||
|
رد: *** مصر التانية داخل الكمباوند ***
الف حمد وشكر ليك يا رب على النعمة اللى احنا فيها
__________________
 ......................... .. يا ترى جاهزين لتجربة السواقة اللى جاية ؟؟؟؟؟!!!!!!!
|
|
#200
23-12-2008, 07:16 PM
|
|||
|
|||
|
الحمله المصريه لمقاطعه شراء السيارات(خـلوهـا تصدى)
شارك معنا فى حمله خلوها تصدى كون ايجابى وعبر عن نفسك
عنوان الموقع http://5alohatsade.blogspot.com الهدف من الحمله نكون كلنا ايد واحد ونساعد على تخفيض الاسعار لان حرم حاله الاحتكار الموجوده فى سوق السيارات فى مصر. للاسف اول مايحصل زياده فى اى حاجه على طول اسعار السيارات تزيد وطعبا التجار فى مصر يحققوا ارباح 100% لكن اول ما يحدث العكس لا يحدث شى التجاره مكسب وخساره لكن عندنا لازم تكون مكسب بس0 لماذا لا نقف ضد الاحتكار والعشوائيه فى اسلوب التسعير؟.....لماذا لا نتحد ونوثر فى سوق السيارات وطبقا لنظريه العرض والطلب واليات السوق والعولمه !!!! نحن الطلب نحن الجانب القوى وفى حاله عدم وجود طلب ..........لاتوجد قيمه للعرض. لماذا عندما يحدث ارتفاع بسيط فى الاسعار العالميه يكون هناك زياده سريعه ورهيبه فى الاسعار؟ وعندما يحدث العكس لا يقبل احد التضحيه ببعض من هامش الربح الذى يصل فى بعض الاحيان الى 100% والمصيبه انهم عاوزين يضربوا الفرق فى جيبهم عموما بالسبه للاخوه اللى الكلام ده مش عجيبهم لا يوجد ضرر لان اى حد بيع رخيص يشترى رخيص (بس المهم لازم كلنا نكون ايد واحده ونؤثر فى الاسعار ده ابسط حق ) حرم كافيه احتكار
|
 |
|
|
