تحذير هام

[hima elgmal]

حمد لله على السلامه وربنا يستر وشكرا على التنبيه

[ahmed zawawy]

المشاركة الأصلية كتبت بواسطة hannibal السلام عليكم ده أول موضوع ليا في المنتدى لكن مش أول مرة أدخله، بل يمكن بدخل المنتدى يوميا أكثر من مرة، لأني عاشق للسيارات من صغري ولأن المنتدى محترم فعلا والناس اللي فيه عارفين بيقولوا ايه مش مجرد أي كلام عن العربيات وخلاص. أعرفكم بنفسي، اسمي فريد كرماني وبشتغل مترجم والنهاردة حصل موقف فعلا يجبر أي حد أنه يتكلم فيه بخصوص سرقة السيارات. أنا عندي سيارة سكودا أوكتافيا والنهاردة أخويا الكبير، دكتور هو، كان عنده كشف خارج البلد (ساكن في شبين القناطر بالمناسبة) ولأنه مش بيعرف يسوق كويس قاللي تعالى وصلني ونرجع مع بعض. خرجنا مع بعض ورحنا بس اتاخرنا شوية في الكشف، واحنا راجعين اللى حصل اننا على مشارف المقابر في الطريق لقيت شابين في سن المراهقة (ما بين 15 و 18 سنة) خرج فجأة مش عارف منين ورمى على البرابريز كيسين ماء مع سرعة السيارة وقذف الكيسين انفجروا بجد بشكل وحش جدا والمشكلة اني كنت فاتح كل الشبابيك. وقفت بعده بحوالي 20 متر وبجد فتحت الباب وعفاريت الدنيا بتتنطط قدامي من اللي عمله، لقيت ان اللي رموا الكيسين دول مجرد دفعة أولية وكان فيه وراهم أكتر من 15 واحد ماسكين حاجات الله أعلم ايه هي (بعدها اخويا قاللي سلاح) بصراحة اتجمدت مكاني ثواني وركبت السيارة الحمد لله انها كانت لسة شغالة وطلعت على طول في ثواني. ايه الحل مع العصابات دي؟ ايه اللي كان ممكن يحصل لو كان أخويا الكبير لوحده؟ بصراحة حسبتها على نفسي وعلى غيري وقلت الحمد لله إن ربنا سترها وحبيت بس أنبه الناس هنا في المنتدى عشان لو كان حد هنا من شبين القناطر ياخد باله كويس أوي وهو ماشي من جنب مقابر طحا. وربنا يسترها مع الجميع يارب.

حمدلله علي سلامتك وسلامه اخوك يا استاذ فريد وربنا يستر

[koashraf]

الف حمد الله على السلامه....

فى مثل هذه الحالات لاتتوقف ابدا وحاول تفادى اى عائق موجود واهرب فوراً....

واهلاً بيك عضو جديد فى المنتدى...

[hannibal]

حقيقة ليس أدري ما يقال .... شكرا بحق للجميع

[احمد الشناوى1981]

الحمد لله على سلامتكو يا استاذ / فريد
بس ليا رجاء هو ان زى ما حضرتك نبهتنا من الموضوع ده و اكيد اى حد فينا لا قدر الله لو اتعرض لموقف زى ده هيكون مستوعب ايه الموضوع و هيكون رد فعله سريع و ده هيكون بفضل تنبيهك
بس ياريت لو حضرتك تعمل بلاغ بالواقعه دى فى اقرب قسم او نقطه بوليس و ربنا يسهل و العيال دى تتمسك و ربنا يخلصنا من امثالهم و يحفظنا جميعاً