ارشيف الاستراحة 2011

[mar mar]

المشاركة الأصلية كتبت بواسطة dr.wael7yran لأ ماهم لازم كلهم يتجوزوا .. امال انا اللي اقعد في الحفرة دي لوحدي و لا ايه .. تيجوا هنا كلكم كده تنوروني .. و تقولوا و لا يوم من ايام العذوبية

: balloons71:

تفتكر العقده بتاعتهم هتتفك

[mido_00750]

المشاركة الأصلية كتبت بواسطة dr.wael7yran لأ ماهم لازم كلهم يتجوزوا .. امال انا اللي اقعد في الحفرة دي لوحدي و لا ايه .. تيجوا هنا كلكم كده تنوروني .. و تقولوا و لا يوم من ايام العذوبية

طيب ما حضرتك بتخوفنا اهو
يعنى اطحن نفسى واعمل تقشف عشان ارجع اندم ، وقول فين ايام العزوبية .
يا جماعة انا كدة زى الفل ، انا مش ناوى .

[mf]

المشاركة الأصلية كتبت بواسطة dr.wael7yran هو انا موش قلتلك اقعد الاول مع اي واحد متجوز و انت هتسمع معجزات .. طب اسمع دي يا سيدي و لا تتعجب .. انا كنت فاتح مشروع كده على قدي ..في مجال تخصصي .. و كان بياخد كل وقتي .. و كان بيكسب و الحمد لله بس موش اكتر من الف او الف نص في الشهر .. كنت بصرفهم يا دوبك على الموبايل و العربية و خروجاتي .."ايام العزوبية التي لن تعوض "... و كنت 28 سنة و بلعب في ال 29 .. و قعدت مع ابويا القعدة التمام .. و قسمنا مصاريف الجواز .. و طلع مطلوب مني -انا موش ابويا- علشان اتقدم لأي بنت متوسطة في طلباتها حوالي 60 الف جنيه يعني ايه .. يعني اقعد احوش مرتبي بالكامل من غير ما اصرف منه و لا مليم 4 سنين.. و لو صرفت بس بتقشف يعني.. يبقى خمس سنين .. و خمس سنين تقشف .. وانا اللي كنت وردة مفتحة و شاب فرفور معاه الابيزا من ايام الكلية .. يعني بحسابات الورقة و القلم انا هتجوز و انا عندي 34 او 35 سنة كده المهم قلت كده موش هينفع .. انا لازم اكبر المشروع علشان اعمل دخل اكبر لأنه زي ما قلتلك واخد وقتي كله .. و علشان اكبر المشروع كان لازم اتوسع في المكان اللي انا مأجره .. و ده شيئ كانت رافضاه تماما الست صاحبة المكان رفضا تاما باتا ..و ياما اتحايلت عليها و هي دماغها و كنت محتاج اجيب اجهزة ب حدود 160 الف جنيه .. و كنا احنا اربعة شركاء يعني كنت محتاج اوفر 40 الف جنيه اجيب بيهم اجهزة .. و لما جيت اكلم الشركاء بتوعي انه احنا لازم نتوسع لقيتهم الباشاوات فتحوا مشروع جديد اكبر و اوسع مع نفسهم و شاركوا فيه ميين ؟؟ اكتر واحد كان بينافسني و انا و هو مبنطيقش بعض .. و قفلت في وشي يا معلم .. لا المكان ينفع يكبر لانه صاحبة المكان راضية تكبره .. و لا الشركاء بقى معاهم فلوس يكبروا .. و لا حتى بقوا فاضيين ليه يفكروا معايا .. و شغالين في مشروعهم الجديد .. و ماشية معاهم حلاوة.. و المكان زي ما هو كده .. و هيفضل على كده .. موش قادر اقفله لانه شغال و بيكسب .. و رابطني جنبه و بالف و نص في الشهر على اكثر تقدير .. يعني بالورقة و القلم .. شكرا .. ثم ظهرت المدام .. و المدام - الصراحة - جت بعد كام موضوع انا كنت فيهم باتدلع حبتين .. بس .. و ركز معايا .. في اليوم اللي صليت فيه استخارة و عقدت العزم بجد انه هعمل اللي ميتعملش علشان انجز الجوازة دي .. في نفس اليوم ده بالظبط .. لقيت واحد من الشركاء بيكلمني .. هما اه فتحوا المشروع الجديد .. و اه اشتغل حلو جدا .. واه كسبوا منه كويس جدا جدا.. بس متفقوش خالص خالص مع الاخ الغتت اللي انا موش بطيقه .. و خلاص هيسبوه .. و معاهم اجهزة باكتر من 180 الف جنيه و موش عارفين هيعملوا بيها ايه .. و عندهم استعداد يجيبوها عندي و يدخلوني شريك فيها و اسدد براحتي نصيبي فيها على اربع او خمس سنين - و من ربح المكان - يعني الشهر اللي منكسبش فيه مسددش فيه بس على شرط انه صاحبة المكان توافق انه احنا لازم نتوسع .. و رحت لصاحبة المكان و قولت اعمل محاولة اخيرة و انا شبه متأكد من الرفض لأني بتحايل عليها بقالي 3 سنين و هي موش راضية نهائي .. و قبل ما اكمل كلامي معاها .. كانت موافقة .. يا الله .. ده انا كنت رايح احايل و اتخانق و اهدد و اعمل قصص .. و دي وافقت في ثانية .. ليه .. لأن الهانم غارت جدا من المشروع اللي كانوا الشركا بتوعي دخلوا فيه و ما صدقت عرفت انهم هيقفلوه هناك و هنفتحه هنا عندها .. و في يوم و ليلة يا صاحبي .. و من غير ما ادفع و لا مليم .. كبر مشروعي 3 مرات مرة واحدة .. و لو كنت قعدت اخطط 100 سنة ماكنتش هتمشي كده ابدا .. و ال 60 الف و زيادة عليهم كمان جم في سنتين بس .. و من غير تقشف خالص .. ده انا فسحت المدام دي في كل حتة فيكي يا مصر و عشنا احلى ايام في الخطوبة .. انا حاسس بيك .. انا برده عشت تجربة مؤلمة جدا مع واحدة حبيتها جدا علشان موضوع الالف و نص ده .. و ده ايه .. و انا الدكتور و معايا عربيتي و معايا شقتي - ربنا يكرمك يا ابويا - و اترفضت لظروفي المادية .. و كنت مكتئب زيك كده برده بس لما امنت بجد بحاجة مهمة جدا .. لما بجد حسيت بيها وطبقتها في حياتي .. حياتي اتغيرت 360 درجة .. عارف ايه هي الحاجة دي .. ان ربنا دايما بيوعدنا بالخير و الغنى و الستر و الجنة .. و ان الشيطان الله يكحمه بيوعدنا بالشر و الفقر و الفضيحة و النار .. و انك لو جربت مرة و باظت و قلت لأ خلاص انا ماليش حظ في الدنيا دي يبقى ده وعد الشيطان .. انما لو قلت خير ان شاء الله و هاحتسبها عند ربنا و ربنا ان شاء الله هيعوضني عنها بحاجة احسن مليون مرة يبقى ده بقى وعد ربنا .. و شوف انت بتثق في مين اكتر .. و احسن الظن بالله دائما .. و يارب اكون افدتك و تقبل سلامي

فيه ناس بيكون قدمها سعد

المشاركة الأصلية كتبت بواسطة hazem_khidr ايه التغييير المفاجئ دا اغيب و ارجع الاقي كار ادمير بيكتب و كمان بالعربي لا لا لا مش متخيل و مش مصدق عيني ايه السبب للتغيير دا ؟؟ عموما يا باشا حقك عليا حبيب قلبي يا هندسه و الله ليك وحشه استني ردي عليك في موضوع البرافا

ايه التغييير المفاجئ دا
اغيب و ارجع الاقي كار ادمير بيكتب و كمان بالعربي
لا لا لا مش متخيل و مش مصدق عيني
ايه السبب للتغيير دا ؟؟
عموما يا باشا حقك عليا

ده فى المناسبات اللى زى ديه بس بكتب عربى !!!
: 129E17~143:

[Eng/salwa]

المشاركة الأصلية كتبت بواسطة nawwara خلينى اصححلك انا .. كل انسان بيحسب اى امر مقبل عليه بعقله وبس عمره ما هاينجح , طب قولى .. فين التوكل على الله؟ فين تفويض الامر ليه؟ , طب بلاش دى .. عايز تقولى انك لو حبيت تتقدم لواحدة بامكانياتك الضعيفة وأهلها رفضوا هاتفضل تدور الى ما لا نهاية مثلا؟ , ولا لو لقيتها مثلا مش هاتعرف تعيش باللى معاك؟ .. طب ليه دايما لما بتحسبوها , تحسبوها بالقرش والمليم فقط؟ , ليه ماأضفتش حسابات ربنا؟ .. احنا دايما بنقول (أحنا متوكلين على الله) لكن الواقع غير كده .. (احنا عندنا يقين بالله) بس مش باين .. إلى كل الشباب المكتئب , (تفائل خيرا تجده) .. دى مش مجرد عبارات رنانة وبس , فكر فيها بتمعن .. ربنا سبحانه وتعالى لما قال (انا عند ظن عبدى بى) , يعنى بيقولك يا عبدى لو ظنيت فى خير هاتلاقى الخير جاى لك ولو ظنيت فى غير الخير بردو هاتلاقيه .. عارف معنى ده ايه , ان الموضوع مش بس حسابات بالعقل , ده معتقد عن الله تعالى , يعنى لما تحسبها بعقلك وتقول مش هاعرف اتجوز بالوضع اللى انا عليه وخلاص على كده , يبقى ده اللى هايحصلك لأن هو ده ظنك بالله , لكن لو ظنيت ان حالك كله ربنا هاييسره لانه تعالى اعلم باللى جواك وانك فعلا تريد العفاف يبقى ربنا هايجوزك من عنده بمعنى الكلمة وهاتلاقى امورك كلها ميسرة تماما على عكس حساباتك تماما لدرجة انك ممكن تكلم نفسك وتقول انا مش عارف الموضوع مشى ازاى واتجوزت فعلا سبحان الله , ممكن تلاقى نفسك بتضرب كف على كف من الاستعجاب , كل ده يعتمد على الظن بالله واليقين به .. شوف انت من جواك ايه اللى بتعتقده فى ربنا , هاتقولى ظنى بالله حسن طبعا , طب ظنك الحسن ده عن يقين؟ , لو عن يقين بالله تعالى وثقة فى كلام ربنا , مش هانشوف منكم - يا شباب يا مكتئب - الكلام التشاؤمى ده ولا هانشوف النظرة السوداوية دى للزواج .. طب لما ربنا سبحانه وتعالى اقسم على نفسه انه هايساعد كل من يريد العفاف , واحنا طبعا عارفين ان كلام الله تعالى منزل , يعنى مافيهوش غلطة , يعنى حق , يعنى هايحصل هايحصل , فضلا عن كونه مؤكد من الله تعالى .. ليه ايها الشباب المكتئب لما حسبتوها ماحطيتوش الكلام ده فى بالكم؟ لو حطيتوه مش هاتفكروا بالاسلوب ده .. طالما بتشتغل وبتاخد مرتب - حتى لو ضعيف ومايكفيش ايجار واكل وشرب - يبقى تقدر تتجوز .. طبعا هاتقولى مستحيل .. هاقولك مافيش مستحيل على الله ده اولا .. ثانيا : بحسابات العقل البشرى القاصر , عمرنا ماهانتجوز ولا هانشوف جواز , لو اضفنا ليها بس حسابات ربنا - اللى احنا عمرنا ما نعرفها ولا عقلنا يقدر يتوصل لها - , يبقى مؤكد الزواج ممكن وبامكانيات ضعيفة جدا .. ولو فكرت فى يوم تتقدم لواحدة وأهلها رفضوك لضيق حالك , ألف من يرضى بك بظروفك , حتى لو فشلت خمسين مرة لازم مرة منهم تصيب , لانك مش بتتعامل مع الناس وبس , انت بتتعامل مع الناس ورب الناس اللى خلقهم وقدر المقادير وقسم ارزاقهم من عنده سبحانه .. وبمناسبة الرزق عايزة اقولك قول النبى صلى الله عليه وسلم (ان العبد ليحرم الرزق بالذنب يصيبه) , والزواج رزق , وممكن الرزق ده يكون متأخر عننا بسبب ذنوبنا , فلازم بردو الواحد يحط فى الاعتبار انه يتقرب لله تعالى ويتوب عن ذنوبه السابقة , عشان ربنا يرزقه ويكرمه .. ولا ايه يا جماعة ..

السلام عليكم و رحمة الله و بركاته
والله ده كلام جميل جدا جدا جدا
ربنا يبارك لك يارب
عين العقل و اتفق معاكى فى كل كلمة
جزاك الله خيرا و يا رب الشباب المكتئب يقتنع بهذا
اشكرك على حسن التعبير و حسن الظن بالله ربنا يبارك لكم جميعا
اللهم يسر لشبابنا و بناتنا جميعا يا رب يا رب يا رب