انا نزلت التحرير النهاردة ..

[momen_bondok]

جزاك الله خيرا يادكتور على فعل الخير

[AbOnOrA]

نسيت احكيلكم على اكثر موقف هزنى شخصياً وكان سبب مباشر فى تعجيل نزولى للميدان
بصراحة انا شخصياً كنت متفهم غضب الشباب والمتضامنين مع اسر الشهداء والمصابين من اثر احداث اول امبارح وما اذيع بعدها من فيديوهات تؤكد استمرار الشرطة فى استخدام العنف السادى و الممنهج ضد المعتصمين او المتظاهرين

خاصة وانى عارف الى حد كبير احساس كل مصاب على الاقل لما بيشوف كل يوم اثار جروحة باقية بلا اى ثمن فما بالكم باحساس من فقد اخ او صديق او ابن او بنت والجرح فى القلب اعمق واشد مرارة

لكن كنت متحفظ برضو على ما اذيع وانتشر من صور واوصاف لقوام المعتصمين من شباب صغير بغير تعقل او نظام او حتى هدف

المهم امبارح حسمت امرى انى هتوجة للتحرير بليل لمتابعة الموقف بنفسى وتقديم اى مساعدة انسانية ممكنة بدون المشاركة فى اى رد فعل عنيف خاصة اقتحام وزارة الداخلية

لكن شاء القدر ان تحصل مجموعة احداث تاخرنى امبارح واخرها وصول عمى من السفر وكان ضرورى اروح استقبلة واودية لبيت والدى وطبعا بعد سلامت وطيبون كانت الساعة دخلت على اتنين بليل وكسلت اروح الميدان

المهم صحيت انهارده الصبح روحت شغلى وطول النهار بتابع الاخبار والنقاشات ومع تقدم ساعات اليوم كانت اعصابى خلاص هتنفجر من اللى بشوفة فى الفيدوهات واللى بياكد ان الوضع تماماً كما هو قبل جمعة الغضب
شوية وجالى تليفون من الحاجة ان اخويا الصغير عايز ينزل التحرير لليوم التالى على التوالى بعد ما لقت معاه خراطيش وفوراغ قنابل ( سوفونير المظاهرات ) وفى تليفونة فيديوهات من المظاهرات فى التحرير ووالدتى منهارة وبتطلب منى اكلمة وامنعة من النزول مرة تانية

طبعاً مبقيتش عارف اعمل اية ولا اقول ايه وانا نفسى عايز انزل المهم قولتلها حاضر هكلمة بس مؤقتاً متخرجيهوش لا لدرس ولا لاى حاجة اليومين دول خالص
بالمناسبة اخويا الصغير ده فى لسه فى اولى ثانوى

الكلام د كان العصرية كده وعلى المغرب جالى تليفون من اعز واقدم اصدقائى بيحكيلى ان اخوة الصغير هو كمان نزل التحرير ومفيش خبر عنة من الصبح ووالدتة جالها تليفون من اصحابة انه اتصاب فجريت هى كمان على التحرير وصاحبى طبعاً بعد ما كنا بعد الشغل هنروح مع بعض مضطر ينزل جرى على التحرير يلحق والدتة ويلحق اخوة الصغير
كده احنا عندنا اسرة كاملة مكونة من ام واولادها الاتنين ف التحرير ومحدش عارف التانى فين !!
اللى فهمته بعد كده ان الاتنين صاحبى واخوة الاصغر كانو متفقين مع بعض كل واحد ينزل يوم والتانى يقعد مع والدتة يمنعها من النزول ،، بس الصغير مقدرش يحفظ الاتفاق وقرر ينزل تانى انهارده

علماً بان والدتهم موظفة كبيرة فى شركة حكومية واسرتهم ميسورة مادياً بشكل كبير واولادها او اصدقائى دول متجوزين ومنهم اللى مراتة على وش ولادة والله

بصراحة انهارت تماماً وانا بتخيل ان ام صديقى ديه هتواجه نفس مصير ام صديقى اللى مات يوم 28 وتخيلت صاحبى حتى فى موقف اخو صديقى اللى مات يوم 28 ولقيت نفسى عايز اضرب نفسى ميت جزمة انى مش فى الميدان
نزلت من الشغل واتجهت للميدان مباشرة وبعد تليفونات كتير وقعت قلبى اخيراً رد على صاحبى وطمنى انهم لقو اخوة وانه كان مصاب بحالة اختناق واسعفوه فى مستشفى عمر مكرم وبقى كويس
والمضحك المبكى انى لقيت ان جامع عمر مكرم تحول اى مستشفى وساحة انتظار للامهات الثكالى والباحثين عن ابنائهم

اخر المضحكات المبكيات انى انا نفسى طول مانا رايح عمال احسبها هركن العربية بعيد فين وامشى منين واقول لنفسى مش كنت روحت البيت الاول ركنت العربية وروحت بالمترو خفيف خفيف احسن وفى الاخر ركنت العربية بعييييييد عن ماسبيرو كده واخدتها مشيت لافاجىء على طول الطريق وحتى بوابات الميدان من ناحية المتحف المصرى او طلعت حرب او قصر النيل بطوابير من العربيات والمتوسيكلات فى قلب المعمعمة احسن واقيم من عربيتى اللى كنت خايف عليها ميت مرة واصحابها مابين راكنينها ومابين بيستخدموها فى نقل الاسعافات والمصابين خاصة بعد تكرار وقائع التحرش بالمصابين فى المستشفيات الميدانية وسيارات الاسعاف ده غير قلة عددها اصلاً حتى اللى معاه متوسيكل كان بينقل بيه مصابين

معلش طولت عليكم بس عايز اقولكم بلدنا مش هى الطوب والحجارة ولا هى البورصة ولا السياحة
وكل دول واكتر ولا ليهم لازمة مع شعب جاهل ومطحون ومهان وجعان

لكن مصر شعب اصيل وشباب حر وكرامة وتاريخ
ومصر ديه مش هتضيع ابداً باذن الله واللى مش صدق مدى اصالة وحضارة الشعب المصرى يفتكر الميدان فى يناير وينزل يشوف الميدان دلوقتى

وصدقونى لو نزلتو وشوفتو بعنيكم هتعرفو ان نقطة دم واحدة من اشرف واصدق شباب مصر اللى فى الميدان اغلى من السياسة والاقتصاد وشرف وطنطاوى والدنيا كلها

انا نازل بكرة ان شاء الله وبأيد الاعتصام لحين تسليم السلطة لحكومة انقاذ وطنى منتخبة او ائتلافيه
حكومة كاملة السيادة والصلاحيات تجمع كل التيارات

ولن اتراجع لحين تقديم المسئولين والمنفذين لعمليات قتل المتظاهرين - الى المحاكمة بداية من 25 يناير وحتى الان
وطالماً ان الدم مازال مستباحاً وقتل المتظاهرين مستمر فالثورة على النظام وشرطتة ومجلسة قائمة ومستمرة

اللهم قد بلغت اللهم فاشهد

[كار كير فورميلا1]

اسلوب الجيش والشرطه واحد

[jojojojojo]

مع احترامي لك يادكتور ومع احترامي لجميع شباب التحرير وتعاطفي مع المصابين وربنا يصبر اهل الشهداء بس انا شايف ان برضه التظاهر السلمي مش كده ديه فوضي وهمجيه وتنتهي بينا الي عراق جديد لاقدرالله وان لازم احترام الامن وليس مهاجمته ومهاجمه اقسام الشرطه ومديريه الامن واللي هيدفع التمن في الاخر انا وانت واختك وامي واختي وولادك استحاله يكون هوه ده التظاهر انا كرهت الثوره بسبب الهمجيه وعدم الاحترام احنا بامانه همجيين ولا نعرف عن الديمقراطيه اي شيء وان اللي بيعمله الامن ده اقل حاجه ممكن تعمل جي تهاجمني في بيتي عايزني اطبط عليك ده حتي مش عايزين يتظاهروا في الميدان بس لا بيهجموا مديريات الامن انت حضرتك مشفتش تعامل الامن في ويل ستريت مع المتظاهرين ولا تعامل الامن في بريطانيا علي خلفيه مشاكل عنصريه واليونان عشان الازمه الاقتصاديه وحتي لو احنا عندنا حق ميجيش كده ولو هيجي كده بامر بلطجه وصياعه احنا مش عايزينه للاسف هنضيع بلدنا عشان مصالحنا الشخصيه وبنقتل النفس التي حرمها الله الا بالحق بايدينا ياجماعه لحد الوقتي 24 قتيل و125 مصاب ولسه هتزيد والشباب ماشيه ورا عصابات والله اذ كان سلفين او اخوان او ليبرالي او عملاء والبلد في حاله فوضي زي ايام 25 يناير احنا بنتاخر بالله عليكم اهدوا وارجعوا بيوتكم احنا بنضيع يا جماعه وهتوصلنا احنا الشعب اللي ملناش لا في السياسه ولا في الاحزاب ولا في المظاهرات واحنا الغلبيه ان احنا نكره الثوره 25 اللي خلصتنا من الظلم فياريت ادوا فرصه ان البلد تقوم والانتخابات تتم عشان علي الاقل نلحق تونس ونوصل للطريق الصحيح علي الفكره الحاله اللي احنا فيها ديه سببها برضه حكومه ضعيفه جدا ومجلس عسكري واحنا برضه يارب احفظ مصر وبارك لها واهدي اهلها واهدينا الي طريق الصواب

[jojojojojo]

مع احترامي للاخ ابو نورا ازاي انت ووالدتك تسيب اخوك اللي لسه في اولي ثانوي ينزل وهوه يعتبر عيل وميعرفش اصلا حاجه عن السياسه او الوضع البلد بس هوه نازل هوه واصحابه كلعبه وهيصه وفسحه ويضرب بالطوب الامن وفي الاخر يتصاب ووممكن يموت مع احترامي لحضرتك منتهي الاهمال وعدم التربيه وحضرتك بتتفاخر اوي انه نازل هوه واصحابه للاسف هما دول اللي قلبين البلد شويه عيال مع شويه تيارات تشتغل لمصالحها علي الرغم اني انا كنت مع جمعه رفض المباديء الدستوريه ومع ثوره 25 يناير وافتخر علي ما قمنا به في تلك الثوره بس اللي بيحصل دلوقتي شىء مخزي انا خايف علي بلدنا ياريت تحكمه عقلنا الحكومه اقدمت استقالتها والمجلس العسكري هيشكل حكومه انقاذ وطني وانا متاكد ان محدش هيمشي من الميدان الا لما تخرب خالص ربنا يستر واخيرا ليس اللي في الميدان هوه الشعب المصري احنا 80 مليون علي الاقل 60 مليون عايزين الاستقرار والامن وعوده الهدوء مش قتل واصابات وسرقه وبلطجه