هل هناك حرب باردة بين دول الخليج و مصر ؟؟

[hatem_eg]

المشاركة الأصلية كتبت بواسطة فادى مع اعتراضى الشديد على الجملة الاولى لأن مبارك لم يكن حليفا لاسرائيل بل كان نصيرا للقضية الفلسطينية و منظمة التحرير و حليفا لعرفات و ليس لرابين او نتنياهو. لكن للتوضيح, دول الخليج عمليا بعيدة عن اسرائيل, و لا يوجد خطورة تذكر عليها من اسرائيل و لا يوجد اى تهديد اسرائيلى على مصالحها, رغم ذلك فان دول الخليج عموما مناصرة للقضية الفلسطينية بشكل او بأخر. فى المقابل فان ايران أخطر على الخليج من اسرائيل, ايران تحتل جزءا من الامارات, كما انها تدعم الاحتجاجات الشيعية فى الخليج العربى, هناك عدد كبير من الشيعة فى الخليج العربى, بعض هؤلاء يدينون بالولاء لايران و تقوم ايران بدعمهم سياسيا و ماليا. لذا فانه عمليا ايران أخطر على دول الخليج من اسرائيل. أضف الى ذلك قضية عرب الاحواز و هم عرب و سنة و يعانون من تسلط الدولة الايرانية حتى أن الفلسطينيون مع كل ما يعانونه يعيشون بحال أفضل من عرب الاحواز! مبارك كان داعما للخليج العربى بشدة, و تحالف مع السعودية و الكويت و ساهم فى حرب تحرير الكويت, و نتيجة لذلك فقد فازت مصر بمليارات من الاستثمارات الخليجية, و أيضا زاد عدد العاملين المصريين فى دول الخليج, و كان هذه سياسة ذكية من مبارك, فالسياسى هو من يستشرف المستقبل, و مبارك كان يعرف ان الطرف الفائز هو الخليج و الطرف الخاسر هو صدام حسين, فانضم للطرف الأقوى و الاغنى و الأكثر استقرارا. دول الخليج يحبون مبارك بشدة, حتى ان صور مبارك تجدها معلقة فى شوارع الكويت!

أتفق معاك في الجزء ده في ان الخليج اخر همه اسرائيل ومافيش خوف عليهم منها في الجزء الخاص بالحلم الاسرائيلي وهو من النيل للفرات وده بعيد عن الخليج ، بالمقارنه من خوفهم وقلقهم من ايران وخصوصا وان ليهم سابقة قبل كده في الثمانينات ومحاوله لإحتلال الحرم بالسلاح وكانت قضيه كبيره في وقتها ، ناهيك عن البلبلة اللي بيعملوها في كل موسم حج اللي هم الشيعه واللي بتدعمهم طبعا ايران في دول الخليج ،،، فخوف الخليج أكبر من ايران عنه بالنسبة لإسرائيل ،،،،

المشاركة الأصلية كتبت بواسطة فادى أما الان و مع تخبط عصام شرف و حكومة ما بعد الثورة, فان علاقتنا مع الدول العربية على المحك, عصام شرف يتحسس الطريق الى السياسة, و اذا كان لديه القدرة على التعلم فانه سوف يصل الى نفس الوجهة السياسية التى وصل اليها مبارك فى النهاية.

اخي الفاضل لي تحفظ بسيط على الجزء الأخير في كام نقطه كده
د عصام شرف ما بيتخبطش ولا حاجه ، انما ما ننساش انه عليه ضغط رهيب وشايل بالبلدي كده على كتافه قضايا كتيره جدا منها مشاكل داخليه ومحاولة لملمت ما تبقى في صناديق الدوله بعد النظام السابق الفاسد لسد احتياجات الشعب والعجز اللي في ميزانية الدوله ومحاوله بالنهوض بالإقتصاد ،،، ومحاولات اصلاح ما تم افسادة مع الدول الصديقة في القارة الافريقيه ومشاكلنا معاه في المياه ، لان النظام السابق كان اخر حاجه يفكر فيها علاقاته بالدول الافريقية لان بالعربي كده مش جاي من وراهم فلوس تخش جيوبهم بالمقارنه بدول الخليج ،،،
علاقة عصام شرف بالخليج وبالأخص الامارات اكيد ماهياش ضعيفه لانه كان على اما اذكر مستشار لوزير النقل والمواصلات هناك ولمدة 20 سنة ، وكون انه عاوز يعمل زيارة لدول الخليج ده في حد ذاته انجاز كبير ومهم بدرجة كبيره جدا ، لان طبعا حسني مبارك كان صديق شخصي لكل حكام الخليج وخصوصاااااا انه زي ما بيقولو كده وقف وقفت رجاله معاهم وحماهم من صدام بعد ما كان حيصطادهم واحد واحد ،،، والتصريحات والتلميحات اللي بنسمعها عن وقوفهم دلوقتي مع حسني مبارك ده شيئ طبيعي على وقفته معاهم قبل كده ،
ولثقل مصر في المنطقة بدى قلقهم واضح جدا جدا في اللي حيحصل ما بعد الثوره ؟؟؟ والعلاقة اللي كانت بينهم وبين مصر واللي حييجي بعد كده هل حيكون معاهم زي ما كان مبارك ؟؟ ، فكانت زياره عصام شرف شيئ مهم لتهدأت الاوضاع والاجابه على تساؤلات كثيره عندهم والزياره مهمه بردو ليهم قبل ما تبقى مهمه لينا احنا لان حاجتهم هم لمصر أكبر بكثير من حاجة مصر ليهم وخصوصا بعد الثورة وان خير مصر وثرواته كلها كانت داخله جيوب النظام وماكنش للشعب ولا للبلد والمليارات اللي بنسمع عنها لو كانت للبلد واستخدام الثروات بشكل جيد حيغنينا عن الحاجه لأي بلد ،،،
فاحتياجنا ليهم اذا كان اقتصادي لو تعثر ممكن يتعوض باشكال كثيره ( لو مافيش سرقة ونهب للبلد ) ،، ولكن احتياجهم هم لينا يمثل أمن واستقرار بدرجة كبيره واللي صعب انه يتعوض ببلد اخر،،
ولو كان في ناس نضيفه في البلد قبل كده في الحكم السابق ما كانوش قدرو يتجرأو على مصر وشعبها في أكثر من موقف على مدار السنين اللي فاتت ، لانهم عارفين النظام وفساده ويعرفو يسكتوه ازاي ، يعني بالعربي مبارك كان مريحهم على الاخر
تحياتي ،،،