نقاش حول اﻹنتخابات القادمة

[sam ram]

انا ميال اكتر للفتره الانتقاليه ...
ولو الجيش عليه ضغوط لتسريع العمليه ممكن تكون من خلال لجنه رئاسيه او لجنه حكماء او بالتعاون مع المجلس الاعلا للقوات المسلحه .. او حتى فرد لا يتم اعاده ترشيحه من احد الرموز اللي ليهم شعبيه من خلال المفاضله بينهم ( عمرو موسى - احمد زويل - الجنزوري- البرادعي - ... )

وبرغم ان المجلس الاعلى كل يوم بيثبت انهم على درايه كامله بكل الامور ... ومعدل التغيير متوازن ...
وبالتالي ممكن خلال شهور نلاقي الامور مناسبه تشريعيا وتنظيميا للانتخابات

لكن المشكله الاكبر اننا محتاجين وقت
وقت علشان تظهر فيه احزاب ليها برامج و توجهات و الناس تتعرف عليها
وقت علشان نقضي على رؤوس و ذيول و ارجل و اعين الفساد .. للاسف الفساد مستشري رأسيا و افقيا ... لو قضينا على القيادات الفاسده فقط .. حتطلع رؤوس جديده ... لازم اباده تامه
ودي حتاخد وقت شئنا ام ابينا

ووقت لينا احنا علشان نبتدي نستوعب و ندرك الامور ...
احنا بقالنا سنين مغيبين سياسيا و فكريا .... دا اللي بيصوم يوم لو اكل الاكل كله مره واحده يتعب ... لازم ناخد فرصتنا لننضج فكريا ...
في ناس كتير على وعي وادراك ... لكن بتكلم عن عموم الناس اللي حتروح تنتخب بالرقم القومي
انا شخصيا عمري ما انتخبت قبل كده ... و لا حتى انتخابات النادي ... التجربه نفسها جديده عليا
وطبعا محتاجين وقت للناس اللي لسه مش مستوعبه الثوره و مرتبطه عاطفيا بالرئيس السابق الرمز الكبير ... و مقتنعين اننا عايشين في فوضى و خربنا على نفسنا ... لأنهم بالمنطق ده مع اول انتخابات حيدوروا على شخصيه الزعيم الديكتاتور الرمز الكبير
هما مش كتير ...
لكن احنا محتاجين وقت علشان نندمج

في نقاط طبعا لا خلاف فيها ... الاشراف القضائي - الغاء البطاقات الانتخابيه - الغاء نسب العمال و الفلاحين
الغاء حاله الطوارئ في اقرب وقت ممكن
الرقابه الدوليه مش عيب و لا حرام ... دا اذا كنا بنجيب حكام اجانب لماتشات الكوره !!!!
لكن طبعا النظام السابق مكنش عايز حد من بره يجي يفضح التزوير و التلاعب عيني عينك

موضوع البرلمان الاول و لا الرئيس .. يحلف اليمين و لا يحلف بالطلاق .. مجرد شكليات متفرقش معايا ...
احنا دلوقتي في شرعيه ثوريه ... انا بس نفسي يكون في دستور كامل وحقيقي قبل اجراء انتخابات الرئاسه ... علشان منرجعش بعد دوره و لا اتنين نقول تعديلات دستوريه و واستفتاء وكأنك يا ابوزيد ما غزيت

في حاجه نفسي فيها غريبه شويه ...
وضع وزاره الداخليه تحت الاشراف العام للقوات المسلحه ... او وزاره العدل ... لفتره من الزمن
الظاهر ان اللي بيدخل كليه شرطه فاكر نفسه بجد بيتخرج باشا !!!
فواضح كده ان الباشوات لسه مش مستوعبين معنى تغيير الشعار من الشرطه في خدمه النظام الي الشرطه في خدمه الشعب وعندهم حاله انفصام
ممكن يبقوا يطلعوا طلبه اكاديميه الشرطه بعثه للكليه الحربيه او يدوهم قرص مكثف عن دور الشرطه الحقيقي يمسحوا بيه غسيل المخ اللي حصلهم في كليتهم


لكن في النهايه انا واثق في المجلس الاعلا للقوات المسلحه .. كل يوم بيثبتوا انهم فعلا على قدر المسئوليه و الحكمه و الاستيعاب الكامل للرغبات المشروعه للشعب المصري

[miam0502788391]

انا مش مع ان انتخابات رئاسية او برلمانية فى الوقت القريب
يا جماعة الثورة دلوقتى زى المولود فى مراحله الاولى يجب ان يتم رعايته بالدرجة الاولى قبل ما نفكر هيروح مدرسة ايه اوهيطلع ايه لما يكبر
وبالتالى انا مع فترة انتقالية كافية حتى يشتد عود الثورة
وانا كمان متفق مع راى الدكتور كمال فى ان أى انتخابات برلمانية قادمة هينط عليها فلول النظام السابق ( واللى هيدعوا انهم مع الثورة) وبالتالى بدل ما كان عندنا كفار ( عفوا فى اللفظ ) عارفينهم وشايفينهم سيبصح عندنا المنافقين ودول أسخم واضل سبيل
لازم قبل اى شيء ان يتم تغيير مواد الدستور بالكامل وعمل دستور جديد للبلاد على رأى الدكتور علاء الأسوانى احنا مش بنعمل ثورة كل يوم
واحب اعلق على بعض النقاط اللى ذكرها الأستاذ حازم :
ما هو النظام اﻹنتخابى الذى ستجرى على أساسه اﻹنتخابات؟
رغم انى بفضل النظام الفردى الا ان نظام القائمة هو الأفضل فى المرحلة الحالية والسنوات القادمة ....ليه ؟
لأن الاختيار سيكون من خلال برامج واضحة للأحزاب والنخب السياسية وسيجنبنا مشكلة التكتل العائلى والعشائرية والنفوذ المالى للمرشح والذى يلقى بشبهات حول نزاهة الانتخابات
اﻹشراف القضائى
طبعا انا مع الاشراف القضائى الكامل والشامل بمعنى الإشراف الكامل والشامل بدون اى مشاركة من اطراف اخرى سواء حكومية او اهلية حتى لو يتم عمل الانتخابات على سبعة مراحل مش تلاته بس
الجداول اﻹنتخابية
فعلا بطاقة الرقم القومى كافية جدا وبدل ما نتعب انفسنا فى عمل جداول جديدة او تنقية القديمة الحل جاهز وبسيط فى الانتخاب بالرقم القومى
ضعف اﻷحزاب
الوضع الحالى للأحزاب لا يسر عدو ولا حبيب لكن مع مدة انتقالية كافية كل حزب ممكن يعيد ترتيب اوراقه وتجهيز نفسه بجد للحياة السياسية كمان نعطى فرصة للأحزاب الجديدة التى سيتم انشائها ان تأخذ فرصتها فى تقديم نفسها للشعب
نسبة العمال و الفلاحين
دى المفروض تتلغى من قاموس الحياة السياسية وانا بقترح فى انتخابات برلمانية مستقبلية ان يتم وضع شرط حصول المرشح لعضوية مجلس الشعب على دورة تدريبية برلمانية حتى يصبح العضو قادر على مناقشة الكثير من امور الدولة والا بالله عليكوا ازاى اجيب واحد عامل او فلاح وكل اللى يعرفه عن مجلس الشعب ان يمضى اوراق وقرارات من الوزراء لأهل دايرته ولا يعلم ازاى يناقش الموازنه العامة او مناقشة طرح القوانين ....من الآخر ازى اجيب واحد جاهل يقنن للشعب اموره
الرقابة الدولية
يا سلام لو فيه رقابة دولية تنقل بصدق العملية الإنتخابية برمتها للعالم اجمع سيكون هذا اكبر مكسب للثورة على المستوى الدولى انا شايف لا يوجد اى مانع من رقابة دولية سواء من هيئات حكومية , منظمات خاصة او حتى افراد معروفين بمصداقيتهم دوليا ونقطة ان دى بتمس الأمن القومى دى حجة كان يرددها المسئولين فى النظام القديم لإخفاء التزوير وبالبلدى كده ما دمت بتعمل كل حاجة فى النور هتخاف من ايه

[محمود زيزوو]

انا متفق معاك يا استاذ سام رام وبصراحة فى الوقت الحالى الخيش ماشى تمام جدا وبيحاول يرضى الناس على قد ميقدر وربنا يكرمنا بحاكم كويس يحكم بما يرضى ربنا

[samirayad]

إحنا محتاجين فعلا

لناس نفوسها نقيه

سواء رئيس أو مجالس شعبيه

أسأل الله أن يوفقنا لإختيار الأنقياء

وكفايه علينا أوى ماحدث فى الأعوام الباليه السابقه

_____________________

طبعا لازم كمان من توافر

حاكم عنده ضمير ويتقى الله فينا

ومحكوم ( أى نحن ) نتقى الله فى كل أعمالنا

فلكى تنجح مصر فى المرحله القادمه

فلابد من توافر سياسه جديده

سواء فى أعمال الحاكم أو المحكوم