احترس من استخدام معطر الجو بالسيارة

[hatem_eg]

ههههههه بصراحة ضحكتني
اولا تحياتي ليك على الموضوع لانه فعلا مهم وبيسبب كوارث في بعض الاحيان
واسمحلي اضيف تجربه حصلتلي كده من كام سنه ، بس المره دي كانت بملمع تابلوه وهي نفس الفكره بردو ، علبه معدنيه بس كانت حجم وسط
عربيتي وقتها كانت هوندا اكورد وكنت لسه بسخن وفي امان الله ورايح الكلية ولمعت التابلوه ، لقيت واحد صاحبي بعربيته جمبي بيقولي سيبك وتعالى معايا
سبت الملمع على التابلوه ( رغم اني عارف التحذير المكتوب ) بس سبحان الله نسيت
رجعت و والله يا اخواني من غير مبالغه اللي حصل معايه ده
راجع ببص على العربية ،، لقيت البرابريز متكسر ( متدغدغ ) ، للوهله الاولى قولت حد حدف حاجه من فوق دمرت القزاز ،، بس بركز في ركن القزاز السفلي من ناحية لتابلوه ،، لقيت علبة الملمع خارمة القزاز وطالع منه قد نصها كده ، ودخلت جوه العربية ولقيت الاتي
طبعا قعر العلبة طار زي ما حصل مع اخونا ميشو ،،
فوق في السقف كان فيه ديكور بلاستيك عباره عن جيب او درج صغير تدوس عليه يفتح ، لقيت الغطا ده في الارض ،، هواية التكييف الوسط لقيتها مرميه على الكنبة ورا ، غطاء العلبة البلاستيك لقيته على التابلوه الخلفي ،
غطا هواية التكييف بتاعت اللي جمب السواق خارجه من مكانها شبه حتقع ،، وبس ده اللي فاكره

والحمد لله اللي جات على قد كده بس حسيت ان حصل انفجار جوه العربيه وبقيت اجمع الاشلاء
خدو بالكو يا جماعه لانه فعلا مشكله
وربنا يسترها .. تحياتي ،،

[hatem_eg]

صحيح احب اضيف معلومه مهمه
لاني كنت دايما بحطه تحت الكرسي ، بس المهم ما يشوفش شمس
بالنسبة لضغط الحرارة داخل السيارة هو اللي بعمل مشكله في حاجات كتيره
منها التابلوه وغير كده لو في شرخ ولو بسيط في القزاز ، مع الضغط طبعا الشرخ ده حتلاقيه بقا واصل لاخر القزاز
عاده كنت بسيب تنفيس بسيط في القزاز الجانبي عشان الضغط لو زاد يلاقي منفس ولو بسيط
او على الاقل سيب هواية التكييف مفتوحه ، اللي هو زورار مرسوم عليها عربية وسهم ملفوف جوه العربية ، ده اقفله ( ماتخليهوش منور يعني ) وفي بعض الاحيان بيكون في عربيات تانيه راسملك على زورار تاني عربيه وسهم داخل من بره العربيه لجواها ، ده شغله
بحيث انه بيفتح هوايات التكييف فبيعادل ضغط الحراره نوعا ما داخل وخارج العربيه
وشكرا ،،

[zoomaa&mizaa]

سترك يا رب

[نبيل عبدالرحمن]

أحسن حاجة إن الواحد يسيب الملمع الخاص بالتابلوه والآخر الخاص بتنظيف كاوتش العجل فى البيت وننزلهم وقت ما نكون عايزين نستخدمهم وبعدين نرجعهم تانى ، وبالنسبة للمعطر فهناك أنواع مش سبراى زى اللى بتتعلق فى المرايه ودى استخدامها آمن تماماً

[Badr Salah]

شكراً على المعلومة والحمد لله ان ربنا سترها