دركسيون الأكسنت 2006 مش بور

[en_shreef]

المشاركة الأصلية كتبت بواسطة Ahmed Anwer يمكن يا جماعة قصده مفهاش باور كهربا زي بتاع الالنترا الجديدة و النيو اكسنت و الياريس لكن اكيد فيها باور زيت

ياريت توضحلى الفرق بين باور الكهربا وباور الزيت. وشكراً

[Ahmed Anwer]

المشاركة الأصلية كتبت بواسطة en_shreef ياريت توضحلى الفرق بين باور الكهربا وباور الزيت. وشكراً

معنديش تفاصيل فنية واضحة

ممكن حد من الأخوة يفيدين اكتر

بس اللي اعرفه ان الباور الكهربا احدث و اعطاله اقل و الأجزاء الميكانيكية فيها اقل و بالطبع انعم بكثير

و موجود في الالنترا الجديدة و الاكسنت الجديدة و الياريس و الكورولا الجديدة و السيريون و عربيات تانية كتير

[AbOnOrA]

كلمة الباور راجعة الىPower Assisted Steering

او نظام التوجية المؤاز
وده نظام الغرض منة تقديم المؤازرة لنظام التوجية فى تسهيلاً على قائد السيارة

والمؤازرة ديه بتبقى اما هيدوليكيا او كهربيا او ما يطلق عليه الباور الزيت (الهيدروليك) او الكهرباء

نظام التوجية المؤازر هيدروليكيا
Hydraulic Power-Assisted Steering

الباور الزيت بيشتغل زى اى نظام هيدروليكى يعنى طرمبة زيت ومواسير وخزان زيت كل ده شغلتة ان يوصل الزيت لضغط يخلية يدى دفعة لمجموعةالتوجية بالاضافة للقوة زراع السائق

مشاكل المؤازرة الهيدروليكى
زى ما قولنا ان النظام ده بيعتمد على طرمبة بتضغط الزيت والطرمبة ديه بتاخد القوة المحركة بتاعتها من الموتور وده معناة انها بتأثر على قوة الموتور وبتنقص منها (زى التكييف وان كان اقل طبعا)

الحاجة التانية قوة المؤازرة صعب التحكم فيها بالزيادة او النقصان (وده معناة انها مع زيادة وزن السيارة مش هتبقى كفاية ومع سرعة السيارة هتبقى زيادة عن الازم والدريكسيون يبقى خفيف

طبعا المشكلة ديه اخترعولها سينسورات بردوا تحس بوزن العربية وسرعتها لاكن اجمالا برده ادائها مش سهل ظبطة ومش ممكن اعادة برمجتة

كمان بيحتاج صيانة زى اى نظام هيدوليكى من تغيير زيت والكشف عليه وصيانة واستبدال الاويل سيل والسير الرابط بينه وبين الموتور الخ الخ

واخيرا اعازنا الله واياكم كان ممكن يحصل ان الموتور يبطل والعربية دايرة لاى سبب او ان السير يتقطع وساعتها تبقى العربية ماشية مع نفسها وانت وظروفك وده طبعا كارثة

بصراحة نظام فاشل فى راى الشخصى وانا وناس كتير بتفضل عدم وجود باور هيدروليكى والعربية تبقى تقيلة شوية لاكن ادق فى التوجية عن وجوده ومشاكلة وصيانتة وافتقادة للدقة فى التوجية

(على فكره عربيتى مفيهاش باور وان كان متوفر ليها وممكن اركبة بس بجد العربية فى اسوء ظروفها ولو الزوايا كلها داخله فى بعض واحيانا كنت بسوقها وعلبة الدريكسيون مكسورة اساسا وكانت تتساق لاكن مع وجود الباور الهايدروليك انسى )

نرجع للنظام التانى

Electric Power-Assisted Steering
نظام التوجية المؤازر كهربياً
EPAS

وده قصة تانية خالص واتعمل علشان يتفادى عيوب النظام الاول للاسباب التالية

1- لا يعتمد على المحرك وبياخد قوتة من البطارية

2- استفاد من احدث التقنيات الخاصة بالسينسورز فى الباور العادى ومدمج فيه سينسورز اكثر دقة للتحكم فيه

3- مدمج الكترونيا بوحدة التحكم بالمحرك ECU واحيانا مدمج نظم الامان الاخرى ESP مثلا للعمل كمنظومة مدارة برمجيا وبالتالى اكثر دقة ويمكن اعادة ظبطها او برمجتها واحيانا ممكن تتظبط او حتى تتقفل خالص للاغراض الرياضية

فعلشان كده تلاقى ان الباور الكهرباء انعم وادق ومش محتاج صيانة خالص تقريبا بس طبعا اكثر تعقيدا ومكوناتة اكثر كلفة

اخيرا هيونداى بدئت تنزل الباور الكهرباء فى كل موديلاتها بداء من النيو اكسنت

[en_shreef]

المشاركة الأصلية كتبت بواسطة Ahmed Anwer يمكن يا جماعة قصده مفهاش باور كهربا زي بتاع الالنترا الجديدة و النيو اكسنت و الياريس لكن اكيد فيها باور زيت

ياريت تقولى الفرق بين باور الزيت وباور الكهربا؟

[en_shreef]

متشكر جدا جدا على المعلومات القيمة دى.
ممكن يكون عندى فى العربية باور زيت أنا حكشف عليه عشان أتأكد.
لأنه فعلا وحش جداً جداً، لو العربية واقفة بيكون تحريكة صعب أوى
وأصحابى وهما راكبين معايا بيحسوا بالمعاناة اللى بشوفها مع الدركسيون.
بس لما تكون العربية متحركة بيكون خفيف