اغيثونا يا ولاد البندر فى جوان وش السلندر

[AbOnOrA]

الجزء التانى : عذاب التلات ايام

يوم الحل العظيم
يوم قطع الغيار
يوم الحساب


يوم الحل العظيم

زى ما قولتلكم قبل كدة خدت قرارى خلاص وبدات اخلص مشاويرى وافضى نفسى لليوم اللى هاخد فيه العربيه اوديها وطبعاً العربيه كانت مركونة قبلها فترة فكانت (متسخة) جداً من بره ومن جوة كانها بقالها شهر مرمية فى الشارع المهم اخدتها على الحالة ديه بعد تزويد المية وشوية زيت علشان احاول اتفادى حللان الزيت او سخونة وقفش لا قدر الله ومشيت كدة واحدة واحدة لحد المركز وانتو عارفين القاهرة كانت عاملة ازاى التلات ايام اللى قبل العيد دول وزحمة الشوارع والقلق والزغلله من كتر البص على العدادات لحد ما وصلت هناك كانت الساعة 1 الظهر تقريباً عقبال ما سبنا العربيه تبرد واتغدينا بداء حل المكنة على الساعة 2 العصر خلص حل على الساعة 2 بليل !!

تخيل معايا كدة 12 ساعة بالتمام والكمال واقف على رجلك فى الشارع - لان الورشة مكانش فيها مكان للعربيه - ومع ميكانيكى ممعاهوش مساعد فتضطر انت تشتغله بليه ومع كل ساعة بتعدى بتتأكد اكتر انه ملوش فيها بس بعد ايه بقى

بقيت اكلم نفسى والله طب يعنى لو معرفش يجمعها هعمل ايه يعنى هعمل ايه يعنى هجمعها انا يا اجيب ميكانيكى تانى يجمعها وهتبقى شغلانة منيله بس قول يارب يعرف يكمل فك اصلاً
خاصة اننا جينا فى نص اليوم وعطلنا على فك مسمار الطمبورة

وطبعاً الطنمبورة زى اى طمبورة فى الدنيا كائن متحرك فانت علشان تفك مسمار من اى شىء متحرك لازم تثبت امه الاول وبعدين لما تأرط على المسمار فى اتجاة حله يتحل غير كدة هيلف ويلف معاه الطنمبورة بديهيات ديه يعنى

صاحبنا ده يجى يحله ميعرفش يقوم يقعد يتسلى على اى حاجة حاجة تانية ويرجعله تانى ميتحلش والمصيبة بيجرب طرق يستحق عليها الاعدام رميا بالرصاص وديه المصيبة الاكبر اللى لازم تخليك تقف على ايد الصنايعيى ووقت اللزوم تدخل والا هتحصل مصايب بجد

صاحبنا كان بيجرب اولاً يستخدم تكة المارش وانت بتدور بحيث تلف الطمبورة وشابك فيها مفتاح يقوم يلف يرزع فى فردة الشاسية فقال ايه كدة يتحل !!

يعنى علشان يحل المسمار هيبوظ اساسيات العربيه والمارش وارد ده على اقل تقدير

فين وفين لما اقتنع بعد محاولات برضو انها طريقة فاشلة فكان الحل التانى عندة يسخن على المسمار بلمبة اللحام
انا بقى اول ما شوفت لمبة اللحام داخلة جوة حوض العربية بقيت عايز اقتله وادفنه تحت الكبوت واخلص لكن كل اللى حواليا ومنهم صديقى صاحب المركز كانو بيتعاملو معايا كانى كائن خرافى جاى من كوكب تانى ومش فاهم اى حاجة عن علوم الميكانيكا الارضية الحديثة
وهنا بدات ازمجر او بالاحرى اعيط واقول مش لاعب
خلاص يا عم الحج فضنا سيرة ولم المكنة تانى .. ده انا
ايه
ازاى .. ده هما
زى الناس يا جماعة محدش يقنعنى ان ده كدة صح الليل دخل علينا - 6 ساعات - ومش عارفين نحل المكنة يبقى على الاقل نحاول نركبها علشان كدة يادوب 6 ساعات كمان نقفلها والحق اروح
كلمة من هنا كلمة من هناك الدنيا اتلمت طلع واد ((سمكرى)) ابن حلال فهم اللى بقوله وعلى نور الموبايلات علشان البلادوس كان مكسور قدرنا نشوف مكان مسامرين فى الطنبورة ركبنا فيهم مسامرين طوال واستخدمناهم لتثبيت الطنمبورة وتك تك اتحل المسمار عادى جداً

كده خلاص كام مسمار ويتحل الوش وتيجى لحظة الحقيقة واعرف ياترى الوش سليم كمان ولا قفع واتطمن على المكنة من جوة واسلم على البساتم بستم بستم الى اخرة من تقاليد عريقة كل اللى حل مكنة عارفها

وكان الاهم بالنسبالى كمان انى اعرف السبب اللى ورا سخونة العربيه لانى متاكد انه مش عيب استخدام وان فيه حاجة هى السبب ومش عايز احل واركب جوان وارجع الاقى المشكلة تانى

اثناء الحل كنت واخد بالى ان فيه اثار مية عمالة تنزل من المكنة وطبعاً احنا حلينا الريداتير وقربة المية ونزلنا المية كلها طب جاية منين المية ديه فك يا جدع حل يا جدع لحد ما ظهر الاتى

- مشترك مية
- طلمبة مية
- جوان

غير كدة الوش سليم وكله تمام بس ده كانت الساعة بقت 2 بليل وبالتالى بكرة وعليك خير بقى تروح تجيب قطع الغيار وتيجى نركب

ملخص اليوم

* طلعت بقائمة المشتبه فيهم الاولى وهى مشترك المية والطلمبة والجوان

* اطمنت على الموتور نفسه عموماً والوش بالاخص

* زاد حبى واحترام للصانع والمصمم اليابانى يمكن مع بعض التحفظات بس فى المجمل الدنيا اسهل واقل لعبكة بكتير من الاوروبى ومن حيث المتانة افضل بكتير من الكورى ولا مقارنة مع دون ذلك

* اتاكدت ان الميكانيكى محتاج معجزة علشان يعرف يجمع المكنة تانى وانهارت ثقتى فيه تماماً


شوية نصائح بقى للى لا قدر الله يتحط فى ظروف مشابهه

* طبعاً من الناحية الفنية لو معندكش استعداد تقعد تقاوح مع الصنايعيى وتابع شغلة وتدخل وقت اللزوم يبقى حط العربيه فى مكان ثقة اكتر وسيبها روح وتابع بالتليفون

* غير كدة البس لبس شقى وشبب لا حاجة مريحة للقدم واستعد لوقفة تتأمل فيها وقوفنا جميعاً يوم الحشر ربنا يهون ويسلم يارب

* لو مش هتاخد سنتدوتشاتك وترموس معاك اعمل حسابك فى مبلغ كويس لمصاريف الاقامة عند عمو الميكانيكى وديه تشمل سجاير واكل ونثريات هتجمع معاك رقم حلو اخر اليوم برضو

* خلى عينك على حاجة عربيتك كل مسمار يتفك كل صامولة كل حاجة مهمة جداُ ولو صنايعى اهمل وضيعها انت اللى هتعانى والمشكلة فى التوكيلات والمراكز الكبيرة ده بيحصل برضو وبتضيع حاجات من العربيه وبتستلمها عادى ومبتعرفش لكن فى الورش بيبقى فيه فرصة تتدخل فخدبالك واتدخل بنفسك ونظم الدنيا لو مش متنظمة وشيل الحاجات بنفسك ويستحسن كل حاجة تتفك تتجمع فى العربيه نفسها انا عامل العربيه كمان جلد فبقيت اجمع كل حاجة فيها مية فيها زيت مش مهم المهم الحاجة متتنطورش جوة الورشة او فوق العربيه

* لو الشغل اللى هيتعمل فى العربيه هياخد اكتر من يوم او فيه احتمال تبات اتفق من الاول مع صاحب الورشة العربيه هتبات فين وازاى علشان متصدمش زيي ان عربيتك هتبات فى الشارع 3 ايام

وفى اخر اليوم قفلت العربيه والمكنة محلولة فيها من غير سنترلوك مانيوال كدة من جوة وبالمفتاح واستودعتها الله فى الشارع ومشيت على البيت الحق احط رجلى فى حله مية وملح بتغلى على امل تفك من تخشيبة الوقفة طول النهار وانزل تانى يوم اعيش يوم شراء قطع الغيار خاصة انى كنت عايز اخد فكرة كاملة عن قطع الغيار بتاعتها اكمل بيها التقرير واشوف التجار اخبارهم ايه وده اللى هحكيه فى الجزء التانى ان شاء الله

ابكو معنا

[AbOnOrA]

[momen_bondok]

كان الله فى العون أبانوره انا تعرضت لموقع مشابه مع صنيعى الله يسامحة كان مستعجل لانه كان يوم السبت وكانت الساعة 11 بالليل بالرغم من انى عندة من 12 ظهرا وقفل الوش اى كلام فالنتيجة المكنة جابت جوان وش تانى بعد اسبوع
حسبنا الله ونعم الوكيل فى كل صنايعى معدوم الضمير من قال لا اعلم فقد أفتى لكن ازاى
مُتابع بإهتمام

[Hisham.Elgazzar]

ماشاء الله موضوع جميل فين الجوان الصاج الأصلى يادكتور ؟؟؟؟؟؟؟؟؟؟؟؟؟
الجوان الجرنجريد ميأكلش عيش

قوللى بقى قفل ع الجوان بسيليكون عشان اقوم اخبط دماغى ف الحيطة

[zing0]

فى مصر الفهلوة: دّور عالصنايعى قبل متّدور عالعربية
أنا بأضطر أروح مشوار من المعادى للوراق علشان الصنايعى, رغم إن اللادا أى صبى ميكانيكى ممكن يقولك أصلحها, بس الحقيقى إنه لسه بيتعلم فيك و يدوخك و يجرب فيك و كل المشاريب على حساب الزبون.
أعانك الله يا أبو نورا, و يا رب زوبه تبقى أحسن من الأول