فيرناو سيينا او لانوس

[POP EL GAMED]

المشاركة الأصلية كتبت بواسطة يحيي معلش يعني دايو توكيلها لسه شغال يعني مش معقول اجيب عربيه ولما اعوذ اصينها اوديها للميكانيكي مش للتوكيل وبعدين هو كده مش حينزل منه موديلات جديده وبعدين محدش رد عليا بخصوص السيينا اصل احب اعرف ليه هيه وحشه

يا سيدى الفاصل انت عشان تشترى عربيه زيرو لازم يبقى ليها ضمان وتوكيل
التوكيل شغال زى ما هو لغايه ما يخلص كميه العربيات اللى عنده هيقفل كتوكيل بس مراكز الخدمه اللى تبعه مش هتبطل شغل فى العربيه فهمت قصدى يا باشا؟؟؟
وبالنسبه للموديلات الجديده من اللانوس هى كده كده بقالها 8 سنين شكلها متغيرش يعنى مش فارقه موديل جديد من موديل قديم ونفس القصه مع الفيرنا اللى هى برضه نفس الشكل بقالها 3 سنين ومعتقدش ان شكلها هيتغير(اى استفسارات او اى حاجه مش واضحه؟؟؟)
وبالنسبه للسينا انا بقولك انها كويسه جدا
انما عيبها الوحيد ان صيانتها مبتتعملش غير فى التوكيل مش اى ميكانيكى بيشتغل فيها
(مش زى الفيرنا ولا اللانوس)
وبرضه مش كل قطع غيارها موجوده بره التوكيل لازم تبقى اصلى وعشان كده هى غاليه
العربيه سعرها كويس وقطع غيارها هى اللى مخلياها مش منتشره فى مصر
وانا موجود لو فيه اى استفسارات تانيه
(على فكره توكيل فيات هو اوماترا وفيه شو روم ليهم فى ميدان الدقى الصف التانى من شارع وزاره الزراعه هتلاقى عندهم كل الموديلات الجديده)

[يحيي]

ممكن احصل علي مقارنه بين ال3 سيارات في الكفاءه والامان والثبات والسخونه و العمليه في الاداء والتوكيل لكل منهم وقطع الغيار والرأي الشخصي معلش حتعبكم معايا

[POP EL GAMED]

المشاركة الأصلية كتبت بواسطة يحيي ممكن احصل علي مقارنه بين ال3 سيارات في الكفاءه والامان والثبات والسخونه و العمليه في الاداء والتوكيل لكل منهم وقطع الغيار والرأي الشخصي معلش حتعبكم معايا

انا ممكن اعملك مقارنه سريعه مش بالارقام وكده بس هى ممكن تفيدك(لان التلاته متقاربين جدا)
بالنسبه للمواتير
الفيرنا:1500cc وجسم العربيه خفيف جدا على الموتور عشان كده بتعبتر عربيه تسارعها عالى جدا
اللانوس:1500cc جسم العربيه اتقل من الفيرنا عشان كده هى اضعف فى التسارع واثبت من الفيرنا على السرعات العاليه
السينا:1500cc مجربتش ال2008 بس الوحيد اللى اعرفه ومعاه العربيه دى والد واحد صاحبى صاحبى بيركبها احيانا بيقولى انها تسارعها كويس والموتور محترم ومكفى كل احتياجات العربيه
بالنسبه للشكل والصاج الخارجى:
الفيرنا صاجها زى اللانوس بس يمكن بيطبق اسرع عشان خطوطها حاده
اللانوس صاجها كويس وعن نفسى انا بفضل شكلها عن الفيرنا
السينا صاجها متوسط وشكلها الجديده حلو جدا جدا(عاجبنى)فى المتوسط تقدر تقول ان التلاته نفس الصاج
بالنسبه للكماليات كلهم زى بعض
الا ان فيه تعليق اولا ان السينا زجاج كهربا امامى وخلفى اكر
والحاجه التانيه هى ان تكييف اللانوس والفيرنا اقوى من السينا(لانهم كورى وده طبعا معروف)
وبالنسبه للامان
الفيرنا فراملها اقوى من اللانوس وعفشتها اخشن من اللانوس
اللانوس عيبها الوحيد ان فراملها ضعيفه(مش اوى يعنى)
السيينا اكصداماتها مدعمه بفولاز وعفشتها ناشفه شويه وعاليه وده مناسب للطرق المصريه
اسعار قطع الغيار قلتلك اغلاهم هى السينا يليها الفيرنا وارخصهم هى اللانوس
الصيانه برضه اصعبهم السينا وبعدها الفيرنا وبعدهم اللانوس
وبالنسبه للانتشار نفس الكلام برضه بنفس الترتيب
ارجو انى اكون افدتك

[يحيي]

شكرا جزيلا يا بوب انا تعبتك معايا خالص سؤال اخير هيا السيينا تجميع فين ولو معاك رقم تليفون التوكيل بتاعهم
واخيرا وليس اخرا لو حتختار بين ال3 تختار ايهم

[POP EL GAMED]

السينا تجميع صينى
التوكيل هو اوماترا مع الاسف رقمهم مش معايا بس انت ممكن تكلم الدليل تاخده منهم(انا معاييش عربيه فيات من عندهم دول اصحابى)
بالنسبه للاختيار فأنا عن نفسى اختار اللانوس
منتشره جدا واى ميكانيكى شغال فيها وقطع غيارها تعتبر زى ال128
وفى نفس الوقت كويسه وناعمه(فى ناس بتقول ان شكلها متغيرش وان ده عيب فيها دى مش وجهه نظرى)
لو موضوع الشكل ميفرقش معاك يبقى اعتقد ان انسب حاجه هى اللانوس
وكفايه انها مش هتبقى من غبور وعلى رأى المثل(يغور اللى جاى من غبور)
وفيه نقطه نسيت اقولك عليها:
اللانوس كعربيه فهى محافظه جدا على سعرها فى اعاده البيع
يليها الفيرنا
ومقتوله فى سعر البيع السينا(كان معروض عليا واحده موديل 2006 ب51 الف فابريكه بره وجوه)
فى حين انه اتعرض عليا لانوس 2005 ب55 الف
شوف انت بقى