رابطة ملاك ومحبى السفينه فيات 132

[mOuStaFa_ERTU]

المشاركة الأصلية كتبت بواسطة michohat شكرا يا مصطفى بالنسبة للسويدي هل السلك ده له اسم معين من ضمن منتجات السويدي يعني اقول للبائع عاوز سلك سماعات ( على طول هيديني الاسود في احمر ) ولا اقول له سلك السويدي كذا

لاء يا مجدى الاسود والاحمر ده مش سويدى والوسيدى معنوش اسلاك لازقه فى بعض كل منتجاته مفرد بس
لو عندك كهربائى نظيف قوله انا عايز سلك يكون شعر 2 ميللى عشان هقوم بيه سيستم صوت بتاع حفلات والسلوك هتبقى ماشيه جوه الحيط ( عشان يجيبلك حاجه حلوه ) وفهمه ان مش هينفع السلك يتغير

وعموما انا لما ارجع من الشغل هسأل انا على السلك واديك الكود بتاعه والاكواد دى ثابته
ودى اسهل طريقه بقه

[Mohamed star&h]

لو سمحتو عاوز اظبط العربيه من بره يعنى (اعملها فينش وكده) ايه الحاجات اللى ممكن اركبها لها 132 فضى

[محمدصلاح القاضى]

المشاركة الأصلية كتبت بواسطة Mohamed star&h لو سمحتو عاوز اظبط العربيه من بره يعنى (اعملها فينش وكده) ايه الحاجات اللى ممكن اركبها لها 132 فضى

عشان تعمل اى حاجه
لازم الاول تكون البويا تمام وزى الفل
لو تمام يبقى توكل على الله
هتعمل
1/ هتلمع العربيه بالكمباوند عند ايمن الروبى
2/ طقم جرايد الابواب بتاع ال 2000
3/ طقم دلايات شيك للرفارف
4/ هتعمل كلمة 2000 او 1600 حسب سعه الموتور عند اى حد بتاع كماليات
5/ ممكن تكتب شويه كلمات بالانجليزى على الازاز اللى ورا
6/ طبعا لو مركب جنط المروحه ممكن تجيب له طقم نواكل
7/ حاجات تانيه كتييييييييييييييير

[Mohamed Rashedy]

رجالة الرابطة الجامدين اوى .. ايه اخباركم
كنت عايز اعمل دوكو وسمكرة للعربيه بس ارجعها فابريكة .. فكنت عايز اعرف ممكن تكلفنى كام من الالف للياء من غير ما اغير فى الصاج

[mOuStaFa_ERTU]

السلام عليكم ورحمة الله وبركاتة
اولا : احب ابدأ بشكر خاص ل (هشام الجزار) لما بذله من جهد وتعب عشان عربيتى تتظبط
اما بعد ...

امس كنت على موعد مع هشام عشان اروحله التجمع الاول لتظبيط التاكيهات
المهم نزلت من البيت وفولت العربية وشقيت طريقى الى الحى العاشر بمدينة نصر واتقابلت معاه وطلعنا على بتاع قطع الغيار واشترينا الاتى:
1- فلتر هواء عشان افلتر القديم اتهرى
2- طقم سلوك بوجيهات جرافيت (كربون)
3- طقم بوجيهات
4- جوانين بتوع الكامه عشان كانوا بيرشحوا زيت
5- وش اسبراتير جديد + شاكوش
6- انبوبه سيلكون ولم تستخدم
7- مش فاكر بس لو افتكرت هقول على طول

ودينا العربية لبتاع التاكيهات وهى ورشه مجمعه وشامله فيها كل حاجه
يعنى كل ما يخص الموتور من ال أ الى ال ى
المهم ركنت العربية امام الورشه عشان تبرد وابتدينا شغل
وتم تغير 4 اطباق عشان كان عندى فرح جوه الموتور وركبت الجوانين والدنيا اتظبطت عن الاول وحاسبنا الراجل وخد 40ج مصنعية + ثمن الاطباق ومشينا من عنده وطلعنا على مغسله وغسلنا الموتور بالجاز والصابون والبنزين وبقه نظيف والحمد لله
غسيل الموتور ب 10ج وطبعا ده سعر غالى انا بغسل العربية كلها فى بنزينه وطنية ب 25ج
بره وشاسية وصالون وموتور.

وطلعنا على بيت هشام وركنت العربية فى الظل وتم تغير الاتى:
1- وش الاسبراتير
2- الشاكوش
3- البوجيهات
4- سلك البوجيهات
وهشام ظبط كهربت الموتور وبقت والحمد لله اللهم لا حسد زى الفل ومفيش رجه فى السلانسيه
الاول طبعا كان فيه فرقه حسب الله تحت الكبوت
بس دلوقتى بقت زى الفل والسحب اتحسن والفضل لله اولا ولخبره هشام وتعبه معايا

وبكده انتهت صيانة الموتور وفاضل العفشة والفرامل والسمكرة والدوكو و 4 فرد كاوتش جداد
وان شاء الله ربنا يكرم بفلوس واخلص من شدها بالكامل
والله الموفق ودعواتكم بقه لاخوكم
والسلام عليكم ورحمة الله

تحياتى الخاصة ل (هـشــ الجـزار ـــام)