كل الرجالة اللي في المنتدي تدخل ضروري - سواقة ستات

[sad-bird]

السلام عليكم
كل سنة وانتم طيبين
الموضوع قديم شوية بس بما اني حديث العهد في المنتدي قريته النهاردة
بعيدا عن كل التعليقات اللي اتقالت في الموضوع منا الكويس ومنها السيء ومنها المفيد ومنها بدافع التهريج والتخفيف في جو الموضوع ، وعلى قد ما اقدر هقول اللي اعرفه او اقدر افيد بيه ومعلش بقى استحملوني شوية والكلام موجه للطرفين ذكور واناث ومن غير زعل من اي حد

بسم الله نبدأ
اولا : المشكلة مش في راجل او ست المشكلة في حد بيعرف يتصرف على الطريق ويقدر يتعامل مع العربية والاتنين من وجهة نظري على نفس الدرجة ولكن لان عندنا بنخلي الستات ترتاح شوية من باب الذوق والادب والاتيكيتي ولان مفيش ممارسة ليهم كتير فبالتالي بيكون قيادتهم فيها مشكله شوية لكن مش كلهم طبعا وبرضة نفس الكلام بالنسبة للرجالة في رجالة كتير سواقتهم اكتر من الزفت بشويتين تلاته يعني رانيا علواني مثلا لما طلعت اول سباحة في العالم لانها واحده بنت كانت بتدرب كتير اكتر من زمايلها الولاد علشان تثبت نفسها وقد كانت ، والواد ميمي اللي باب جابله عربية اخر موديل السنة دي بمناسبة انه تم 18 سنة واخدها بيتنطط بيها في الشارع وفرحان بيها كلاكسات ومعاكسات واكل مطبات وجري وفرك وتخميس واهو ولد او شاب ومع ذلك سواقته زفت


ثانيا : الحصول على رخصة القيادة ، النهاردة رخصة القيادة ادفع 1000 وخد الرخصة في ايدك وانت واقف او شوف حد معرفه والرخصة تجيلك لحد البيت ودي اكبر غلطه انك تدي رخصة لواحد انت متعرفش اذا كان بيسوق كويس والا لأ او بيسوق كويس لكن متهور وبرة في الدول اللي بتحترم كرامة الانسان عندهم وفيه نظام الرخصة بتدخل لها امتحان والامتحان موضوعي ( يعني اللي ليك واللي عليك بدون تهويل ولا اجحاف ) ولو دخلت الامتحان وسقطت فيه مينفعش تدخل غير بعد فترة تانية على حسب الدولة من 3 شهور لسنة وطبعا ده مش معمول بيه عندنا
والكلام ده على الامتحان لاي حد سواء داخل يمتحن وياخد الرخصة او داخل تبع مردسة المرور وانا شوفت اللي ادخلين يمتحنوا فعلا من غير المدرسة طلع عينهم في الامتحان واغلبهم سقط لكن اللي دخل تبع المدرسة كله كان بيعدي بيسوق كويس بيسوق وحش كله بيعدي
لكن شهادة حق انا سمعت ان فيه مدرسة في غمرة تبع النصر للسيارات وبيدوا فيها فعلا دروس الميكانيكا والكهرباء والاشارات والعربية لو حصلها حاجة تتصرف ازاي لغايه لما توصل لاقرب مكان للصيانه، وبيعملوا تدريب عملي لفترة طويلة وانت لو لقيت نفسك او المدرب بتاعك لو لقاك محتاج تدريب اكتر بتطلب عدد ساعات اكتر وبتكمل ترديب معاهم وبيبدأ التدريب بتاعهم في مساكن الشروق ورا النادي الاهلي لغاية لما تعرف تسوق وبعدها يتحرك بيك في الشوارع
الكلام ده كان من 6 سنوات تقريبا معرفش الوضع ايه دلوقتي

ثالثا : قواعد المرور واشارات المرور ودي موجوده في كتب تعليم القيادة فيه منها اشارات دولية وفيه منها اشارات محليه والدولية معروفة ( رمز مستشفي ، رمز مطار ، رمز طري فرعي ، رمز طريق داخل عليك ، رمز منحدر لاعلى ، رمز منحدر لاسفل ................. إلى اخر قائمة الاشارات الدولية ) والاشارات المحلية غالبا بتكون تعريف الطريق ( طريق رقم كذا ، حد المنطقة كذا ، مسافات واتجاهاات الطريق ... إلخ )

رابعا اشارات العربية نفسها واستخدامها يعني فيه تعليق واحد كان بيقول الاشارة على يمين الدركسيون لفوق تبقي يمين لتحت تبقى شمال لكن لو العربية حديثة جدا مو الموديلات السوبر لو عاوز يمين بتدوس على زرار في الدركسيون وكذلك لو عاوز شمال وتيجي تقول كده لواحده هتتلخبط وتقف وتقعد تدور على الحاجة فين
لذلك لابد من التدريب والتدريب والتدريب والتدريب والتدريب على كل حاجة في العربية مينفعش اركب وادور المفتاح وادوس بنزين وامشي فين الاشارات الي بعرف الناس برة في الشارع انا ماشي ازاي، فين ناقل الحركة ( الفتيس والدبرياج ) وامتى انقل وليه

................ يتبع

[sad-bird]

وعلى بركة الله نكمل

قلنا العربية نعرف كل حاجة عنها كل كبيرة وصغيرة عنها ولو مش عربيتي مركبهاش الا لو عرفت اللي فيها ايه ( ركبت مرة عربية ابن خالتي وكان عامل انزار فيها على الكونتاك معرفش عمله ازاي والساعه 2 صباحا جيت ادور الشارع كله اتقلب عليا في الاول فاكرني حرامي وبعد كده كله فضل يشتم فيا ) انا بقول مثال لكن كل واحد وله ظروفه

1. قبل ما ادور العربية بشوف الزيت لو ناقص بعرف وبعدي على بتاع الزيت يزود او لو عندي زيت وبعرف ازود بزود ، لو الزيت وسخ بروح لبتاع الزيت اغيره وطبعا الكلام ده مش في لحظتها لكن علشان اكون عارف وواخد بالي يعني مينفعش اروح مشوار سفر وانا الزيت في العربية ناقص او متهالك، لو الزيت مدي لون طحيني يبقى العربية خلطت زيت على مياه يبقى دي عاوزة تروح للميكانيكي باسرع ما يمكن علشان كده ضربت جوان وعاوز يتغير علشان الموضوع مش يزيد ( يعني ياه خلطت زيت على مياه) العربية فيها دورتين تبريد واحده بالزيت وواحده بالمية والاتنين بيفصل بينهم جوان الجوان ده لو اتاكل او ساح الزيت بيخلط على المياه وبتبقى خلطبيته ولازم الجوان يتغير

2. بشوف المية في العربية ( العريبات الحديثة مش محتاحه تكشف على المية لان فيها مكثف بيحافظ على الميه فيه واصحاب الحديث يفيدونا اكتر في الموضوع ده انا بتكلم لان كان عندنا 504 ودي اللي عارفها وماس في فئتها) لو مستوي المية ناقص والعربية باردة خالص يعني انا صاحي الصبح والعربية من بالليل ممكن ازود المية في الراداتير لو العربية كانت سخنه يبقى بدور العربية وبعد لما تدور بزود المية بالتدريج ( فيه عربيات فيه قربه ججنب قربة المساحات دي بتاعت تزويد المية في الرادياتير ومبتعملش حاجة فيها انت بتحط مية وتسيبها والرادياتير بيسحب منها لو نقصت المية منه وتقريبا دي موجوده في الحديثة )

3. الوقود ، البترول ، البنزين او السولار او الغاز ( المادة المشتعله اللي بتولع دي واللي العربية من غيرها مش هتمشي ينفع تمشي انت من غير ما تاكل او من غير ما تشرب ، العربية كمان زيك كده ) وده ليه مؤشر في التابلوة بيقوله فيه قد ايه عند حرف f يبقى التانك مليان وعند حرف e يبقى التانك فاضي واغلب التانكات بتاعت الملاكي بتشيل صفحيتين يعني 40 لتر فيه اكتر من كده وعلى حسب رعبيتك انت عارف فيها ايه يعني اول لما التانك يعدي الربع الاخير يبقى انت محتاج تحط بنزين وكل واحد واستهلاكه وكل واحد واستهلاك عربية ( مينفعش واحد ظريف على اول اسكندرية الصحراوي مثلا التنك فيه 10 لتر ويقلو انا همشي كده لما اشوف هوصل فين لازم تحط بنزين في التانك علشان متجيش على الاخر والوراسب اللي في التانك تنزل في دورة الوقود وتبقى مشكلة والعربية تقطع علشان حضرتك مكسل تقف تمون بنزين وقلت استني لما امشي شوية واقف في الرست مرة واحده امون واريح

4. زيت الفرامل وده ليه لمبة في التابلوه بتقولك ان فيه مشكلة

5. زيت الفتيس

6. زوايا العربية علشان العربية مش تحدف منك يمين وشمال وتبقى مراجيح

7. المفروض اني عارف كل حاجة عن العربية لكن في حالات السفر لازم اتأكد من كل الاشارات وانوار العربية موجوده وشغالة لان مينفعش اركب واجي ادي اشاره يمين وانا داخل يمين فعلا والاشاره عندي في التابلوة بتقولي انت صح ووالاشارة ورا فاصلة واللي ورا يجي يلبس فيا واخد شتيمه للصبح وانا مش غلطان في الفعل الحالي لكني غلطان في الفعل الاصلي وهو الصيانه الدورية والمتابعه لاحوال العربية

8. التأكد من وجود معدات حالات الطواريء دايما ( وشية مفاتيح ومفكات وزرادية ، مفتاح الصليبة بتاع الكاوتش ، فردة الاستبن ودايمة اتأكد كل فترة ان الهواء فيها مظبوط ، طفاية حريق ، المثلث العاكس وده مش دعايه علشان قانون المرور الجديد ولا حاجة ده لان خالي رحمة الله عليه توفي حادثة لان الباشمهندس اللي سايق مكنش شايف ان فيه حد على الطريق جنب العربية

9. عند القيادة لابد من التحلي بالشجاعة والهدوء وليس البرود والحكمة والعقل ، مينفعش اكون متنرفز وانزل اسوق هتنرفز اكتر واحنا الشوارع ما شاء الله تنرفز بلد واكيد اكيد هفتكر الموقف اللي نرفزني وانا بسوق ومضمنش رد الفعل هيكون ايه لكن غالبا ممكن انفعل لتذكرالموقف مثلا وادوس بنزين اكتر من اللازم البس في اللي قدامي

10. مينفعش الكلام بوجه عام او الانفعال في الكلام مع حد معايا في العربية لاني تركيزي هيضيع بين السواقة وبين الكلام ( الكلام ده مع الكبار فما بالنا بالاطفال بقى واسكت يا واد واسكتي يا بت والرضعه والاكل وكده ايه ويابابا او يا ماما عاوز شاوف اللعبة دي واللي بيحصل انك تنتبه لكلام الطفل ووصحته ورغباته وتنسي الطريق

11. الموبايل ، اذا كان الكلام العادي بيشتت الواحد يبقى الموبايل بيعمل ايه انا بسوق وماسك الدركسيون بايد واحده ورجلي على الدبرياج والتانية على البنزين والفرامل وايدي التاينة مساكة الموبايل ومركز في الكلام ولو الشكبة تعبانه بعلي صوتي (وثبت علميا ان الصوت العالي بيأثر على التركيز في السواقة ) المهم اني بعمل الكلام ده كله في وقت واحد والمثل بيقول صاحب بالين كداب
بسم الله الرحمن الرحيم :"مَا جَعَلَ اللَّهُ لِرَجُلٍ مِنْ قَلْبَيْنِ فِي جَوْفِهِ " صدق الله العظيم

12. الانفعال على الطريق اياكم والانفعال واحد زنق عليا واحد كسر عليا .......... كل ده بينرفز والنرفزة لسه قايلين فوق بتعمل ايه

13. معرفة الطريق اللي عاوز اروحه علشان مش كل شوية اقف في نص الطريق واسأل سواق تاكسي او اي حد معدي واقوله اروح فين ويقعد يوصفلي واللي ورايا طابور يديني كلاكسات وفي الاخر ازعل ولو اضكرت لكده يبقى اما وانا واقف في اشارة يا اما اركن وأسأل ( وبمناسبة الركنة فيه اختراع اسمه اشارة انتظار بيغش الاشارات يمين وشمال وده بنلجأ أليه في حالة اننا هنقف او واقفين او مش عارفين الاتجاه علشان اللي ورايا يعمل حسابه ) الحاجة التاني اللي لازم اعرفها على الطريق الخدمات الموجوده عليه ( بنزين ، كاوتش ، صيانة ، اوناش جر ، خدمات الطريق .......... )

14. بداية القيادة ...................









...................يتبع

[adel omran]

كل عام وجميع الاعضاء بخير رمضان كريم

قياده النساء اصبحت واقع لا يمكن تغييره لكن من منطلق الخوف عليهم لا اكثر ارجو ان افيدهم بالاتى

1 - الاهتمام بمتابعه المرايا الخاصه بالسياره
2 - الاشارات
3 - نرك مسافه كافيه بينها وبين السيارات
4 - عدم الاقتراب بمقعد السائق من الدركسيون و بخاصه فى السيارات المزوده بكيس هواء
5 - عدم التردد على الطريق
6 - الالتزام بسرعه الطريق وعدم تجاوزها
7 - الاحتراس من سائقى النقل والميكروباص وخصوصا على الطرق السريعه
8- فى حاله وجود اطفال بالسياره يمكن وضع لافتات داله على ذلك child on board
9 - الالتزام بالحاره المروريه


واخيرا

على كل من يستخدم سياره سواء كان رجلا او امراه تذكروا دائما انه هناك من ينتظركم من احبائكم او ابنائكم او ابائكم فحاولو العوده سالمين

وشكرا لكم

[sad-bird]

وده رابط لموضوع يخص اللي بنتكلم فيه النهاردة ود خاص باختبار المرور النظري
http://www.masrmotors.com/vb/showthread.php?t=21605

[sad-bird]

المشاركة الأصلية كتبت بواسطة adel omran كل عام وجميع الاعضاء بخير رمضان كريم قياده النساء اصبحت واقع لا يمكن تغييره لكن من منطلق الخوف عليهم لا اكثر ارجو ان افيدهم بالاتى 1 - الاهتمام بمتابعه المرايا الخاصه بالسياره 2 - الاشارات 3 - نرك مسافه كافيه بينها وبين السيارات 4 - عدم الاقتراب بمقعد السائق من الدركسيون و بخاصه فى السيارات المزوده بكيس هواء 5 - عدم التردد على الطريق 6 - الالتزام بسرعه الطريق وعدم تجاوزها 7 - الاحتراس من سائقى النقل والميكروباص وخصوصا على الطرق السريعه 8- فى حاله وجود اطفال بالسياره يمكن وضع لافتات داله على ذلك child on board 9 - الالتزام بالحاره المروريه واخيرا على كل من يستخدم سياره سواء كان رجلا او امراه تذكروا دائما انه هناك من ينتظركم من احبائكم او ابنائكم او ابائكم فحاولو العوده سالمين وشكرا لكم

تسلم ايدك يا استاذ عادل