مذكراتى ايام الثورة موضوع مميز جدااا وياريت كل واحد يكتب مذكراته او المواقف اللى حصلتله

[sayed2077]

بعد ما عدى يوم 28 بكل صعوبة زى ما حكيتلكم

جه يوم 29 يناير والى كان اشد صعوبة من يوم 28 بالنسبه ليا وهنعرف بعدين ايه سبب صعوبته

صحيت يوم 29 يناير الصبح بدر جدى على انقطاع التيار الكهربى فى الشارع كله فى دار السلام عندنا مع العلم ان التيار الكهربى كان موجود بس الكابل الارضى ضرب فبقى فولت الكهربا 360 فولت ولو جيت تولع لمبة نيون تلاقى الترانس بتاعها بيزمجر كدا بصوت عالى ولو ولعت لمبة 100 وات تلاقيها نورها ضهر بمعنى الكلمه وبالتالى مكناش قادرين نشغل اى تلاجه ولا تلفزيون ولا حتى كان فيه ماية لان فى دار السلام المايه شغالة بمواتير المياه وطبعا علشان النور كان عالى فبالتالى الماتور ما كناش بنشغله وبالتالى مكنش فيه مياه خالص المهم ديه كانت اول مشكله تانى مشكله كان لازم انزل اجيب جنازير وقفل وانسخ مفاتيح للبيت كله علشان نقفل الباب بالقفل

ثالث مشكلة والاهم اننا كنا لازم نعمل استوك اكل لاننا كنا ساعتها منعرفش الازمه ديه هتستمر اد ايه وساعتها كان الجميع فى لخبطه فظيعه كله كان فاكر ان ديه النهاية وان خلاص كده كل حاجه راحت ومصر هتبقى زى العراق او اليمن ومفيش قانون ولا فيه بيع ولا شرا ولا اى حاجه
وبصراحه مخبيش عليكم ساعتها كان اخر الشهر والقبض كان بيتم بالفيزا و طبعا مكنش فيه ولا مكنه صراف الى موجوده فى الشارع و كمان مكنش البنوك فاتحه وحتى الاستوك بتاع الاكل بتاع الشهر كان قارب على النفاذ لاننا فى اخر الشهر خلاص والمفروض بنجيب الاستوك بتاع الشهر فى كل اول شهر فالحالة كانت كحرته على الاخر والفلوس كانت على الاد بالظبط
المهم نصحتهم يشتروا اكبر كمية ارز يقدروا عليها لان اول حاجه سعره رخيص وتانى حاجه كوز الرز واحد هيقدر يكفى وجبة غداء يوم كامل
(كان لازم نسستم نفسنا على الوضع الجديد والا مكنش حد عارف ايه الجديد فى الامور ولا هيحصل ايه )

وبصراحه كلنا كان عندنا قناعه تامه بالحال الجديد ده وكان فى الثلاجه اخر ستوك لحوم سوسيس و كبده فقط

وكانت وجبة الغداء عبارة عن طبق ارز ابيض بلدى بدون شعرية بدون اى اضافات مع قطعه واحده سوسيس فقط

هههههههههههههه اه والله زى ما بقولكم كدا وفعلا الحمد لله بقى كل ما يبقى الوالده عامله لنا سوسيس و برجر وكدا و بيبقى الحله على ماليانه على اخرها والبرجر على اخره و فينوا كومبوا ومايونيز وكاتشب و طماطم كل ما اضحك على ايام ما كان الغداء عبارة عن طبق ارز و قطعه واحده سوسيس ههههههههههههههههههههههه
المهم نزلنا ساعتها السوق نجيب خضروات وارز زى ما انتم عارفين وافاجاء بان واحده رايحه السوق فايد شايله شنطة السوق والايد التانية شايله خشبه ههههههههههههههههه
وواحده رايحه السوق فايد شنطة السوق وفالايد التانية معاها شومة ههههههههههههههه
انا بصراحه ساعتها كنت نازل مع الوالده وجدتى السوق ومعايا اليكتريك شوك وسكين ايوه سكين
وكنت على اتم استعداد على قتل اى احد يفكر يعمل لنا اى شىء وبدم بارد جدااااااااااااااااااااااا ااااااااااااااااااااااااا اااااااااا فوق ما تتخيلوا اه والله
شوفتوا كنت انا وصلت لدرجه اد ايه هههههههههههههههههههههه
و طبعا عدم وجود حركة مواصلات الا قليل جدا جدااااااااااااا جداااااااا
والقمامه بدائت تملاء الشوارع فى كل مكان
المهم
رجعنا البيت ونزلت تانى جبت جنازيرين من اضخم انواع جنازير موجوده وقفل وروحت لبتاع المفاتيح عملت لكل سكان البيت مفاتيح وبقا اللى يدخل يقفل بالمفتاح واللى يخرج يقفل بالمفتاح
كل ده ومتنسوش ان النور لسه مقطوع زى ما هو ومفيش ماية ولا اى حاجه وبنتصل ببتوع الكهربا بيقولولنا احنا مش هنقدر نيجى لحد وسامحونا وكدا
وبيت جدتى امام بيتنا اللى فى دار السلام اللى قاعدين فيه وقتها فطلعنا قعدنا عندها شوية وفضلنا قاعدين وساعتها مكنش فيه اى لجان شعبية فى الشوارع ساعتها

المهم كنا عند جدتى ومره واحده فى حدود على ما اعتقد الساعه 6 او 7 مساء وسمعنا صوت بيصرخ فى الشارع ااااااااااااااااااااااااا ااه الحقواااااااااااااااااااا اااااااا كلواااااااااااااااا ينززززززززززززززززززززل

الحقواااااااااااااااااااا اااا كله ينززززززززززززززززززززززز ززل

انزلواااااااااااااااااااا ااااااااااااااااااااااااا ااااااااااااااااااااااااا ااااااااااااااااااااااا

ومفيش دقيقة ولقينا الشارع كله بقى رجالة على شباب وكله نازل بعصيان وسكاكين وكذالك
ومطاوى

وساعتها كان ناس اتفقت مع ناس شغالين فى شركة الكهربا انهم يجوا ويصلحوا كابل الارضى علشان الكهربا ساعتها ترجع تانى ل 220 فولت بدل ال 360 فولت وطبعا عرفت انها كانت 360 فولت لانى عندى افو ميتر وقست الفولت بتاع الكهربا وعرفت انه 360 فولت

المهم ساعتها اليل بداء يضلم المكان والشارع كله ضلمه وبداء الناس يولعوا خشب وكدا بس الدخان كان سىء جدا ومحدش عارف يعمل ايه لغاية ما جت ليا فكره ان لو وصلنا الكهربا على التوالى الفولت يقل ويتقسم على 2
يعنى بدل ما هيبقى داخل 360 فولت على كل لمبة هيبقى داخل 180 فولت بس على كل لمبة وبكدا مفيش لمبات هتتحرق وفعلا رحت عامل الفكره ديه عندنا وبقى شقتنا هى الشقه الوحيده اللى منوره فى الشارع بعدين روحت عملتها عند جدتى و بعدين بدائت اقولها للناس علشان كله يعملها والحمد لله الكل بداء ينور تانى بس كان لازم لمبتين 100 وات وسلك ودوايتين

وبقى الجوامع فى نفس الوقت يا جماعه خلى بالكم من عربيات الشرطه والاسعاف و الكهربا والمايه

والناس يا عينى اللى كانوا جايين يصلحوا الكبل الله يكون فى عونهم ساعتها

وبعدين لما الناس نزلت بقى كله اتفق انه هينزل الشارع وهيباتوا فى الشارع النهارده انا بقى كنت مجهز نبوتين فل كده واحده ليا وواحده للحاجه ومجهز سكاكين وكان اليوم ده رعب بمعنى الكلمه وكنت بتمنى من ربنا انه يعدى باى شكل من الاشكال وكان كل شوية الحقوا دول جايين من هنا والحقوا دوول جايين من هنا والناس تجرى والستات تصوت

وجنب دار السلام عزبة اسمها عزبة خير الله

والمقارنه بين دار السلام وعزبة خير الله

زى ما تقارن ما بين

مصر الجديده و الدرب الاحمر مع احترامى للجميع طبعا

وكان كل شوية الحقوا بتوع العزبة هيهجموا عليكوا الحقوا بتوع العزبة هيهجموا عليكوا

(اكتشفت مع مرور الايام ان نفس الامر كان بيحدث مع بتوع العزبة كانوا ناس بتصوت عندهم وبيقولوا الحقوا بتوع دار السلام هيهجموا عليكم ههههههههههههههه)

واستمر الحال لغاية الساعه 2 صباحا والشارع على نفس حالة الكر والفر اللى على الفاضى
لغاية ما جه بتوع الكهربا الساعه 2 صباحا ومع سؤالهم ليه اتاخروا كدا قالولنا الجوامع كانوا بحذروا الناس من بتوع الكهربا والشرطه والاسعاف فكانوا كل ما يدخلوا على لجنه شعبية توقفهم وتفتشهم 100 مره ههههههههههههههههههههههههه ههههههههههههههههههههههههه ههه

المهم بقول يصلحوا الكهربا ونمت وقتها الساعه 3 صباحا والساعه الثالثه ونصف صبحا بعد نصف ساعه من الاحلام الكابوسيه اجد من يخبط على الباب بشده وبهبد وبرزع وانا قومت مره واحده وروحت ماسك السكينة والاليكتريك شوك وانا بقول مين مين لقيت بيقولى انا انا قولت انت مين يقولى اسلام ورحت فاتح الباب وابويا ورايا بالنبوت و انا ماسك السكينه على اتم استعداد لقتل اى احد تسول له نفسه الهجوم علينا حتى لو كان الثمن حياتى وفعلا اول ما فتحت الباب لقيت واحد ابن جرنا عاوز فلوس لبتوع الكهربا وساعتها طبعا طلعت فيه وقلتله هو حد يخبط على الباب بالطريقه ديه انت حمار ياشيخ حرام عليك مش كفاية اللى الواحد فيه واديته الفلوس وانا بحذره اياه يفكر يخبط كدا تانى مره تانية

واديته الفلوس ونمت بالعافيه واول ما صحيت من النوم اليوم التانى اللى هو يوم 30 يناير
مكنتش مصدق نفسى ان اليوم اللى فات خلص

يتبع بس النهارده على المغرب كدا ان شاء الله
......................... ...

[sayed2077]

المشاركة الأصلية كتبت بواسطة yahiaashraf انا كان بالنسبالى يوم 25 يناير كاى يوم معتاد و عدى لغاية جمعة الغضب و فتح السجون كونت مكلبش فى البيت بمعنى الكلمه من كترة البلطجه لدرجة ان اللى بينزل يصلى لازم ياخدوا منك الشبشب وصلنا لدرجة مش عارفين ننزل نجيب كيلو طمام الدبابات كانت فى الشارع وكل شويه اسمع صوت رشاشات و الدبابات شغاله دوريات كانى على الحدود مع اسرائيل انا مشاركتش فى المظاهرات غير فى الاخر خالص بس برده مكنش فيه اى امن فى البلد لغاية لما قطعوا الموبايل و النت و كان يوم ساعتها كونت بقضى يومى على التلفزيون و كل شوية يقولك بيان هام من رئاسة الجمهوريه افضل ملطوع بالساعات لغاية لما يتعلن ******************* من كثرة الانفلات الامنى وصل ان سكان البرج نزلوا بالشوم و السواطير وقاعدين تحت و ياما اضرب عليهم نار انا منزلتش غير مره واحده و انا وصلت لمرحله انى ركبت باب حديد على باب الشقه عندى وتربست الباب الحديد و تربست باب الشقه بكل ما تتخير و كل شويه اسمع اصوتا حاجات بتكسر اعرف ان فيه بلطجيه جايه و جبت كرسى و فضلت قاعد ماسك المسدس و السكاكين طول الليل و النهار ملطوع عند الباب حتى الاكل بتاعى و انا على الكرسى برده يدوب انا اخلص الدوريه بتاعتى و يجى واحد يستلم مكانى و انا اروح على التلفزيون عدل كانت ايام رعب بجد ده انا خوفت اطلع البلكونه الاقى رصاصه فيه عدل

هههههههههههههه ينهار ابيض

مسدس مره واحده

نورت الموضوع يا باشا

[sayed2077]

المشاركة الأصلية كتبت بواسطة محمد السيد 78 بالنسبة لى قبل الثورة ماكنتش متابع اى برامج حوارية وانا بطبيعتى ماليش فى السياسة وطبيعة شغلى كانت بتخلينى معظم اليوم برة المهم مما سبق انا ماكانش عندى خبر بموضوع المظاهرات ده وبعد يوم التلات 25 بدات اسمع ان فى قلق فى القاهرة وانا اساسا من الاسكندرية المهم يوم الجمعة(جمعة الغضب) رحت الشغل عادى جدا ماكنتش اعرف ان فى جمعة الغضب اساسا وبطبيعة شغلى برضه كنت بروح فرع دمنهور للشركة التى اعمل بها يوم الجمعة لمتابعة سير العمل هناك المهم اخدت عربية الشركة(شاهين) وميكانيكى وكهربائى وسافرنا على دمنهور وصلنا قبل صلاة الجمعة صلينا وبدانا شغل وخلصنا حوالى الساعة 3 عصرا وبدانا رحلة العودة الى الاسكندرية (على فكرة ماكنش فى اى شئ فى دمنهور ) ولا كنا حاسين بالدنيا لان العربية مافيهاش راديو وماحدش خد باله ان خطوط الموبايل مش شغالة المهم بعد دمنهور بحوالى 20 كيلو لقيت العربيات الناحية التانية عمالة تقلب نور قت اكيد فى رادار وهديت السرعة وفضلت ماشى مهدى اكتر من ربع ساعة وانا عمال ادور على الرادار ومش لاقيه وفجاة لقيت كمية كبيرة من العربيات ماشية عكس وجايين فى وشى المهم وقفت وبسالهم فى ايه قالولى ان فى كفر الدوار المتظاهرين قافلين السكة وماحدش بيعدى ومن هنا بدات الماساة وقررنا التوجه الى المنصورة واتخاذ الطريق الدولى الى الاسكندرية ومجرد ماوصلنا المنصورة كان الجيش نزل وقفل مداخل المدينة فرجعنا تانى على الزراعى وقلت للى معايا انا هبات فى فرع دمنهور لحد الصبح وصلنا دمنهور وصليت المغرب والعشاء وبعد الصلاة فوجئت بان الفنيين اللى معايا قالولى احنا مش هنبات قلت لهم طب هنعمل ايه مانتم شايفين مش هنعرف نوصل اسكندرية قالولى لازم نروح . المهم طاوعتهم وبدانا الرحلة مرة اخرى الى الاسكندرية زراعى كان الطريق بدا يفضى ولكن بمجرد وصولنا كفر الدوار لقيت كمية من الشباب والصبية مولعين فى كاوتش وعربيات بوليس محروقة وماسكين سنج وشوم وسيوف وبيوقفوا كل عربية يبصو على الركاب فيها كل ده واحنا مذهولين مما يحدث ومش عارفين ايه اللى بيحصل وعدينا كفر الدوار بسلام ووصلنا الى اسكندرية وبمجرد اقترابنا من كوبرى التاريخ لقيت شوية اطفال بيوقفو العربيات وبيقولو ماحدش يعدى من هنا فى ضرب نار حى قدام ناحية مينا البصل انا ساعتها كل اللى شاغلنى انى اوصل العربية لحد الشركة وبعدها اللى يحصل يحصل لانها مش عربيتى ودخلت على المينا من ناحية باب 22 الىمقر الشركة والحمد لله واليوم ده ماعرفتش اروح ونمت فى الشركة والحمد لله ان التليفون الارضى كان شغال وطمنتهم فى البيت الساعة 2 ليلا وروحت يوم السبت الساعة 10 ص.

ينهار فل طايب والبنزين كان ايه اخباره ساعتاه واكيد طول ما انت سايق كنت فى رعب
الحمد لله ان الايام ديه عدت على خير

نورت الموضوع يا باشا

[sayed2077]

المشاركة الأصلية كتبت بواسطة mhamdy75 ايه المواضيع الجامدة دى ياسيسو الله أكبر عليك انا متابع معاك وهاكتب لما تخلص ان شاء الله

ياباشا يا كبييير

الله يخليك يا باشا ده بعض ما عندكم طبعا

ومستنيك يا باشا واعتبرنى خلصت

وبجد الموضوع ده هيبقى اكثر من رائع لان كل واحد مر بتجربه و بمشاهد غير التانى خالص ونهائيا ففعلا بتبقى ممتعه جدا اننا نسمعها من بعض

وفى انتظارك يا كبير

[ahmed_eng2001]

انا احب اشارك اخواتى فى المنتدى عن ذكريات اول اسبوع من الثورة

متابعتى بدات من بعد صلاة الجمعة .... الى كنت سمعته انه فيى شوية قلق فى وسط البلد ... فقلت عادى ... زى الى كان بيحصل قبل كدة ... شوية مظاهرات خفيفة امام مجلس الشعب

يوم الجمعة بعد الصلاة ... اخدت بالى ان مفيش سيجنال فى الموبايلات ... و لا فى التليفون الارضى ... و لا انترنت ... فتحت التليفزيون المصرى .... يحرق الدم كالعادة ... الجزيرة و العربية بيقولوا ان الدنيا والعة نار
اترزعت ادام التليفزيون لغاية باليل و لغاية لما قالو مفيش بوليس فى البلد ..... الرجالة جريوا و هربوا !!!!!

ببص فى الشارع لقيت الناس بتنادى على بعض انها تنزل تحمى البيوت .... فنزلت معاهم .. و رحت معرض عربيتى فى الشارع بتاعنا و قفلناه ... و عملنا 3 نقط تفتيش فى الشارع ..

المهم ... بدأنا نسمع اخابار ان فيه عصابة من 5 افراد بيسرقوا البيوت بالقوة فى الهرم
بعديها بساعة .... عصابة من 10 افراد بيسرقوا البيوت فى الشيخ زايد و معاهم مسدس
بعديها بساعة ..... عصابة بتسرق البيوت و واحدة بتصرخ فى التليفزيون و بتقول انهم بيحاولوا يكسروا باب بيتهم ..
انتى ساكنة فين يا ست ؟؟؟ انا ساكنة فى الحى الاول ( او التانى ) فى 6 اكتوبر !!!! يا صلاة النبى انا ساكن فى الحى التانى !!! فين الكلام ده ؟ نروح ندور فى كل الحى التانى ملقيناش اى حاجة مش طبيعية

فبلغت الناس الى معانا فى الشارع ..... كل الى بيتقال و بنسمعه .. دى اشاعات و ياريت محدش يرددها تانى ... لو فيه عصابات او ناس جاية تسرق , ادينا مستنيين .... بس شغل الكلام الفارغ ده ملهوش لازمة
و لسة مخلصتش كلامى ..... و جه واحد ( الله يسامحه ) يقولنا .... الحقوا خزنوا ميه , ليه ؟؟؟ علشان ضربوا خزان المياه الى فى اكتوبر ... انا اتغاظت منه جدا جدا و قلتله ...

اعقل الكلام قبل ما تقوله , مين الى حيفجر خزان المياه ؟؟ و مصلحتهم ايه ؟ دى عصابة جاية تسرق المياه ؟!!! و بعدين يا عم الحاج خزان ايه الى فى اكتوبر ؟؟!!!! الناس بطلت نظام خزانات المياه ده من زمان
و بعدين يعنى ايه ضربوه ؟؟؟ ضربوه بالمتفجرات يعنى و لا ضربوه على ايديه ؟!!!!

المهم انا اتاكدت من ساعتها ان مفيش الاشاعات و الكلام الجامد ده
الى استمر كمان يوم ...... عصابة بتسرق الناس فى الفردوس .... نتصل بزمايلنا الى فى حى الفردوس ... يقولوا مفيش حاجة ... ده احنا الى سمعنا ان فيس ضرب و دبح فى الحى السادس ..... نتصل بزمايلنا الى فى الحى السادس ... يقولوا مفيش حاجة ..... احنا سمعنا ان الناس بتتسرق فى الحى التانى .... احنا فى الحى التانى يا عم !!! مفيش حاجة و الله !!!!!

و تم تجنب نشر الشائعات بالشكل ده .... ده غير موضوع الهاربين الى اتحصنوا فى مدرسة فى الحى السادس و ده احنا كنا سامعين تراشق بالاسلحة النارية المتختلفة طول الليل و تم القاء القبض عليهم صباحا

المشكلة فى رايى ظهرت بعد 4 ايام من السهر و اللجان الشعبية , الا و هى الزهق ... الشباب زهقوا و بدأوا يغيروا كلامهم 180 درجة .... فبعد ما كان السباب متحمسين جدا للثورة و ان مبارك يمشى ... بداوا يقولوا ان من الافضل ان مبارك يكمل فترته ... اهو الراجل حلف انه مش حيترشح تانى و هو كبر و عاوز يروح يعمل عمرة و يعتزل .....

و لما كلمت الشباب دى لمدة اكتر من ساعة .... واحد قالى ... بصراحة انا زهقت .. و انا عاوز اروح اقعد على الكوفى شوب مع اصحابى .. ده انا بقالى اسبوع مشربتش شيشة !!!!

انا مرضتش اعلق عليه و لا اتكلم معاع اكتر من كدة ... اصابنى نوع من الاحباط