عاوز اخد رايكم فى عقد عمل للسعودية

[tofy]

متشكر جدا على اراء الاعضاء ..... والله يا اخى العزيز انا مش فكرت فى موضوع الحسد ده خالص لانى مجرب اخواتى وعارف اخواتى فى المنتدى ودايما بفرض حسن النية وتانى حاجة لو ربنا كتبلى انى هسافر والدنيا كلها وقفت ليا برضة هسافر
نعم
انا ليا اخ اكبر منى ويمكن الاعتماد علية وعندى اخوات اصغر منى بس والدى ماشاء الله ربنا يباركلة لسة بيشتغل واحنا من اسرة منوسطة ميسورة الحال وان غربتى لن تؤثر على عائلتى

[mhamdy75]

لو حاسس ان الحال ضاق هنا توكل على الله وإبحث عن اسباب تنزل الرزق

وحط فى دماغك ان هايبقى فى نسبة من الراتب ضايعة لاى سبب

يعنى اعتبر المرتب 950 ريال فقط تحسبا لاى مشكلة احنا مش عارفينها

وطبعا السعوديين محترمين جدا مع المحترمين منا

وهاتشوفهم بيتعاملوا بغباء مع المصريين اللى برضو احنا بنكرهم هنا

(مقولة من صديق لى )

[ramy01011]

انت لسة سنك صغير توكل علي الله و ربنا هيوفقك بس نصيحة من اخ اكبر خلي في دماغك هدف و هو انك مطولش في الغربة يعني كبيرك 5 سنيين و ترجع تاني والا يا برنس السنيين هتسرقك و هتوصل لسن لا قادر ترجع و تبدي من اول و جديد في مصر و في نفس الوقت هتكون زهقت من الغربة

[ايمن عبدالحميد]

المسألة محتاجة شوية حسابات بسيطة
1- الراتب يساوى بالمصرى حوالى 2500ج وحضرتك مرتبك هنا وانت جنب اهلك 1200ج
2- هتقدر توفر كام من الراتب السعودى؟ على احسن تقدير ما يعادل 1200ج مصرى يعنى السنة كلها1200
فى 12 شهر 14400 قول 15000
3- علشان تحوش 150000ج محتاج تتغرب عشر سنين عجاف من غير نزول خالص لأن النزول مصاريف تانية هدايا وخلافة
4- حالياً مبلغ 150000ج يعمل اية؟ ولا حاجة اخرك تدفعة مقدم شقة وتقسط الباقى باقية عمرك
5- بعد عشر سنين المبلغ دة هيعمل اية؟ شوية قمصان وكرفتات وبارفانات ولو كفاك اصلاً
اذاً النتيجة هى :
1200 ج فى وسط اهلك افضل مئة مرة وبكرة تزيد او تضيف شغل تانى وربنا يوفقك لأن السفر على اقل من خمس او سبع الاف جنية مصرى مش هينفع

[kimo10]

بدل ما تستشير العباد استشير رب العباد
صلاة الاستخارة وربنا يوفقك لما فيه الخير واذا ربنا يسرك السفر اغتنم الحج والعمرة بقدر ما تستطيع