إستفتاء هام جدا لكى لا تضيع البلاد والثورة

[سالم سلامه]

ان شاء الله مصر مسلمين ومسيحيين ايد واحده ومفيش حاجه هتفرقهم الشعب المصرى ناصح مش اهبل

[حازم شاهين]

إذا استمرت المشاركات التحريضية ضد المسيحين سيتم حذف الموضوع

[AbOnOrA]

اهو هما عايزين اثاره الموضوع ده تانى علشان تبقى فيه ردود زى استاذ ايمن كده ومن هنا العصبية والفتنة تبداء تانى

انا كنت لسه بقول ان المادة ديه محور جدل فى كل الدساتير ومااشبه الليلة بالبارحة

دستور 1923 كان فيه نفس المادة والليبرالين عارضوها وساعتها مكانش فيه فتنة ولا خلاف بين مسلمين واقباط

الاهم من كل ده بقى ان الليبراليين توعدوا وهددوا بان المادة ديه هتعمل وهتسوى وهتسبب وهتتسبب وفيه ناس قالت بكرة تشوفو هتقطع الارجل والايادى من خلاف ونرجم بالحجارة
وادى قرابة القرن عدى ومحصلش حاجة من دى يمكن الغالب هو تطبيق التشريع الفرنسى مش الاسلامى ابداً

فاللى عايز اقولة باختصار ان المادة ديه مش عاجبة العلمانيين من زمان ومفيش تهاون فيه من غالبيه الناس
فملهاش لازمة نعيد السيناريو السخيف ده تانى ومش هيسمح لحد بالاصطياد فى الماء العكر

ثانياً : المادة 40 فى الدستور نفسه تنص صراحة على ان المواطنون لدى القانون سواء وهم متساوون فى الحقوق والواجبات العامة لاتمييز بينهم فى ذلك بسبب الجنس او الاصل او اللغة او الدين او العقيدة

المادة 46 تكفل الدولة حرية العقيدة وحرية ممارسة الشعائر الدينية

وبالتالى يصبح الدستور متوازن فى الحفاظ على الهوية الاسلامية للدولة مع كفالة حرية الاعتقاد والمسواه والمواطنة

ثالثاً وده الاهم ان التعديل الدستورى القائم حالياً يهدف لاعادة التوازنات بين السلطات وتصحيح المواد الخاصة بالانتخابات وكل ده لضمان حياة سياسية سليمة يبنى عليها النظام الجديد
ومفيش وقت لحاجة اكتر من كده ولجنة التعديلات الحالية اعلنت انه لامساس لاى مواد خارج هذه السياق يبقى نسكت ونتابع وملوش لازمة اى كلام من اى طرف يشعلل الدنيا تانى ويخسرنا التفاهم الوطنى اللى اتحقق فى ايام الثورة

[ابوسهيلة]

للاسف يا جماعة الظاهر اننا معملناش ثورة ولا حاجة وان احنا اضحك علينا
بدل ما حسني كان بيقعد شوية في القاهرة وشويتين في شرم الشيخ بقي يقعد علي طول في شرم الشيخ

وبقول كده علشان رؤساء مجالس ادارة و تحرير الصحف القومية
بدأوا فعلا يركبوا الموجه الجديدة ويوجهوا بعض الناس اللي مش فاهمة او متحمسة زيادة عن اللزوم لاحداث فتن مش مطروحة اصلا

فكما قال استاذتنا الاعضاء ان المادة التانية مش من ضمن المواد المطروحة للتعديل
واللافت للنظر ان في استفتاء بدأتوا اهرام عبدالمنعم سعيد واسامة سرايا حول الموضوع ده
وتبعها جمهورية محمد علي ابراهيم

واحنا للاسف بننجر لهذه المواضيع بدون وعي

وهل تغيير مثل هذه المادة او غيرها هيكون باستفتاء في مواقع لصحف زبالة زي دي او غيرها

يا جماعة مش عايزين الاشكال دي تزرع فتن بينا سواء مسلمين ومسحيين او ليبرالين واسلامين او غيرها
مش عايزين ندي فرصه للانقلاب علي ثورتنا الجميلة من زيول هذا النظام القذر

[nktis]

انا سمعت ان نجيب ساويرس هو صاحب الفكره