عايز اجيب فانتزيا 2010

[طارق عبد السلام]

المشاركة الأصلية كتبت بواسطة ABOANEMA مش عارف بخصوص كامله ومش كامله ديه انا اللي اعرفه ان العربيه 3 فئات التروبيتك ديه والسبورت والاليجانس هو فيه حاجة اسمها اليجانس كامله ومش كاملة ولا حضرتك تقصد اتاكد ان كانت اليجانس او سبورت اصلا ^_^ بس هاتاكد برده وشكرا علي التنبيه العربيه توكيل اه العربيه فابركيه برا وجوا بس صاحب المعرض رش فيها الاصطدام الامامي والخلفي عشان كانت حاكه فيهم كتير - علي حسب كلامه - وانا كعامه هاخد العربيه اكشف عليها برده في التوكيل عشان اتاكد لو فيها اي حاجة مش مزبوطه عشان موضوع انه راشش لها الاصطدامات ديه مش مريحني بصراحه بس كعامه لو طلع كلامه صح وسليمه وكل حاجة وراشه دول بس يبقي ايه النظام فيها حلوة ولا ايه رايكم ؟؟ بعدين معلش سؤال هو اليجانس 2010 بتختلف في اوبشن عن ال2013 ولا هيا هيا تقريبا يعني حابب اعرف لو فيها حاجة اقل ناقصه كده ومعلش علي تعبك

لا ::::::: حضرتك وده ناس كتير ماتعرفوش
الاليجانس نفسها فئات
يعنى ممكن تلاقى عربيه اليجانس فتحه سقف وجنوط وحساسات وكاسيت صغير ودى كاتوجرى (b)
والتجار بتبيعها اليجانس عادى وبنفس السعر
على العموم هى لو توكيل بتعرفها من الجنط16
والابانوس فى التابلوه
والمصفحه حديد مش فبر
وكتوب على شنطه العربيه آر توك وبيكون معاها كتيب الضمان والصيانه ودى التاجر مش هيظهره لك علشان ماتكتشف الكيلوات الاصليه للعربيه
على فكره الموضه دلوقت كل عربيات 2010 بيخلو عدادها قريب من 40 الف كيلو
وده هتكشف انت على آخر صيانه للعربيه فى التوكيل هتعرفك العداد ملعةب فيه ولا لا
ومن ناحيه السعر لو العربيه سليمه فعلا السعر كويس لان العربيات دى زادت فى سعرها الايام دى
وبالنسبه للفرق بين الاليجانس 2010 و2013
يعتبر لايوجد فروق
وكماليات الاليجانس الكامله بتزيد
زينون متحرك سخانات كراسى 2 اير باج فى الكراسى الاماميه كاسيت كبير مرايات ضم كهرباء

[ABOANEMA]

طيب انا فيه عربية خليجي اليجانس زيرو بس موديل 2012 ب200 الف فهل ديه حلوة ولا تنصحوني بلاش الخليجي افضل ؟؟؟

وهل فعلا الخليجي مش مصفح من تحت ولا ايه الكلام ؟؟


بالنسبه للعربيه 2010 انا مش هاخدها الا لما اكشف عليها توكيل قبل مااشتريها عشان انا برده شاكك فيها


وياريت تقولوا لي الفروقات بين اليجانس الخليجي والعادي

وانواع الاليجانس برده عشان اول مرة اعرف


ومشكورين والله

[طارق عبد السلام]

الخليجى تصفيح فيبر من تحت مش تصفيح حديد
الخليجى جنط 17 وده مشاكله كتير مع الطرق البايظه وبينشف العفشه
والفروقات بين الاليجانس الخليجى والعادى
لو فى 2010 العربيه الخليجى واطيه عن الوكيل وبتحك فى الارض
لكن ل2012 الارتفاعات تساوت بس الخليجى جنطها 17 الوكيل 16
العربيه الخليجىبدون ابانوس فى الطابلوه
وطبعا خلى بالك من باقى الكماليات فى الخليجى اللى انا قلتها سابقا من زينون وسخانات ومرايات ضم
لان الفئه الخليجى ال (ب) اليجانس كانت ب185 الف فى 2010 وهى بتكون جنوط وفتحه سقف بس
فالتاجر بيبيعا بسعر الكامله فى المستعمل اللى كانت بتتباع 215 الف ازااااااااى بقى
ولو 2012 الخليجى عجباك هى رينجها فى 190 وانا افضل لك الوكيل بصراحه
والرأى الاول والاخير لك

[ABOANEMA]

انا جيبت فانتزيا 2011 سبورت الفئه التانية يعني

ماشيه 11 الف كيلو ب165 اعتقد السعر ده مناسب عليها والعربيه بصراحه فابريكه برا وجوا وعلي الزيرو فعلا ولونها اسود

شكرا ليكم اولا علي الاجابات اللي ريحتني كتير بدل الدوخه اللي كنت فيها


بالنسبه للعيوب بقي ايه ماحدش قال ولا عيب فيها لحد دلوقتي !!!!


عايز اعرف عيوبها عشان اكون مستعد لها من دلوقتي