بسم الله الرحمن الرحيم
من ساعة ما اشتريت العربية من 6 شهور وانا التراب تاعبنى جدا بحس انة بيلزق على العربية وخصوصا السقف والكبوت وحاسس ان ملمس العربية خشن والتراب مش بينظف من على العربية . فجأه وبدون مقدما لقيت نفسى يوم الخميس بالليل رايح عند بتاع البوهيا واشتريت علبة بوليش بـ 5جنية وعلبة كومبوند بـ5جنية وكيس قطن بـ5جنية وقلت انا بكرة هلمع العربية مع انى ما اعرفش بيستخدموا ازاى المهم بحثت على النت وسألت كذا واحد لحد ما عرفت الطريقة وهى .
1- لازم تغسل العربية غسلة محترمة علشان التراب ميجرحش العربية وانت شغال .
2- نجيب الكومبوند ونقسم العربية اجزاء يعنى باب-رفرف-اكصدام..........وتحط الكومبوند على صابع ايدك وتوزعة بطريقة تنقيط على الجزء الى هتشتغل فية وبعدين نجيب قطعة قطن كبيره شوية ونبتدى نلمع فى العربية بس فى اتجاه واحد بس. يعنى تبقى بتلمع العربية كلها فى اتجاه واحد وليس بصورة دائريه (فائدة الكومبوند انة بيشيل الطبقة الخشنة الى التراب والشمس عاملنها على البوهية بتاعة العربيه بالاضافه انة لو فى خدوش فى العربية مش واصلة للمعجون هو بيساويها ولو فى بوهيا من عربية تانية نتيجة حكة او خلافة بردو بيشيلها .
3- نسيب العربية حوالى نصف ساعة مثلا والكومبوند عليها (انا عن نفسى سيبتها 3ساعات)
4-نجيب فوطة نظيفة او قطنه ونمسح الكومبوند الى على العربية .
5- نجيب البوليش ونعملة بنفس الطريقة الى عملنا بيها العربية مع الكومبوند فى الخطوة رقم 2 (فائدة البوليش انة بيدى لمعة للعربية وبيخلى ملمسها ناعم )
6-تغسل العربية غسله اخيرة واتفرج على العربية الى هتحس انها مش عربيتك
بصراحة انا لما شفت النتيجة فى الاخر قلت لنفسى انا لية معملتش الموضوع ده من زمان قوى انا هعمل الموضوع ده كل شهرين .
اعزرونى انى مصورتش الخطوات الى فاتت واعزرونى ان كنت مبعرفش اشرح بس انا التجربة عجبتنى فحبيت انى انقلها لحبايبى فى مصر موتورز.
17-09-2011, 11:33 PM
رد: تجربتى مع البوليش والكومبوند.
احمد عبد الصبور
