لماذا اشتريتك يا لوجان ؟

[asalacenter]

(( تثيت الموضوع ))

أولا : موضوع رائع جدا وانا كنت متابعه كل يوم

ثانيا : بطلب من مشرفى المنتدى تثبيت الموضوع لانه على قد ما انه مشوق جدا واسلوبه رائع ومميز على قد ما انه مفيد جدا لأغلب زوار المنتدى وأنا منهم وأن شاء الله يادكتور شهرين تلاته لو كان لينا عمر هكون مستعد بنفس المبلغ اللى حضرتك دفعته قسط لشراء اللوجان وساعتها هيكون ليا مداخله مع حضرتك عشان تساعدنى عالتنفيذ


وأخيرا كان ليا سؤالين؟

1- أنا اعرف ان رينو نفسها بتقسط وفالحالة دى هيبقى تقسيط مباشر واسلامى
ليه حضرتك متجهتش اليهم هل عشان تأخير التسليم ولا فايدة أكثر ولا ايه هيا اهم الاسباب ؟


2- أنا عارف ان حضرتك من هواة الزيرو ليه حضرتك طالما قررت اللوجان مشترتهاش كسر زيرو ووفرت 10000 جنيه على أساس ان اللوجان اللى بتتباع90 % منها بيبقى بحالة المصنع

[gohaelmasry]

المشاركة الأصلية كتبت بواسطة dr.wael7yran يا جماعة الف الف شكر على تشجعيكم ليه .. و بتأسف على التأخير بس مبعرفش اقعد هنا الا بعد صلاة الفجر .. و نكمل القصة .. بس عايز اقول اني قبل ما اخد قرار الشرا اتفرجت على كام عربية على السريع كده .. الساجا .. ارخص عربية اتوماتيك في مصر الاسبرانزا ال ام 11 .. و الام 12 كمان ..عربيات شكلها جامد جدا .. التيجو .. ال 516 كنت سوقتها من واحد صاحبي شوية كده في المصيف فمركزتش عليها اوي .. و الفيرنا .. و البي واي دي ,,,ركبتهم كتيييير ..كتاكسيات طبعا و نرجع لطابا و القعدة مع نفسي .. دماغي لفت و اتهرت و راحت و جت مليون مرة .. و بدأت كعادة جميع الاطباء افلتر الاحتمالات .. و بدأت بالصيني .. موش هاقدر ..اكتر حاجة خوفتني منه التناقض الفظيع في اراء الناس فيه ناس تقولك جامد جدا و بلاش تعقيد .. و ناس تسب و تلعن اليوم اللي فكروا فيه .. و الاخطر من كده ..معظم الشكاوي كانت من العفشة ..عقدتي الاساسية مع الافيو.. و انا سوقت الاسبرانزا 516 و 113 كام مرة كده ..عربيات كويسة بس موش مبهرة يعني.. و فيهم نفس احساس السواقة البلاستيك بتاع الكوري.. و الافيو علمتني حاجة مهمة جدا ... انه انت لو طالع من 128 او اول مرة تسوق في حياتك موش هتفرق معاك سواقة العربية اوي .. انما لو ركبت عربيات قبل كده .. العفشة و الخبطة و الرزعة و سحب العربية و الحاجات دي هتعكنن عليك بجد ..فانا موش ضد الصيني .. بس خفت اشتري سمك في ميه و البروتون ..معرفش ..لم تستهويني ابدا هذه الماركة ..الجين تو اصحابها شكروا فيها بالهبل بس انا عمري ما عرفت حد عنده جين تو قبل كده .. طيب ..الريو سوقتها و معجبتنيش .. و النيو اكسنت اختفت من السوق و مفيش غير الاربي طب فاضل ايه .. الاسكالا و الصني .. انا اسف يا مشجعي الصني .. بس موش قااااادر ...العربية و لا حاجة مقارنة بعربية زي اللانسر و متستحقش خالص ال 90 الف جنيه و قعدت و ركزت مع نفسي .. انت دماغك فيها ايه..افهم نفسك يا اخي ..انت عايز ايه.. و دي نصيحتي لكل واحد بيشتري عربية ..اسمع من الناس بس ركز انت نفسك عايز ايه .. انا عايز اسوق عربية تقيلة على الارض .. مبحبش العربية الجراية .. انا عايز عربية عفشتها قوية و ناعمة .. مبحبش العفشة الرياضية .. انا نفسي تبقى اتوماتيك ..مريحة و ممكن اسيبها لمراتي .. انا عايز اوبشن ..انا بحب الاوبشن ..عايزها فول اوبشن .. انا عايزها ماركة ..موش معقولة بعد ما ركبت سيات و ميتسوبيشي و شيفروليه هركب شيري او جيلي .. انا عايزها واسعة من جوه ..موش اوي بس الشنطة لازم تبقى واسعة علشان حاجات البامبينو .. انا عايزها من توكيل محترم .. موش هتفرق اوي اسعار قطع الغيار لأنه بالخبرة طالما هتعملها في التوكيل هيتخرب بيتك هيتخرب بيتك و ده شيئ اساسي و في اي توكيل بس في مقابل الفلوس الكتير اللى انا هادفعها دي عايز اخد خدمة كويسة ..عايز احجز بالتليفون و اقابل ناس بتفهم تنصحني صح و تعمل المطلوب و اخرج بعربيتي المغسولة و هي مظبوطة موش زي ما دخلت زي ما خرجت.. انا عايزها تمنها لا يزيد عن 90 الف لانه بالعافية جمعت 50 الف و موش ممكن اقسط اكتر من كده هاخنق نفسي و اضيق على بيتي .. و في حكاية القسط هنا ركزت لانه بفضل الاخوة المحترمين هنا في المنتدى خلونا ناخد بالنا من حاجات كتير .. مثلا قسطك 1000 جنيه في الشهر بس متنساش انت عندك كل سنة ترخيص و وثيقة تأمين ب 2000 جنيه مثلا يبقى قسطك 1200 جنيه في الشهر حط عليهم 300 جنيه مثلا بنزين و صيانات في الشهر يبقى قسطك بقى 1500 يا معلم و انت موش واخد بالك .. و برده انا محتاج عربية اعادة بيعها كويسة ..وان كنت مركزتش فيها اوي لأن الصراحة انا بايع اكتر من خمس عربيات و مفيش بيعة خدت مني اكتر من تلات ساعات الحمد لله و ده لاهتمامي بالعربية و حرصي على الصيانة المستمرة ليها و في التوكيل.. و لما ركزت توصلت للحقيقة اللي واضحة زي الشمس في مصر ام الدنيا ..يا تجيب عربية بسبعين الف جنيه يا تجيب عربية ب 120 الف و انت طالع اي عربية بين الرقمين حرام فيها الفلوس .. انا اسف ..بس هي دي الحقيقة.. و قعدت افكر ..استنى شوية لغاية لما ازود المقدم..و اجيب حاجة ب 120 الف يا عمنا استنى هنا ... يعني انت فلوسك كتير اوي ما تلم الدور يا سيدي .. و انت لسه شاب و موش هتبقى عربية العمر يعني ان شاء الرحمن .. المهم قررت انه كفاية عربية بسبعين الف .. ادفع اربعين و اقسط الباقي على 3 سنين و لو ركزتوا معايا في طلباتي..هتلاقوها موجودة بالظبط في اللوجان.. انا شايفها فقرانة من جوه ..ده صحيح و اماكن الزارير و الكلاكس و الير باج اللي مكانها فاضي و كل علامات التوفير اللي باينة فيها بوضوح شديد بس بلاش دلع .. وانت موش هتاخد كل حاجة و بعدين في حاجة مهمة في الاوروبي يا اخوانا .. عامل الامان ..مبيهرجوش فيه هناك و اللوجان فعلا ملكة في الموضوع ده بالنسبة لعربيات فئتها .. و الكلام ده بيفرق ..ربنا يبعد عنكم الشر بس بجد بيفرق و خدوها من دكتور ..الامان في العربية مهم و موش كماليات ..و حكومتنا الرشيدة لازم تاخد بالها من حاجة زي كده و خصوصا انه احنا و الحمد لله عندنا اعلى معدلات حوادث الطرق عالميا .. ام الدنيا صحيح و استخرت ( للمرة السبعين ) و خدت قراري هي اللوجان .. و خصوصا اني مؤمن بمبدأ اسمه VALUE FOR MONEY او القيمة مقابل الفلوس اللي هادفعها و اللوجان اثبتت انها افضل قيمة للفلوس دي و لا ينافسها فيها الا اللانوس على فكرة..و ده رأيي و في حدود خبرتي و امكانيتي.. هل انا غلطان .. الايام هي اللي هتثبت ذلك و خدنا القرار الحمد لله و دخلنا في القصة الجديدة.. منين .. و ازاي ؟ قسط بنكي .. و لا اسلامي قرض عادي .. و لا قرض سيارة .. سمير ريان .. و لا الطارق .. و لا عربيات ؟؟ و ده بقى نحكيه المرة الجاية ان شاء الله طولت عليكم و تقبلوا سلامي جميعا ...

مليون مبروك
ربنا يديلك خيرها ويكفيك شرها

[mohamed selem]

مازلت متابع حضرتك يادكتور باهتمام شددددديددددد

[ebrahem2000]

مبرووووووووووووووووك

[abdo_2828]

نفسى المسلسل بتاعك يبقى زى المسلسلات التركى يفضل لغاية 500 حلقه