ارشيف الاستراحة 2010

[Amr_Eissa]

بص أنا كنت رايح أنام بس بعد أول حلقة عملت واحد شاي و كملت للأخروشكلي حنزل كده من غير نوم أصل فاضل على الفجر ربع ساعة بصراحة أنت أخدتنا فسحة كنا محتاجينها قوي على الرغم أننا متحركناش من مكاننا ربنا يباركلك في أولادك و جزاك الله خير عننا
أخوك عمرو

R OSE4U

[sad-bird]

تسلم ايدك يا دكتور تامر

مستنيين من حضرتك اكتر

[ahrambc]

المشاركة الأصلية كتبت بواسطة أسد الله أسلوب رشيق رائع يدل على شخصية مرحة أستمر فنحن معك ومنتظرين اليوميات اللي وعدتنا بيها أن شاء الله أطيب تحية

اشكرك يا استاذى على المجامله

و أعدك بنشر يوميات أخرى فى المكان أو مع الناس

المشاركة الأصلية كتبت بواسطة hazem_khidr و الله يا باشمهندس انا مش بحب الصين عموما لكن طريقتك في السرد خلتني كأني هناك بالضبط و كمان اسلوبك مره اخري لا يوصف ارفع القبعه الي حضرتك

حازم

الصين أصبحت قوة صناعيه عظمى ... شئنا أم أبينا .... و لذلك فيجب أن نعرف كيف نتعامل معها طالما أننا مضظرين الى ذلك .

و خالص الشكر ليك على اتاحة هذه الفرصه لى

المشاركة الأصلية كتبت بواسطة احمد بدر1978 متابع معاك لبكرة الصبح بعد كدة حنام

باشطب الحوض و هانزل بحلقتين ان شاء الله

المشاركة الأصلية كتبت بواسطة المناور بجد أنا ادمنتك !! مستنى اليتبع

ربنا يبعدك عن الأدمان

المشاركة الأصلية كتبت بواسطة nadakhal بجد يعجز اللسان ان يوفيك حقك فى تميزك وجهدك وصبرك على كتابة وسرد الموضوع الاكثر من رائع وانا متابع معاك ومنتظر المزيد وألاعيب العيال المجانين بتوع هونج كونج وفعلا شوقتنا لزيارة هذه البلاد وياريت تتحفنا بقه بشوية صور علشان الموضوع يكمل. متابع

و انا جاهز

تحياتى

[ahrambc]

المشاركة الأصلية كتبت بواسطة Walid Samy إلى ابن بطوطة منتدى مصر موتورز ..... الله يسامحك أنا كان ورايا شغل متراكم ومتلتل فوق دماغى وقلت قبل ما أبدأ فيه أتصفح المنتدى لمدة 5 دقائق بالكتير ، ويدوبك هما أول 3 سطور من أول حلقة من حكاياتك ومعرفتش أفصل ، اتسمرت قدام اللابتوب لدرجة إنى اتزنقت وعايز أدخل الحمام قلت والله ما أنا داخل لغاية لما اشوف الراجل ده حكايته إيه بالظبط ، كأنى كنت واخد شلوت فى دماغى زى اللى أنت أخدته بعد ما شربت السيرب بتاع سلطة الفواكه. والغريبة يا جدع إنك مجرجرنا وراك زى لامؤاخذة ال ... وإحنا مشدوهين وفاتحين بقنا ومدلدلين لسانا وزى المتنومين مغناطيسيا .... بجد لك كل التحية والتقدير والإحترام على أسلوبك القصصى والروائى الشيق والممتع ، وأجمل ما فيه هو انتقالك الرشيق والسلس من فكرة لأخرى ومن مكان لآخر. رجاءا لا تتأخر علينا فى الجرعة التالية ، لأنى وأنا بكتب مداخلتى دلوقتى بدأت مناخيرى تحمر وجتتى بتاكلنى وعمال أهرش

جاهز يافندم بالجرعه

حلقتين كفايه

المشاركة الأصلية كتبت بواسطة Amr_Eissa بص أنا كنت رايح أنام بس بعد أول حلقة عملت واحد شاي و كملت للأخروشكلي حنزل كده من غير نوم أصل فاضل على الفجر ربع ساعة بصراحة أنت أخدتنا فسحة كنا محتاجينها قوي على الرغم أننا متحركناش من مكاننا ربنا يباركلك في أولادك و جزاك الله خير عننا أخوك عمرو R OSE4U

عمرو

شرفنى قراءتك للموضوع و انتظرك فى باقى اليوميات

[ahrambc]

(19)



صحيت الصبح و لميت الهدمتين و بعد الفطار و الدش و الذى منه نزلت و حاسبت الأوتيل و كانوا هايغالطونى فى 50 دولار انما على مين بس غلطة مش مقصوده فعلا و كانت من المغسله بتاعة الأوتيل و كل الحساب بالكمبيوتر طبعا و بالتفصيل الممل ولكل بند كشف خاص و بالتوقيت و امضتك و كل حاجه . و كنت شوفت فيلم كان ايجاره 10 دولار و الفيلم اللى تطلبه من الريموت بتاع التلفزيون يفضل يتعاد على محطة خاصه بيك لمدة 24 ساعه . طبعا كل ما اقعد فى الأوضه اقعد اشوفه لما حفظته و الفيلم اسمه ……… الأعصار.

خرجت خارج الأوتيل مسافه كده حوالى 2 سم لقيت الهوا و المطر دخلنى تانى 10 متر . يادى الواقعه اللى زى بعضها المهم طلبت تاكسى و ركبت من امام الباب بالضبط معرفش ازاى لغاية مكان الأتوبيس بالضبط و نزلت جرى على الأتوبيس . جرى ايه …. لأ طيران .

المهم السائق قالنا انه هايتأخر فى القيام 30 دقيقه علشان لو حد متأخر بسبب الجو الا لو حد اعترض على كده او العدد اللى معاه فى القائمه كمل . ماحدش اعترض . المهم فيه راكب واحد اتأخر حوالى 10 دقائق بس و السائق قال فى الميكروفون انه هايحاول يعوض التأخير ده فى الطريق ………….ها ها ها ها ها .

طبعا مش عارف اوصفلكوا المطر كان عامل ازاى . المهم و بمجرد ما بعدنا شويه عن المدينه بدأت الأمطار تهدأ شويه بشويه لغاية ما توقفت خالص بس الجو فضل مغيم جامد جدا .

وصلنا الى مركز حدود هونج كونج ونزلنا و سيبنا الشنط فى الأتوبيس و وقفت فى طابور الأجانب تانى . الظابطه لما مسكت الباسبور بتاعى ندهت لواحد ظابط تانى و قعدوا يتكلموا شويه مع بعض و بعدين قالت لى ممكن تتفضل معايا شويه على جنب .

قلبى الصراحه وقع فى رجلى . يكونش فيا شبه من بن لادن أو حد فاقعنى زومبه هونج كونجيه و قايلهم ده معاه بانجو مثلا .

المهم دخلونى اوضه صغيره كده و قالت لى ثانيه واحده . طبعا لن استطيع ان اصف مدى القلق اللى كنت فيه . الغرفه دى واحده من غرف متعدده اللى جنبى كان فيها واحده ست معاها طفله و الأتنين نازلين عياط .

شويه جاتى لى واحده ظابطه تانيه و قالت لى انت عندك مشكله صغيره قلت لها خير يارب .

قالت : شوف انت التأشيرات بتاعتك كله تمام ماعدا تأشيرة دخول الصين .
قلت لها : ازاى ده انا جاى من الصين اساسا .
قالت : ايوه … ماهو عشان كده . انت التأشيره بتاعتك دخول لمرة واحده و انت طالب تدخل لمره تانيه .
قلت لها : طيب وايه الحل ده الحجز بتاعى من الصين و شنطتى فى الصين يعنى لازم ادخل الصين .
قالت : احنا دلوقتى بنحاول نتصل بمركز الحدود الصينى علشان الموضوع بتاعك لكن المشكله ان هما ماعندهمش الصلاحيه يدوك تأشيره دخول و الصلاحيه دى اما فى مركز الحدود بتاع القطارات او من داخل هونج كونج .
قلت : يا نهار اسود …. يعنى ارجع هونج كونج تانى …. ازاى حتى …. موتورجل ….. و فى الجو ده …. و فى الأعصار … وبعدين حتى لو رجعت النهارده السبت يعنى كله اجازة و لازم استنى ليوم الأثنين يعنى يكون حجز الطيران ضاع .
قالت لى : بس اهدا و احنا بنحاول مع مركز الحدود دلوقتى .
قلت لها : طيب و الأتوبيس ممكن يمشى و يسبنى و شنطتى فيه .
قالت : طيب انا هاكلم السواق بحيث يستناك .
سابتنى و مشيت و انا عامل اضرب اخماسا فى اسداسا . مشكله لم تكن فى الحسبان .

بعد شويه رجعت لى و قالت ان مركز الحدود الصينى وافق يدوك تأشيره بس عاوزين يشوفوك الأول .
قلت لها يعنى ايه … هايتفرجوا علّى …. طيب و اذا ما عجبتهمش و ما رضوش يدونى التأشيره اقعد انا زى عبد الودود ما بين الصين و هونج كونج و استوطن بأه و ابعت اجيب الوليه و العيال .
المهم الست قالت لى شوف فى أسوأ الأحوال اذا مارضيوش يدوك التأشيره احنا هاندخلك تانى هونج كونج و لمدة 15 يوم كمان و ابقى غير التذاكر و ادفع الفرق مش هايكون فيه مأساه اغريقيه يعنى .

المهم الست فعلا هديتنى خالص . المهم ركبت الأتوبيس و الركاب كلهم عمالين بيبصوا لى شزرا و انا فى منتهى القلق و مش مستحمل كلمه و على الآخر.

المهم …. وصلنا مركز الحدود الصينى … و هناك لقيتهم مستنيننى . المهم دخلت للبيج بوس و شرحتله الموضوع و بعد ما شاف الباسبور و اطلع على دعوة المعرض و الكارنيه بتاع المعرض – كنت محتفظ بيه – قال لى
و انت عاوز التأشيره لمدة اد ايه قلت له لمدة 6 ساعات الحق الطياره قال بس فيه مشكله قلت له فيه ايه تانى ( الله يخرب بيتك فى بالى ) قال لازم تدفع رسوم التأشيره تانى ..تنهدت وارتحت و قلت له بس خايف السواق يمشى و يسيبنى …. ابتسم ابتسامه صفرا كده و قال مش هايمشى …… مش هايقدر يمشى .

خلصنا الأجراءات و طلعت علشان اروح الأتوبيس لقيت فيه مضيفه تبع شركة الأتوبيس مستنيانى و هما بيعرفوا الركاب بتوعهم من علامه بنلزقها على الهدوم كل شركه بلون مختلف و خدتنى جرى على الأتوبيس و لقيت الأتوبيس محطوط عليه حراسه مسلحه و تحت التحفظ .

ركبت الأتوبيس و كنت تسببت فى تأخيره لمدة ساعه و نص ( بضحك طبعا على الراجل بتاع العشر دقائق ) و كنت على آخرى و واحد من الركاب اول ما طلعت لسه بيقول لى مش كنت تعمل حسابك كده انت أخرتنا و عطلتنا . بصراحه ….ماخلتلوش لاهو و لا حد من امة الصين كلها و فاصل من الردح بكلام من العيار الثقيل . مش شتيمه لكن كلام سياسى من اللى هما مايقدروش يردوا عليه من نوعيه .....ياعم روح دانتوا هنود ......انجلترا ضحكت عليكوا و لبستكوا العمه ....... بلد واحده ايه دى اللى عاوزه تأشيره تانيه دى اسمها هونج كونج المحتله ..... انتوا بتضحكوا على نفسكو ولا على مين ........انا كنت فاكر الصين عندها سيادة على ارضها طلعتوا فاسكونيا ...... عشان كده مش قادرين تاخدوا تايوان ولا عمركو حاتشوفوها لغاية ما تتشجعوا شويه و تكبروا و تبقوا قد امريكا...... احنا كان عندنا حته كده محتله اسمها سيناء بس اما خدناها خدناها بدون تأشيرة دخول ليه و ابقوا تعالوا نعلمكوا بلد واحده يعنى ايه . و كلام كثير من ده بعلو صوتى .

كل الأتوبيس حط وشه فى الأرض و ماحدش رفع صوته طول السكه . و قبل ما نوصل قمت و اعتذرت لهم على انفعالى عليهم لكن مش على الكلام نفسه و قلت لهم ان دي غلطتهم ان ماحدش نبه عليا بهذا الكلام اللى حصل .

يتبع