تغطيه الاحداث والتحاليل والاخبار لحظه بلحظه

[cheetosmini]

كفاية كلام عن الخراب قولولنا هنصلحة اذاى احسن

[MmFFoR]

من هم مناصروا الريس اللي شفناهم في ميدان التحرير؟
من هم طلائع جيش التحرير اللي راحوا يحرروا ميدان التحرير دول !
الناس دي انا للاسف كنت بعاملهم شخصيا و كنت في وسطهم اثناء انتخابات مجلس الشعب
دول من الاخر تشكيله من- موظفين يعملون في شركات اعضاء مجلس الشعب في وظائف دونية ليس لها اهمية و لكن تبرز اهيتهم عادة في انتخابات المجلس مثل الامن او اشراف عمالة او اي حاجة مفيهاش شغل و نلقبهم بالمطبلاتيه او وسايط الانتخابات و هاؤلاء تابعين لدائرة العضو و غالبا في الاحياء الشعبية و العشوائية و الفقيرة
و جميعهم متعاطوا ترامادول و حشيش و احيانا بانجو يوفرها لهم قائدهم

- مأجورون و دول بيبقوا اقارب الفئة الاولى و لكن عواطليه فعلا و مهمتهم التطبيل و الزمر و الزيطه و دول بيبقوا بالطلعه يعني بياخدوا من 100 - 500 جنيه في الطلعة على حسب قصيرة او طويلة و فيها ضرب او مفيهاش

- مندوبو الشرطة و دول بيبقى اعلى من المجند علطول كل اللي داخل و خارج من القسم بيديله على قفاه

- مجندي الامن المركزي: بتأتيهم تعليمات بارتداء زي ملكي (يتم توفيره لهم) و توجيههم لاداء مهمات قذرة بالامر و يا ويلهم لو منفذوش

- امناء الشرطة : دول بقى حالة خاصة جدا لانه اقل من ضابط الشرطه و لكن اغلبهم يظن نفسه افضل من ضابط الشرطه لانه يقوم باغلب الاعمال فيما الضابط جالس و بالتالي فهم من يكلف بالاعمال القذرة من التعامل مع البلطجية و غيرهم لتنظيم الصفوف و من يتعامل مع رشاوي البيه الضابط التابع له! و لظروف عمله بيكون ماسك الضابط من ايده اللي بتوجعه و ماسك عليه ميت ذله و ذله و احيانا الضباط انفسهم يتحاشوهم! لذلك يمكننا ان نصنف الامناء انهم الاكثر فسقا و بطشا و فسادا في قطاع الامن... و هؤلاء غالبا هم قادة البلطجية

- مرشدين الشرطة : دول اساسا بيكونوا مسجلين خطر و يتم اختيارهم لو وافق انه يبقى مرشد , دول بقى اخطر ما يكون في الحياه المصرية عامة, بيبقى مسجل خطر محكوم عليه ب 7 سنين بيقضي 6 شهور بس و بيوافق انه يبقى مرشد, يطلقوا سراحة يمارس ان نشاط هوا عايزه و لو حصلت اي قضيه في منقطة نفوذة بيبلغهم بيها علشان يبقى حلوا قضيه و يكافئوا ( الضابط و الامين) و لو حد اهتم بحاجه حصلت في منطقة المرشد بيستدعوه و هوا يقولهم مين عمل ايه!!! طبعا دي حاجه كويسه بس في المقابل المرشد ده بيعمل البدع و القسم ملهوش دعوة بيه! من اتجار و بلطجه و سرقه بالاكراه و خلافه طول ما ريحته مفاحتش للكبار بيسيبوه يخرب زي ما هو عايز ! و طبعا لما بيحتاجوه في دور واجب ميقدرش يقول لأ (زي غزوة التحرير)

- مسجلي الخطر: و دور مجرمين بكل معنى الكلمة و هو من حكم عليه في اكثر من 3 قضايا جنائية يعني سوابق مع سبق الاصرار و الترصد!!! ده اقل خطرا من المرشد و اقل تنظيما من الامين و لكنه اليد الباطشة و دول يقوم المرشد بتجميعهم عند الحاجه للحضور للبيه (الامين او المأمور) و يتم نفحهم بحافز مادي (غالبا 100-200 جنيه انا استعملتهم سابقا) و عندهم استعداد لعمل اي شيء من مشاجرات الى بلطجه الى تزوير اصوات او اعتداء على الامنين!

دول كل العناصر التي يحتاج اليها اي عضو مجلس شعب محترم علشان ينجح في الانتخابات!
و اعتقد ان النجاح الباهر في الانتخابات السابقة قد سال لها لعاب الريس ! انهم يحققوا له نجاح باهر


للعلم فقط العناصر الاول و الثاني غالبا بيكونوا اعضاء حزب وطني

[خالداعزالناس]

يارب الامور والاوضاع تهدأ
لان بالمنظر .... والشكل اللى موجود الان
كل حاجه هتغلى .........و الاسعار هتكون نار
على الشعب كله

[خالداعزالناس]

يارب يوم الجمعه
04/02/2011 م
يكون أخر ايام المظاهرات والقلق ... فى كل مكان من ارجاء مصر
وتعود الحياه الى طبيعتها من يوم السبت ان شاء الله

[MIDO-SPICY]

انا عايز اقول انى لسه شايف على التليفزيون المصرى دلوقتى مداخلهمن شاب اسمه تامر مقدرتش اعمل او اقول حاجه بعدها غير انى اخد سيجارتى واخرج اقف فى البلكونه علشان ادارى دموعى وحرقة قلبى واللى مقدرتش انى اوقفهم ..

الشاب بيتوسل للتليفزيون وهو منهار تماما من كتر البكاء انه يتواصل مع الشباب قبل بكره ويقولهم يروحوا

هو واحد من اللى بقالهم 10 يام فى الشارع ولما احتكم لصوت العقل روح هربان علشان ماحدش يقول عليه انهخاين

ومعرفش قرار الحربيه بامكانية انهم يروحوا غير لما راح عند اقارب ليه فى غمره

وبيتوسل للتليفزيون انه يوصل التحرير دلوقتى ويبلغ الشباب بالقرار دا

فين ناس كتير جدا عايزه تروح وخايفه من امن الدوله

بيقسم بالله العظيم اكثر من مره ان فيه ناس مش مصريين دلوقتى جوه المظاهرات وكانوا معاهم من اول يوم بيتكلموا معاهم وكانوا بيتظاهروا معاهم وبيجيبولوهم وجبات وشاى وسجاير وبيعملولهم اللافتتات اللى هما عايزينها وقاعدين ياثروا عليهم طول الليل

وقال انهم قالولهم ان بكره جمعه الوداع .. وداع لمين ؟؟؟

وانهى مكالمته وهو فى حالة اعياء من كتر البكاء

بالماسبة مزيع القناه طلب منه انه يجى دلوقتى على التليفزيون علشان يتكلم معاه وحولوا الخط على الكنترول علشان ينسق معاهم هيجى ازاى بس الولد مابداش قبول او رفض

_________________________ _________________________ ____

انا حاسس يا جماعه ان مصر بتسقط .. مصر تعدت مرحلة الثورة واصبحت فى حالة حرب .........

وحرب على مين ... حرب علينا احنا مش على شويه مبانى ولا على شويه فلوس نقدر بتعبنا وعرقنا اننا نعوضهم واحنا فخورين باللى عملناه

دى حرب ابادة للشباب اللى انا فى قمه حزنى انى ماكنتش معاهم علشان افضل فخور بنفسى باقى عمرى ادام نفسى وادام بنتى وادام عيلتى وبلدى

حرب اباده للشباب اللى رفعوا اسم مصر فوق قوى .

حرب اباده للشباب اللى ماحدش قدر يعمل زيهم مش من 30 سنه لا يمكن من 50 سنه او اكتر

حتى ثوره يوليو الشهيره اللى عملها مش شويه شباب عزل .. لا دى قياده جيش ليهم سلطه ونفوذ فى البلد ومعاهم سلاح ثقيل

مش عارف اعمل ايه للناس دى علشان احاول اجنبهم ولو ا % من اللى ممكن يحصلهم بكره

دمهم هيروح هدر

مش لاقى غير انى اقوم اتوضى دلوقتى واصلى وادعى ليهم ان ربنا يحميهم بكره من عنده ويبعد عنهم اى شر ويبيد الظالمين

الناس دى مش عايزه حاجه اكتر من انها تحس انها ليها كرامه فى بلدها ودى ابسط حقوقهم وكون ان الحكومه تنفذلهم دا فدا مش تفضل منهم وانما دا واجب عليهم

يارب حافظ علينا وعلى بلدنا وابعد عنا اى شر ..

اللهم اضرب الظالمين بالظالمين واخرجنا منهم سالمين

يارب رجع لاخواتنا فى ميدان التحرير دلوقتى رشدهم وعقلهم قبل ما تحصل الكارثه اللى كلنا هتسيب جوانا شرخ كبير

وبطلب من جميع الاعضاء اللى فى المنتدى انهم بكره فى صلاه الجمعه ان امام المسجد يدعوا فى صلاته ليهم وان ربنا يخرجنا من اليوم دا سالمين

يارب

انا بكتب المشاركه دى فى اكتر من موضوع دلوقتى علشان اكبر عدد من الاعضاء يقروها ويدعوا معايا للشباب دى ويدعوا وهما بيصلوا من دلوقتى لبكره فى صلاة الجمعه