لتانى مرة ارجوكم المساعدة فى شراء عربية فولكس باراتى

[الدوق]

الاخوة الافاضل
والله اشهد الله ان احب الجميع هنا فى الله وخاصة من يقدمون النصيحة خالصة لوجه الله لمساعدة الاخرين
اخوكم من سوهاج وكنت عملت موضوع قبل كده انى بادور على افضل عربيات فى حدود 40 الف
ولاقيت الباراتى والفابيا
بس انا ميال جدا للباراتى لان العيلة بتكبر وانا مش ناوى اغير قريب , بس سمعت عن مشاكل فى قطع الغيار انها مش موجودة
وانا حاليا قدامى باراتى 2006 مش محتاجة حاجة غير فانوس خلفى يمين
صاحب العربية بيقول ان توكتوك خبطه وهو معدى من غير ما يخبط العربية
العربية حالتها كويسة ومفيهاش حاجة عاوزة مصروف وهو طالب فيها 40 الف جنيه
فهل لو حالتها زى ما قولت لك كده يبقى سعرها كويس .. وممكن تخلص على كام ؟
سؤال تانى انا عاوز لو اشتريتها اغير لها الحاجات دى علشان اريح دماغى منها
طقم دبرياج - سير كاتينة بالبلية - سير دينامو - طقم بوجيهات - زيوت - فلاتر ( هواء - بنزين - زيت ) - ممكن كمان اغير موبينة وسلوك علشان ابقى فى المضمون
بالاضافة الى الفانوس الخلفى
الاقيهم فين واسعارهم ايه .... ولا بلاش من الباراتى مع انى باحب العربية دى
انا محتار جدا
مشكورين جميعا مقدما وبارك الله فيكم

[maby3rafnesh]

العربيه كاعربيه وبالسعر ده صفقه ممتازه
العربيه اعتماديه جدا وقويه من حيث الاداء فعلا مش هتلاقي حاجه بالسعر ده او اكتر منه بعشر تلاف جنيه فى قوه العربيه دي

لكن الحلو ميكملش

هتحتار شويا فى قطع غيارها .. هيا موجوده وغاليه شويه بالنسبه لسعر السياره لكن مش غاليه بالنسبه لسياره مقابلها فى رنج ال 100 الف مثلا .. وبرده احيانا مش هتلاقي كل قطع غيارها وهتلف شويا عليها لكن فى الاخر موجوده انشاء الله

فيه نقطه انصحك بيها بحكم ان العربيه دي بتاعت قريبي وانا تقريبا سقتها كتير جدا
لو العربيه فابريكه وجديده وحالتها كويسه توكل على الله وحافظ عليها واعملها صيانات دوريه هتلاقيها اجمل من كده مفيش بالنسبالك
لو العربيه حالتها مش كويسه وهتعوز مصاريف بلاش منها

[maby3rafnesh]

انا لسا واخد بالي ان الموضوع قديم وليه سنه هههههههههههههههههه

المنتدي هنا شكله نايم جدا ومفهوش حد يفيد حد حتا لو بكلمه

[AbOnOrA]

المشاركة الأصلية كتبت بواسطة maby3rafnesh انا لسا واخد بالي ان الموضوع قديم وليه سنه هههههههههههههههههه المنتدي هنا شكله نايم جدا ومفهوش حد يفيد حد حتا لو بكلمه

هههههههه اللى بيتكلم ده عضو من 2009 كل مشاركاتة 7 مواضيع استفسارات اتجاوب على خمسة منهم هو اللى بيسال فيهم مبيقدمش معلومة ولا بيعمل تقرير وهو برضو اللى جاي يسال المنتدى نايم ليه ؟ ومحدش بيفيد ولو بكلمة واحدة ؟؟ تحب اعدلك كم الردود للى جاتلك على استفساراتك ومن كام عضو من 2009 دلوقتى ؟؟؟؟ اكيد هيطلعو اكتر من كلمة واحدة زى ما تريقت وقولت وده يخليك تعتذر لعشرات الاعضاء اللى رد على استفساراتك قبل كدة ولمشاركات ومواضيع عشرات الالف الاعضاء اللى عملو افادة ومواضيع وتقارير حضرتك مساعدتهمش واستفدت منها اكيد وداخل تتريق عليها

نايم علشان فيه اعضاء زى حضرتك ده لو عايز اجابة مباشرة
الادارة بتعمل اللى عليها يوميا وبتوفر المنتدى شغال وبيستخدم من 30 - 50 الف عضو على الاقل
واكيد محدش ينكر ان المنتديات عموما بقت اقل نشاطا احنا فى مصر موتورز كنا بنعمل ضعف الارقام ديه لكن ده حال المنتديات عموما بعد انتشار الفيسبوك بعد الثورة وكل واحد فى نص دقيقة بيعمل جروب او صفحة وبقى عندنا مليون منتدى عربيات على الفيس لكن تقدر تدور فيهم على معلومة او موضوع قيم بجد مفيش لكن فى الاخر ليك الاختيار تشارك فى بمسئولية وتفيد غيرك هنا او ترمى اسئلتك فى جروب على الفيسبوك انت حر