قرار صعب جدا ... أرجو من ملاك اسبرانزا a516 مساعدتي عليه

[dr.darsh]

بسم الله الرحمن الرحيم

أنا قررت أمد لحافي على قد رجلي
واستبدلت رغبتي في تقسيط عربية من فئة 90 الى 100 ألف
وقررت ان أجيب عربية كاش في فئة من 60 الى 70 ألف

طبعا أنا ما يناسبنيش عربية هاتشباك صغيرة ولذلك استبعدت الفئة دي كلها من حساباتي
واصبحت منحصر كالعادة في اطار المقارنة التقليدية بين الفيرنا واللانوس والاسبرانزا

الصراحة أنا شفت ال 3 عربيات وماحستش بأي انجذاب غير للاسبرانزا
مش من حيث الشكل (لأنه ما يهمنيش قوي أنا راجل عملي) لكن اللي جذبني للعربية هو وسع الصالون
وخصوصا ان الواحد ما شاء الله (أحسن أتحسد) مليان حبتين ومش من ذوي القامة القصيرة

_أنا عندي 25 سنة والمهنة طبيب (على الورق بس) واستخدامي للعربية معتدل يعني مش (محسوك) أو رقيق في استخدامي وفي نفس الوقت مش عنيف ولا مؤذي برضه.

_مشاويري تنحصر جوه البلد صباحا من البيت للمستشفى و مساءا مع اصحابي بنصج (بس في حدود)
وفي الوسط ممكن شوية مشاوير صغيرة للبيت.

_طبعا أنا من طنطا يعني بلد صغيرة وتتلف من أولها لآخرها في نصف ساعة.
يعني لو قررت أني أروح أي مشوار في طنطا صعب جدا ياخد من أكتر من ربع ساعة (الى بقى اذا كانت زفة ولا حاجة في المرور).

_في معظم الأحيان عربيتي بتبقى مليانة سواء بحد من العائلة أو مع أصحابي وخصوصا في السفريات ودي أكتر حاجة شدتني للاسبرانزا (وسع صالونها).

_سفرياتي بسيطة جدا ممكن كل شهرين تلاتة علشان أفكر أروح القاهرة أو اسكندرية.
وممكن أنزل البلد مثلا مرة كل أسبوع ولا حاجة ودي مشوارها ماتعديش 20 كيلو.

_بمشي في طرق معتدلة الى مكسرة مع المطبات العادية بتاعتنا (يعني في الطبيعي)

_طبعا اللي حكيته ده هو ممكن يكون على أسوأ تقدير من ناحيتي
لأن مش بعيد خلال سنة ولا اتنين يكون الواحد خطب ولا اتجوز وساعتها استخدامي ممكن يقل النص.
_وممكن برضه الموضوع يبقى أسوأ لو ظروف عملي حكمت.

_استهلاك البنزين وقطع الغيار يفرق معايا ..... بس مش بشكل كبير قوي (لأني ماعنديش التزامات اسرية)

طبعا أنا قدمت شرح وافي لظروفي واستخداماتي للعربية
أنا شخصيا مفضل الاسبرانزا....
انتم أيه رأيكم...ممكن العريبة دي تستحملني؟!
ولا أضحي بالصالون الواسع والقعدة المريحة في سبيل اني أجيب عربية تستحمل أكتر؟!
يهمني طبعا في المقام الأول اني أسمع رأي ملاك السيارة
لكن ده ما يمنعش برضه أني أسمع رأي بقية الأعضاء اللي بثق فيهم وفي نصائحهم

آسف جدا للأطالة...........ومنتظر رأيكم

[bmkbmk]

السلام عليكم ازيك يا باشا
معلهش هو انا مش هقدر افيدك فى الموضوع ده لقلة خبرتى فيه .. بس انا عموما مافضلش الصينى
هو اللى انا عاوز اعلق عليه انك من طنطا يعنى احنا بلديات ... و انا جايلكم على طنطا بعد اسبوع ان شاء الله
و نشوفك على خير يا باشا...و ربنا يهديك للعربية اللى فيها الخير و المصلحة

[Dr. Bolbolan]

شوف يا أخ درش يا أبو زمل ! أنا موش بأكره الصينى و لا بأحبه ! بس أنا مقتنع ب 3 حاجات :-

1- العربيات ( قرف ) بكسر القاف ! يعنى ممكن تجيب سيارتين من المصنع على الزيرو من أقوى ماركه

و تلاقى واحده زى الفل و التانيه من أول يوم فيها ماقاله مالك فى الخمر !

2- ما تفرقش كتير ماركة السياره لو هى على الزيرو و استعمالها معقول ! بشرط يكون السائق فاهم

كويس جدآ فى السيارات و ايديه فيها على طول !

3- اللى قلبك يستريح له خش عليه ! و اعتبر أى سياره حاجه بتقضى الغرض و خلاص و ماتفعدش تحسبها

زى بعضهم ! ح تجيب كام لما أجى أبيعها ؟؟ أنا قلتها قبل كده ان دى زى الزواج ! أنت لا تتزوج بنية الطلاق !

لكن لو قلت بأصلها ولع فيها و موش ح تاخد اعدام على الآقل ( موش ح تروح لعشماوى ) !!


Dr. Bolbolan ptmnlo123per1127

[bmkbmk]

والله فعلا يا دكتور بولبولان .... حكيم المنتدى
كلام حضرتك مقنع جدا .....

[AbOnOrA]

طيب معلش يا دكتور سؤال تانى

حضرتك سهل بالنسبالك تكون مترتبط بالتوكيل فى الصيانات الدورية والاصلاحات
اذا كان مفيش مشكلة يبقى الاسبيرانزا تمام اذا كانت ديه مشكلة يبقى خليك فى الفيرنا والانوس لانهم بيتصلحو فى اى حتة وقطع غيارهم فى كل مكان

وهل ديه اول عربية تشتريها ولو كنت معاك حاجة قبل كده نوعها ايه
اذا كانت اول عربية يبقى الاسبيرانزا تمام
اذا كنت اتعودت على قبل كدة على عربية ادائها قوى واستجابتها سريعة الاسبيرانزا هتدايقك شوية لحد ما تاخود عليها

وعامة توقع من اى عربية فى الشريحة ديه ( لانوس - فيرنا - افيو الخ الخ )
عيوب تقفيل ومشاكل صغيرة ومنغصات (وزى ما قال الدكتور بتبقى قرف) وممكن ميبقاش فيه مشاكل خالص
بس حتى ان ظهرت بعض المشاكل بتكون بسيطة وسهله فى الاصلاح ومبتعطلش العربية

ولا تنسى الاستخارة بعد الاستشارة وباذن الله ربنا يوفقك للاصلح