تجربتى مع التاكيهات خلوا بالكو يا ناس

[zamanan2000]

اعزائي واحلى اخوات
هحكيلكم النهاردة تجربتى انا ولوزة مع التاكيهات اللى طلعت قصة كبيرة وانا مكنتش عارف
الاول المشكلة بدات لما لوزة صوتها بقى عالى اوى وعامل زى صوت العربيات اللى بتشتغل بالجاز طبعا كلنا عارفينه صوت النص نقل والميكروباص
المهم انا محطتش فى دماغى زى عادتى ( وهو ده اللى بيودينى فى داهية وبيزعل لوزة منى دايما ) المهم مطولش عليكم قولو طول انا رحت للميكانيكى القديم بتاعى قلتله وطيلى صوت المكنة والراجل وطاه بس الصوت نفسه بقى مختلف طبعا اللى متعودين على ال128 هفهموا مقصودى من اختلاف الصوت
المهم بالصدفة بعد يجى شهرين تلاتة ظهر عندى عيب غريب وهو ان تانك البنزين كل ما اجى افول ينزل بنزين من ورا وريحة البنزين فى العربية علطول
قلت ياود متسكتش كله الا البنزين لتكون معدة لوزة فيها حاجة
رحت للدكتور احمد الميكانيكى ربنا يباركله وقالى على العيب ( كاوتشة التانك نشفت وشققت )
بس بالصدفة وهو بيجرب سمع صوت المكنة عندى قالى استنى انت لازم تروح تظبط تاكيهات :bb12 7bc6eab060e3e23
قلتله ايه التاكيهات دى قعد قالى كلام كتير مفهمتوش المهم انى فهمت ان المفروض اروح اظبط التاكيهات دى كل 6 شهور او فى داخله الصيف والشتا ومش بتكلف اكتر من 20 جنيه قول 50 لو غيرت جلب واطباق واديت الدخان للصنايعى
المهم توكلت على الكريم ورحت اعمل اللى قالى عليه

وهى دى النقطة اللى بحذر كل اخوانى منها

طلع ان علشان اهمالى فى التاكيهات بوظتلى الكامة او زى ما قالى الصنايعى الكامة اتاكلت ودى لو كنت طنشتها شوية كمان كانت هتضيع الصبابات وبالتالى ادخل فى قصة عمرة

المهم سالت على التكلفة طلعت 300 جنيه مبدئيا
شفتو الاهمال عمل فيا ايه

من 20 جنيه ظبط تاكيهات بقت 300 جنيه تغير كامة ولو كنت طنشت تانى كانت هتدخل فى عمرة مش هتتكلف اقل من 2000 جنيه : 08A742~169:

طبعاانا طولت عليكم بس حبيت احكيلكم الحكاية علشان كل واحد ياخد باله من عربيته لان الصغير بيجيب الكبير والكبير بيجيب الاكبر وربنا يكفينا ويكفيكم جميعا الشر
انشاء الله انا هروح اغير الكامة يوم الجمعة الجاية واول ما ارجع هحكيلكم ايه اللى حصل ادعولى بقى الموضوع ميكبرش اكتر من كدة

[akerima]

الف حمد لله علي سلامة اللوزه وربنا يقومهالك بالسلامة - فعلا التكيهات حاجة مهمة جدا في العربية وهي عبارة عن الصمامات اللي بتسمح اما بمرور البنزين للصبابات او بخروج العادم من الماتور ولما التكيهات مبتبقاش مظبوطة لا البنزين بيدخل الماتور بانتظام ولا العادم بيخرج بانتظام وطبعا دا باثر علي سحب العربية بيؤدي لسخونة الماتور فوق معدلاتة الطبيعية يعني مش موضوع عامود كامة بس التكيهات بتاثر في ماتور العربية ككل

يقدر البني ادم يعيش من غير ما يبقي عنده فم و ......... كمان العربية متقدرش تعيش من غير ما يبقي عندها تكيهات مظبوطة

[zamanan2000]

المشاركة الأصلية كتبت بواسطة akerima الف حمد لله علي سلامة اللوزه وربنا يقومهالك بالسلامة - فعلا التكيهات حاجة مهمة جدا في العربية وهي عبارة عن الصمامات اللي بتسمح اما بمرور البنزين للصبابات او بخروج العادم من الماتور ولما التكيهات مبتبقاش مظبوطة لا البنزين بيدخل الماتور بانتظام ولا العادم بيخرج بانتظام وطبعا دا باثر علي سحب العربية بيؤدي لسخونة الماتور فوق معدلاتة الطبيعية يعني مش موضوع عامود كامة بس التكيهات بتاثر في ماتور العربية ككل يقدر البني ادم يعيش من غير ما يبقي عنده فم و ......... كمان العربية متقدرش تعيش من غير ما يبقي عندها تكيهات مظبوطة

الله يسلمك akerima يا غالى تصدق ان رغم كل الموال اللى انا فيه ده مكنتش برضه فهمت ايه موضوع التاكيهات ده كل اللى اعرفه انه عمود فى الماتور تسلملى يا رب على المعلومة

[نصرالدين حلمى]

حمدلله على السلامة يأخى
وقضاء اخف من قضاء
وان شاء الله لوزة تكون احسن من الاول

[zamanan2000]

المشاركة الأصلية كتبت بواسطة نصرالدين حلمى حمدلله على السلامة يأخى وقضاء اخف من قضاء وان شاء الله لوزة تكون احسن من الاول

ربنا يبارك فيك يا استاذ نصر الحمد لله على كل حال المهم بس الناس تاخد بالها ومتغلطش غلطتى وهو ده المقصود من الموضوع والحمد لله على كل حال