تعالو نفتكر مع بعض

[احمد بدر1978]

تعالو نفتكر مع بعض
كام مرة خبطت عربيتك
عملت كام حادثة فى حياتك؟؟؟؟؟

[Injection]

اللى عملتهم 3 بس:-
الأولى كانت فى جراج الجامعة, كنت برجع علشن أركن عمودى على رصيف, أنا غالبا برجع بسرعة, وأنا برجع لقيت واحد جاى من قدام وبيبصلى من عربيته, فشغلنى وهوبا دبببب فى ضهر العربية النص نقل, هو فانوسه الورانى أتكسر وحصل عوجة بسيطة جدا فى الصاج عنده, وأنا وش الفانوس ضاع, والرفرف اليمين خاف ودخل أستخبى بتاع 2 سم جوه العربية, وطبعا أستنيت الراجل على ما جه وأديته تمن الفانوس.
الثانية كنت ماشى فى شارع ضيق أتجاهين, ترعة الجبل, والطريق واقف, والعربية كان بقالها بتاع شهر مكتومة لابتسحب ولا بتفصل, المهم الطريق قدامى فضى, وكان ورايا عربية نص نقل سايقها شاب, فطلعت بسرعة, وفجأة تاكسى طلع من اليمين فدوست فرامل, قام الحم..,الحلو اللى ورايا لازق فيا وطبعا أنا لابتاع خناقات ولادياوله فسبته ومشيت, مع العلم أنت مفيش أضرار حصلت فى العربية وأنا منزلتش أبص أصلا.
المهم, أنا كنت قلت أن العربية ماكنتش بتسحب, وبعد لف ودوران وتغيير حساس الشكمان, بدوس على دواسة البنزين بعد الحادثة علطول لقيت طياااارة, والعربية بتسحب بغباء, تقريبا الراجل لما خبطنى خبط الشكمان, وكان فيه عوجة أو حاجة سداه, وبعد الخبطة السحب بقى خطيرررر.
الحادثة التالتة كنت ماشى فى شارع المطرية الساعة 6 الصبح وكنت بعدى من تاكسى سكودا, فجأة لقيت العربية حدفت يمين جامد وكنت هشيل التاكسى, قمت حاود شمال علشان أبعد عنه لقيت العربية طلعت على الرصيف بالجنط الشمال قمت جايب مين, ووقفت لوحدها بعد كده, ونزلت أعتذرت لسواق التاكسى بعد ماوقفت على جنب, أتارى الفردة الشمال فرقعت والجنط الحديد أنثنى, قعدت أغير فيه والفرامل سخنة نار ومشيت بعد حوالى نص ساعة.
والجراج اللى بركن فيه حدث بلا حرج, لازم من كل 5 أخد العربية مة فيهم تتحك, الجراج مايسعش غير 5 عربيات وكله عواميد حيطان والخمس عربيات وعلشان أركن لازم أجيب مارشيدير حوالى 3 مرات وأولانى 3 مرات على الأقل فى الركنة الواحدة.

الدروس المستفادة: أوعى تخبط حد وتجرى أبدا, لو هو معرفش يجيبك ربنا هيجيبك, وهتتظبط أخر تظبيط, وحتى لوما معكش فلوس الراجل ممكن يسامحك فيهم, بدل ماتمشى بتأنيب ضمير وتبقى ظلمت حد تانى بسبب غلطة منك.
أوعى تفقد تركيزك وأنت سايق لأي سبب, حتى لو نانسى عجرم راكبة معاك, السواقة أساسا رد أفعال ولو أنت مش مركز مش هتعرف "ترد" وهتعمل حادثة.
أوعى تتخانق مع حد أبدا خليك دايما هادىوبارد, ولو حد خبطك ومرضيش يعترف بغلطه ياتعمل محضر ياتستعوض ربنا, والخناق عمره مجاب غير وجع أعصاب, وفى الأخر تلاقى الناس بتقولك ربنا يعوض عليك, فخدها من قاصرها أحسن.
السواقة هى توقع غلطات الأخرين, لو جنبك ميكروباص ياتعدى من جنبه ياتبطأ علشان ميكسرش عليك, ولو عربية بتعديك من اليمين وفيه عربية تانيةقدام على اليمين تبقى عارف برضه أنه هيكسر عليك.
وأسف عل التطويل.

[mohamed100230]

انا اول خبطه ليه كنت سايق عربيه بلونيز في دار السلام وسواق ميكروباص فتح الباب وهوباااااا الباب بقى عامل دي بابا البار اللي بيطلع في الافلام الاجنبيه والبلونيز ولا كان فيها الهوا
تاني مره بوكس شرطه كان بيلف من جنبي راح لابس في الرفرف اللي ورا عندي وكنت سايق عربيه جيب وكنا ماشيين بطيء ساعتها ووقفت لما بصيت في مرايه الجنب وشفت ان البهيم اللي خبط بوكس شرطه وجنب عربيته شابك في الرفرف الحديد بتاع الجيب روحت مديها الاول وطالع خليت فانوس الاشاره والشبكه طلعو من مكانهم( بتوع البوكس طبعا مش الجيب)
تالت مره كنت رايح المهندسين وعند مجلس الدوله كده كان فيه بوكس برضو راكن بالعرض وجاي يطلع وشايفني جاي عمل نفسه مش واخد باله وطلع وانا عملت نفسي مش شايفه وخبطته ودي اول مره اشوف عربيه تلف نص دايره من الخبطه
ورحت نازل واتخانقت وكان يوم مطين
في حد عاقل يخبط بوكس؟؟ وقدام مجلس الدوله كمان؟؟
المهم يعني ان الناس اتلمت وجت سليمه الحمد لله

[Injection]

المشاركة الأصلية كتبت بواسطة mohamed100230 انا اول خبطه ليه كنت سايق عربيه بلونيز في دار السلام وسواق ميكروباص فتح الباب وهوباااااا الباب بقى عامل دي بابا البار اللي بيطلع في الافلام الاجنبيه والبلونيز ولا كان فيها الهوا تاني مره بوكس شرطه كان بيلف من جنبي راح لابس في الرفرف اللي ورا عندي وكنت سايق عربيه جيب وكنا ماشيين بطيء ساعتها ووقفت لما بصيت في مرايه الجنب وشفت ان البهيم اللي خبط بوكس شرطه وجنب عربيته شابك في الرفرف الحديد بتاع الجيب روحت مديها الاول وطالع خليت فانوس الاشاره والشبكه طلعو من مكانهم( بتوع البوكس طبعا مش الجيب) تالت مره كنت رايح المهندسين وعند مجلس الدوله كده كان فيه بوكس برضو راكن بالعرض وجاي يطلع وشايفني جاي عمل نفسه مش واخد باله وطلع وانا عملت نفسي مش شايفه وخبطته ودي اول مره اشوف عربيه تلف نص دايره من الخبطه ورحت نازل واتخانقت وكان يوم مطين في حد عاقل يخبط بوكس؟؟ وقدام مجلس الدوله كمان؟؟ المهم يعني ان الناس اتلمت وجت سليمه الحمد لله

ههههههههه, أضحك مع الشرطة.

انا الحمد لله هما ايام ال 128 كان تقريبا كل يوم حادثة

انا من النوع اللي بيسرح كتير وهو سايق المهم طالع الكوبري اللي قدمنا بال 128 المهم الكوبري وقف وانا ولا انا هنا وسرحان المهم هوب روحت لابس في شنطة عربية تاكسي 131 وطبقتهاله المهم قولتله اي حاجه عندك تلزمني الراجل قالي لا مش بقبل العوض قعدت اتحايل عليه مرضيش المهم ببص عندي لقيت الريداتير بالسلامه والكابوت دخل لجوه

ديه كانت اكتر واحدة عملتها

غير كدا حوادث عادية خدش علي خربوش علي شوية دلع في الصاج


مستنيك تحكيلنا حكاياتك يا كبير علي المشاكل اللي بتعملها لما بتخرج بعربيتك

اشجينا