حاجات تضايق وانت ماشى فى الشارع المصرى

[sayed2077]

مشاهد بشوفها كل يوم فى مصر من اهل مصر بتصيبنى بالغثيان والقرف من كل واحد بيعمل كدا
جرب مثالا تمشى فى شارع ويكون حيوى شوية او حتى مش حيوى هتلاقى الحاجات اللى هقولها ديه منتشرة فى كل الاماكن :-

1:انك تمشى وتلاقى كل محل بيبيع اى سلعه ما دائما هتلاقيه مش عارض سلعته على الرصيف لا ده كمان بياخد حته من الشارع اللى والده كتبهوله فى عقد مسجل بالشهر العقارى ان الحته اللى اخدها من الشارع ديه حق له وحده ولا يجرؤ احد انه مثالا يركن عربيته فى الشارع اللى هو المفروض ملكية عامه للجميع او مثالا الناس تمشى على الرصيف اللى هو المفروض مخصص لان الناس تمشى عليه .
2:دايما ولا بد ان مفيش محل لو مثالا مينفعش يعرض بضاعته بره المحل زى مثالا محل موبايلات فلازم طبعا و بقوة عقد الملكية اللى والده عملهوله فى الشهر العقارى زى ما قولا انه ياخد حته من الشارع بتاعه فيعمل اييه قالك يحط حديد او حجارة قدام المحل علشان مفيش عربيه تيجى تركن قدام المحل طيب ليه مفيش عربيه تيجى تركن قدام المحل قالك علشان اول حاجه الحته اللى فى الشارع اللى هو المفروض ملكية عامه للناس كلها ديه ملكية خاصه ليه فمينفعش ان حد يجى فيها تانى حاجه ان لو عربيه جت ركنت هنا العربيه ديه هتمنع الرزق (لا حول ولا قوة الا بالله ) ونسى ان الرزق بأيد ربنا وان مادام مكتوبلة رزق محدش يقدر يمنعه ابدا .
3:تالت حاجه بقى جرب مثالا تمشى فى شارع مثالا نقول زى شارع 9 فى المعادى وتحديدا عند محطة مترو المعادى اللى المفروض المنطقه ديه تكون من ارقى المناطق فى مصر اول حاجه هتلاقيها فى وشك اول ما تنزل من المحطه تلات اربع حمير مربوطين جنب صفيحة الزبالة اللى قدام المحطه وعلى فكره الحمير ديه بترحب بالزئرين وبعد الحمير هتلاقى عربيات كارو مرصصين بسم الله ماشاء الله فى نص الشارع بلا مبالغه و طبعا الناس تحمد ربنا ان فيه حارة واحد فقط ان العربيات تمشى منها بلا ادنى احساس بادنى شىء من الضمير الانسانى او الوازع الدينى اللى يقولهم ان اللى بيعملوه ده يعتبر من الكبائر والتى نهى عنها الرسول صل الله عليه وسلم .
4:اما الشىء الرابع تلاقى كل واحد قدام عمارته زارع فى الشارع اللى قدام بيته او عمارته حديد حتى لو معندهوش غير عربيه واحده فقط والباقى مش بيستعمله طيب ليه ياعم الحاج بتعمل كدا يقولك علشان محدش يجى يركن قدام بيتى ياعم الحاج هما بيركنوا قدام بيتك دول بيركنوا فى الشارع اللى المفروض يكون ملكية عامه يقولك لا قدام بيتى ومحدش يركن وكل واحد يركن قدام بيته طيب مالو على الكلام اللى بيقولوا ده يبقى كل واحد بقى رايح مكان يشترى شقه فى العمارة اللى هيركن قدامها .
5:جرب مره تروح سوق شعبى مثالا ولنقول مثال على كده سوق السيده عيشه اللى بيكون فيه العصافير والكلاب والقطط وكدا لشهرته المهم السوق ده مقسم كالتالى محلات والمحلات ديه طبعا عارضه بضايعها بره المحل بدون شك طبعا فى الشارع بالعقد اللى اتكلمنا عليه قبل كدا وقدام قدام المحلات ناس واقفه فى نص الشارع اغلبهم مأجر المكان اللى فى الشارع من الراجل صاحب المحل اللى قدامه المكان وبصوا بقى وركزوا فى اللى جاية ديه والراجل اللى واقف بيبيع فى نص الشارع معاه بقوة العقد اللى برضوا والده كاتبهولة فى الشهر العقارى تلاقى ان الشارع اللى قدام فرشته اللى فى نص الشارع ديه حق من حقوقه ومسموحلك تقف فيها فى حالة واحده بس انك تشترى منه غير كدا هتلاقيه وبكل بجاحه يقولك امشى من هنا من قدامنا انت هتمنع عنا الرزق ولو اتخانقت معاه وقولتله انت اشتريت الشارع بكل بجاحه هيقولك اه اشتريته .

فى نهاية الاسكتش ده كل اللى قولته ده جزء صغير اووى من اللى بيحصل فى الحقيقة واللى بيحصل ده بيؤدى فعلا لمشاكل كتير اوووى منها مثلا اننا على طول لو هنروح مشوار مثالا لازم تعمل حسابك انك تنزل من بيتك قبلها بست ساعات علشان تحاول توصل فى معادك مظبوط وغير كدا الناس اللى بتعرض بضاعتها على الرصيف الرصيف ده المفروض حق للناس انهم يمشوا عليه مش حق لساعدتك انك تعرض بضاعتك فيه والشارع اللى بتعرض بضاعتك فيه ده حق للسيارات انها تركن فيه مش حق لحضرتك تعرض فيه بضاعتك او تحط فيه حديد وتخلى اصحاب السيارات يركنوا فى نص الشارع وبالتالى يحصل اختناقات مرورية وفى النهاية رزقك ربنا ما دام كاتبهولك فكده كده ربنا هيبعتهولك ومش علشان انت منعت ان عربيه تركن او عرضت بضاعتك فى نص الطريق يبقى ده اللى بيجيبلك رزق وان اللى بيحصل ده قبل ما يكون مخالف للقواعد الانسانيه فهو مخالف للعقيده والديانه اللى بننتمى ليها
انتهى.

[zing0]

عندك حق فى كل كلمة
الإهمال الأمنى و إنتشار البلطجة و التدنى الدينى و الأخلاقى بقى مسيطر علينا.
أنا كنت بسأل نفسى: ليه بأدفع ضريبة فى المرور, و عرفت أن دى علشان تدينا حق للمرور و الإنتظار و .... فى الشارع (من الرصيف للرصيف المقابل).
إنما دلوقتى تلاقى عربية كارو شايله عفش و عزال و ماشية تتمختر فى وسط الكورنيش
و فعلاً أمام محطة المعادى فى شارع 9 فى منطقة البنوك و السرايات سوق فتح قدامها و سواقين الأجرة إللى عاملين صف تانى و ثالث. و الجميل فى الموضوع أنك تلاقى بعد المشهد ده بـ 50 متر(بالضبط تحت كوبرى المعادى و أمام مسجد الرحمن) تلاقى كمين مرور و رخصك و واقفين بدفتر مخالفات....
- فيه أماكن بأتمنى فيها يكون معايا ماروتى, و فى أماكن بأتمنى أنى أكون ماشى من غير العربية, و فى أماكن لعنه, بأتمنى مكونش فيها أصلاً. و آخر حلم ممكن تحلمة أنك تفكر تركن!!!!

و يتبقى سرطان التكاتك إللى أكل جسم الشارع المصرى, و بيمشوا فى أى حتة , طريق سريع ,طريق مشاه ,مطلع كوبرى عكسى,و لا عسكرى يقدر يوقفهم , و تيجى تكلمه تلاقيه عيل صغير و لسانه أطول منه.

كفاية كده يا أستاذ سيد لأحسن ده أنا بيجيلى نوبات يأس من مصر كلها.

[momen_bondok]

إذا لم تستحي فاصنع ما شئت
1- أكون فى مشوار وارجع تعبان جدا الطبيعى إنك تركن وتطلع
الكلام دة كان زمان دلوقتى ترجع تستنى ساعة او ساعة ونصف على ما مكان يفضى والسبب سيطرة بعض ملاك العمارات على الأماكن اللى امام العمارة بالحديد والجنزير
سيطرة اصحاب المحلات والورش على الاماكن اللى امام المحل او الورشة ولو ركنت ما تعرفش اية اللى ممكن تلاقية فى العربية لما تنزل
2- تروح مشوار تلاقى واحد طالع لك من تحت الارض ويقولك خمسة جنية طب لية !!!!!!ّ أنت مين اصلا علشان تاخذ خمسة جنية من اللى قالك تقف هنا اصلا
انا حصلي موقف انا كل فترة بروح اودى أبي لمستشفى خلف موقف أحمد حلمى تمام
طبعا بنركن جوه الموقف فى الخلف وطبعا مش ماثر على الموقف نهائى الركن يعنى المهم يوم الاربعاء الماضى ذهبت الى هناك الاقى واحد جايب كرسى وحاطة انا ركنت عادى ولا كانى شايفى الاقية جاى بيقولي انت هتتاخر بقولة لية يعنى بيقولي انا بسئلك لانى اول مرة اشوف العربية دة طبعا ما رضيتش اجادل معاة وبصراحة كنت بكلمة بقرف قولت لية شوية ونازل
المهم طلعت ونزلت الاقية كان واخذ الكرسى وماشى اول ما شافنى انا ووالدي رجع تانى انا كان فى نيتى مش هديلة أكثر من جنية ولو طول هسيبة وامشى المهم ركبت عادى وهو كان , واقف عند ظهر العربية اللى راكنة جنبى طلعت من الركنة ووجهت وجه العربية الى الطريق وهو مازال واقف رحت ماشى ولا كانى شايفة اصلا قمة القرف بصراحة ربنا يتوب علينا من الاشكال دة

لا والغريب انك تقول للواحد منهم انت واقف هنا لية يقولك مش أحسن ما اسرق
يا سلاااااام يعنى انت مش عايز تسرق فى الخفاء تيجى تسرق اصحاب السيارات عينى عينك كدة

[myson medo]

[zing0]

المشاركة الأصلية كتبت بواسطة momen_bondok إذا لم تستحي فاصنع ما شئت 1- أكون فى مشوار وارجع تعبان جدا الطبيعى إنك تركن وتطلع الكلام دة كان زمان دلوقتى ترجع تستنى ساعة او ساعة ونصف على ما مكان يفضى والسبب سيطرة بعض ملاك العمارات على الأماكن اللى امام العمارة بالحديد والجنزير سيطرة اصحاب المحلات والورش على الاماكن اللى امام المحل او الورشة ولو ركنت ما تعرفش اية اللى ممكن تلاقية فى العربية لما تنزل 2- تروح مشوار تلاقى واحد طالع لك من تحت الارض ويقولك خمسة جنية طب لية !!!!!!ّ أنت مين اصلا علشان تاخذ خمسة جنية من اللى قالك تقف هنا اصلا انا حصلي موقف انا كل فترة بروح اودى أبي لمستشفى خلف موقف أحمد حلمى تمام طبعا بنركن جوه الموقف فى الخلف وطبعا مش ماثر على الموقف نهائى الركن يعنى المهم يوم الاربعاء الماضى ذهبت الى هناك الاقى واحد جايب كرسى وحاطة انا ركنت عادى ولا كانى شايفى الاقية جاى بيقولي انت هتتاخر بقولة لية يعنى بيقولي انا بسئلك لانى اول مرة اشوف العربية دة طبعا ما رضيتش اجادل معاة وبصراحة كنت بكلمة بقرف قولت لية شوية ونازل المهم طلعت ونزلت الاقية كان واخذ الكرسى وماشى اول ما شافنى انا ووالدي رجع تانى انا كان فى نيتى مش هديلة أكثر من جنية ولو طول هسيبة وامشى المهم ركبت عادى وهو كان , واقف عند ظهر العربية اللى راكنة جنبى طلعت من الركنة ووجهت وجه العربية الى الطريق وهو مازال واقف رحت ماشى ولا كانى شايفة اصلا قمة القرف بصراحة ربنا يتوب علينا من الاشكال دة لا والغريب انك تقول للواحد منهم انت واقف هنا لية يقولك مش أحسن ما اسرق يا سلاااااام يعنى انت مش عايز تسرق فى الخفاء تيجى تسرق اصحاب السيارات عينى عينك كدة

عندنا منهم فى المعادى بالهههههههههبل.
و الجميل أنهم مقسمين شارع 9 أجزاء و تلاقى السايس واقف و جنبه صول شرطة معاه دفتر مخالفات عاوز يملاه, و يا ويلك لو مدفعتش... (تبقى صف تانى على طول)
تقريباً مصر بقى نصها راكب عربيات و نصها "بيشرب شاى" على حساب أصحاب العربيات.