طريقة عمل صيانه لكربراتير ال 132 وال 131

[محمدصلاح القاضى]

من خلال عملى لمده شهر متواصل لكيفية الوصول للاداء المثالى
للاستهلاك البنزين وخصوصا كربراتيرات 132 و 131
تعلمت الكثير والكثير عن هذه الكربراتيرات
ومن خلال تواصلى مع موقع اجنبى فهمت الكثير ايضا
وسوف اقوم بشرح طريقة فك الكربراتير اولا
ملاحظات هامه :
1/ لازم ولابد تكون العربيه بارده او لم تستعمل لمده 3 ساعات على الاقل
عشان الكربراتير لو اتفك والعربيه سخنه هيفقع واستحاله انك تعرف تظبطته
يقفع ــــــ دى يعنى يحصل شبه انبعاج فى القاعده بتاعته يفضل ياخد هوا
واستحاله ينظبط
2/ يكون معاك مفتاح 12 مشرشر وتقوم بتكسيحه بالشاكوش على شكل زاويه قائمه
3/ وواحد تانى 12 عاده
4/ مفتاح عاده كبير ووواحد صغير
5/ مفتاح 10
6/ مفتاح 8 ويستحسن ان تتكون بيبه
نبدأ العمل
1- هنقوم بفك وش العمه عن طريق فك ال 3 مسامير بمفتاح 10
2- نطلع الوش بتاع العمه ونطلع الفلتر معاه
3- هنفك قاعده العمه عن طريق فك ال 4 مسامير ال 8 بالبيبه
4- نفك خرطوم البخر ( فايظ الزيت )
5- نطلع العمه برا وهيبان ساعتها الكربراتير
6- هتقوم بفك المسمارين 12 الاول من ناحية الشمال بالمفتاح العاده
7- هتقوم بفك الاتنين الاخرين بالمفتاح المشرشر القائم
ودا لان الكامه زانقه الدنيا وخصوصا المكنه ال 2 كامه
8- هتفك خرطومين المياه اللى ورا اللى راكبه فى السخان براحه
وتعرف مكان كل واحد فيهم فين
9- هتفك خرطومين البنزين اللى راكبين فى الكربراتير
وتخلى بالك من اماكن تركيبهم
10- كدا الكربراتير بقا حر تبدأ تشد الكربراتير لفوق واحده واحده
لحد ما يبدأ يطلع معاك وتطلعه برا
11- طلع الكربراتير معاك هنبدأ نفك مسمامير الوش اللى فوق
بالمفك العاده
12- هنسحب دراع الشفاط لبرا ونرفع الوش هيطلع بكل سهوله
13- هنخلع البكين اللى تحت فى الحوض بتوع الباب الاول والتانى
ونغيرهم طبقا للأتى
أ / لو الكربراتير عندك شغال بك سلانسيه كهربا
يبقى تشترى بكين مقاس 125 وتركبهم
ب / لو الكربراتير عندك شغال بك سلانسيه عاده اولاغى الكهربا
عن طريق قطع سن بك السلانسيه
يبقى تشترى بكين مقاس 115 وتركبهم
14/ ثانيا هتغسل الكربراتير كويس جدا بلتر بنزين برا وفرشه
غسله نضيفه جدااا
15/ هتفك بك السلانسيه
لو كان عاده هتشترى بك مقاس 40 وتركبه
لو كان كهربا يبقى بك مقاس 55/60 وتركبه
16/ هنظبط الشفاط عن طريق فك التلات مسمامير اللى ماسكين
الوش بتاع الشفاط ونطلعه برا
17/ لو كان الملف الزنبركى اللى جوا ملفوف حوالين بعضه كويس
يبقى هنقوم جايين قفلين الباب الاول بايدنا كويس على الاخر
18/ هنركب سن الملف اللى جوا داخل سن الباب الاول
بطريقه عاشق ومعشوق
19/ هنركب وش الشفاط ونربط التلات مسمامير كويس
20/ بعدين هنقوم قافلين مسمار الهوا كله عن طريق
لفه ناحيه اليمين لحد الاخر
21/ هنفتح المسمار عن طريق لفه مره واحده بس
22/ هنقفل الوش اللى فوق ونتأكد من سلامه الجوان بتاعته
23/ هنسقط الكربراتير فى مكانه تانى زى ما فكيناه
بس قبل دا كله هنغير الجوان اللى تحت بواحد اخوه بس جديد
24/ نربط ال 4 مسامير 12
25/ نربط خراطيم المياه اللى راكبه فى الشفاط
وخراطيم البنزين مكانها
26/ هنسمى الله وندور
لازم نسند للعربيه شويه الاول لان الكربراتير فاضى مفهوش بنزين
27/ الحمد لله دارت لو احتاجت اننا نسند بنزين فى الاول عشان بتبطل
مفيش مشكله نسندها لحد ما نظبط الشفاط
قبل اى حاجه هنظبط الشفاط
عن طريق ظبطته من مسمار الرجلاش بتاعه ودا لو العربيه واطيه
هنلفه شمال عشان يزود البنزين
ولو عاليه هنلفه يمين عشان نقلل البنزين
احسن مستوى يبقى الشفاط عليه اما يكون عداد دورات الموتور
R.B.M على 1
28 / ظبطنا الشفاط هنسيب العربيه تسخن لمده 5 دقايق
وبعدين امبليه كويس
ممكن العربيه تبطل منك متقلقش دور تانى
واسند بنزين حاجه بسيطه وافتح مسمار الهوا لفه كمان ناحية الشمال
وبعدين شيل ايدك ودوس امبليه تانى وبعدين ارجع اظبط تانى
اولا لو العربيه عاليه هتقلل البنزين عن طريق مسمار البنزين هتلفه ناحية
الشمال ولو العربيه واطيه هتلفه ناحية اليمين
لحد ما تظبط وخلى ايدك وودنك حساسين فى المرحله دى
29/ ظبط بنزين تمام هنظبط هوا تانى
ودا عن طريق هنقفل الهوا تانى واحده واحده لحد ما نحس ان العربيه برجلت وهتبطل
نفتحه تانى سنه بسيطه وواحده واحده لحد ما يبقاش فى رعشه فى الموتور خالص
30/ دوس امبليه تمام وبص على الباب الاول لو بقا واقف على سيفه
يبقى الشفاط مظبوط تمام وزى الفل مش مظبوط
31/ هنفك الشفاط تانى وبعدين نوقف الباب على سيفه ونركب سن الملف الزنبركى
فى سن الباب وهو واقف ونربط المسامير ودا لان الملف الزنبركى
بتاع الشفاط مش حساس للحراره
32/ لو احتجت للخطوه اللى فاتت هنضطر نظبط هوا وبنزين تانى على نفس الطريقه اللى فاتت
33/ هنظبط الكهربا وهنا هنحتاج مفتاح 17 نهوى بيه على صمولة الاسبراتير
ونلف الاسبراتير سنه بسيطه يمين وشمال وندوس امبليه لحد ما نحس ان العربيه
فايقه فى الامبليه بس بشرط متلفش الاسبراتير جامد ومره واحده لف نص لفه
يمين واحده واحده لحد ما تحس انها كدا احسن لو ماانظبطتش
ارجع للوضع الاصلى وابدأ لف نص لفه شمال واحده واحده لحد ما تظبط
كدا بسم الله ما شاء الله بقى معاك عربيه مظبوطه 100 100
ان شاء الله

ملاحظات ::
البعض من اخونا هيقول اشمعنا نركب بكات 125 اما تكون العربيه ماشيه
ببك سلانسيه كهربا
احب اقول ان المعلومات اللى هقولها دى مؤكده من مصدر موثوق فيه
وهى ان بك السلانسيه الكهربا
وظيفته انه بيخلى العربيه تاخد هوا وبنزين على قد ما هى عايزه مش اكتر
يعنى طول ما فى بنزين زياده فى الكربرتير نتيجه وسع فى مجارى البنزين
بك السلانسيه يقفل على البنزين لحد ما الكربراتير يخلص الزياده اللى فيه
يبدأ يفتح تانى ويديله بنزين
ولذلك حتى لو ركبت بكات 220 هتفضل البوجيهات بيضه ومفيش اكل بنزين

سؤال تانى
طيب ليه نركب بك السلانسيه الكهربا من 55/60
والعاده 40
هقول عشان العاده بيفضل مفتوح او شغال ع طول
فمعنى كدا ان فى بنزين زياده فى الكربراتير فاحنا بنقلل
بك السلانسيه العاده عشان البوجيهات متههبش
والاستهلاك ينظبط ودا اثره بيبان جوا البلد
تلاقى العربيات استهلاكها على الطريق كويس جدا
وجوا البلد حاجه هبل فى هبل دا عيب البك دا
والكهربا بنركب له 55/60 عشان هوا بيتحكم الكترونى فى البنزين
والهوا ومش يبفضل شغال ع طول فبيبقى محتاج بك سلانسيه واسع
عشان ياخد وقته فى الشغل والراحه
ودى شوية صور للى عاوز يستفيد اكتر











وتحت امركم فى اى استفسار
واسف لان مكنش معايا حد وانا شغال والا كنت عملتها فديو من اول دقيقه لحد اخر دقيقه

[hyundai 2005]

برااااااااااااااااافو
تسلم ايديك يا قاضي اهو انت كده تغيب تغيب وتطلع بالتقيل

[محمدصلاح القاضى]

متشكر يا احمد بيه
بس فعلا كان نفسى
نعمل الموضوع دا فى لقاء:w6w200504 112245306e
ونصوره لحظه بلحظه
وخصوصا انى فكيت كربراتير عربيتى
وخليته على عينك يا تاجر زى ما بيقولوا
بس سؤال ما لاقيش عندك بك سلانسيه كهربا
زى اللى فوق
احسن ميكانيكى فتاى لاغه ليا
ودا كان مخلينى متجنن طول الفتره اللى فاتت
لان البوجيهات سودا والعزم ضايع لانى اضطريت اقلل البكات

[hyundai 2005]

المشاركة الأصلية كتبت بواسطة محمدصلاح القاضى متشكر يا احمد بيه بس فعلا كان نفسى نعمل الموضوع دا فى لقاء:w6w200504 112245306e ونصوره لحظه بلحظه وخصوصا انى فكيت كربراتير عربيتى وخليته على عينك يا تاجر زى ما بيقولوا بس سؤال ما لاقيش عندك بك سلانسيه كهربا زى اللى فوق احسن ميكانيكى فتاى لاغه ليا ودا كان مخلينى متجنن طول الفتره اللى فاتت لان البوجيهات سودا والعزم ضايع لانى اضطريت اقلل البكات

طيب ياريت يا محمد ما انا بتحايل من زمان اننا نتقابل في طنطا ولا اي حته
يالا خيرها في غيرها
وان شاء الله بكره حشوف لك البيك الكهرباء في المحل وارد عليك

[أيمن الروبي]

بجد مجهود عالي ربنا يجازيك بيه وتفيدنا اكتر واكتر يا قاضي
تحياتي ليك وعلي فكره انا لما غيرت البيكات لبيكات 110-115 الاستهلاك اتعدل وده انا لسه مقولتوش في الرابطه الداخنه البيضه بتاعت الصبح راحت الجري عادي مفيش فرق وجبت بيها علي المحور 160 والدواسه لسه فيها تاني كتير