أخيرا جبت Proton Gen.2 2010

[Obaid]

المشاركة الأصلية كتبت بواسطة tech_lover الله يبارك فيك. بص يا سيدي الـ Civic عربية عائلية فخمة و من ضمن مواصفاتها إن تعليقها ناعم جدا. التعليق الناعم جدا ده هو اللي بيخلي العربية لما يبقى راكب فيها 3 ورا تهبط جامد رغم إن خلوص العربية و هي مش متحملة كويس جدا (15سم). طبعا لو الشارع متسفلت مضبوط و مفيش مطبات ده مش مشكلة بالعكس العربية لما بتوطى بيزيد ثباتها جامد جدا. بس طبعا مع عظمة شوارع مصر و مطباتها و نقرها اللي تتسجل في موسوعة جينيس للأرقام القياسية بتبقى مشكلة كبيرة. بالنسبة للـ Gen.2 الـخلوص بتاعها مش فارق (15سم برضه) بس الميزة إن العفشة الرياضية بتبقى أنشف شويه و هبوطها بيبقى قليل قوي حتى مع التحميل الكامل.

ألف شكر على الرد ... يعنى أطمن أن العربية مش حتحك و أتوكل على الله و أشتريها؟ كمان كنت عاوز أعرف أيه الفرق بين ال جين 2 و البرسونا؟ ... وهل ممكن أشتريها من غير حجز؟

[tech_lover]

المشاركة الأصلية كتبت بواسطة Obaid ألف شكر على الرد ... يعنى أطمن أن العربية مش حتحك و أتوكل على الله و أشتريها؟ كمان كنت عاوز أعرف أيه الفرق بين ال جين 2 و البرسونا؟ ... وهل ممكن أشتريها من غير حجز؟

إتوكل على الله و إشتريها.

الفرق بين الـ Gen.2 و الـ Persona:

- الـ Persona فيها شنطة كبيرة. الـ Gen.2 شنطتها واسعة بالنسبة لهاتشباك بس أصغر من بتاعة الـ Persona . شنطة الـ Gen.2 أسهل في دخول و خروج الأمتعة لأن الغطاء بيتفتح بالزجاج الخلفي كله فزاوية إدخال الأمتعة و إخراجها أحسن شوية.

- الـ Gen.2 بتنزل full option بس مانيوال و أوتوماتيك. الـ Persona فيها half option مانيوال و أوتوماتيك و full option أوتوماتيك بس.
(الـ Persona الـ half option مافيهاش:جنوط رياضية، ABS & EBD، إنذار، زجاج كهربائي خلفي، تشغيل MP3، سماعات خلفية، فوانيس شبورة أمامية، تعديل إرتفاع كرسي السائق، ميزة تطبيق كراسي الكنبة، مرايات و أكر الأبواب بلون العربية).

-الـ Gen.2 شكلها رياضي و غالبا بتشد جمهور معظمه من شباب الـ 18 إلى منتصف و أواخر الثلاثينات، أما الـ Persona شكلها عائلي و معظم جمهورها من منتصف الثلاثينات فما فوق.

- الـ Persona تعليقها أنعم بنسبة طفيفة.

- شوية فروق في الشكل: الشبكة الأمامية، أماكن فوانيس الشبورة، الجنوط.

- الجناح المعدني علي شنطة الـ Persona من ورا الي فيه علامة Proton .

- السبويلر اللي على الشنطة في الـ Gen.2 .

بالنسبة لموضوع الشراء و الحجز ممكن تتصل بالوكيل أو أحد الموزعين علشان تعرف الوضع الحالي خصوصا لو عايز لون معين. نمر الوكيل موجودة في المواضيع المثبتة.

[lol64]

المشاركة الأصلية كتبت بواسطة tech_lover حبيت أدي الناس برده فكرة عن إستهلاك البنزين بعد ما عملت صيانة الـ 1000 كم و بقيت أشغل التكييف لما الجو بيبقى حر الظهر. أنا مليت بنزين (92) من محطة إمارات مصر اللي في الصحراوي و عملت 124.5 كم و بعدين مليت من محطة موبيل اللي جنب بيتي 10.5 لتر. تقريبا 80% من الطريق كنت مشغل التكييف. و الطريق كان شوية على المحور و شوية علي دائري المعادي و حبتين وقوف و مشي بطيء جدا في المهندسين و كوبري 6 أكتوبر و صلاح سالم و 8-9 مرات kick down على الدائري و المحور عشان التجاوز و تفادي العربيات اللي بتقف مرة واحدة بدون مقدمات . الـ RPM معظم الوقت مابيعديش 3000-3200 ما عدا طبعا في الـ kick down. لو قسمنا الـ 10.5علي الـ 124.5 و ضربنا الناتج في 100 تبقى النتيجة 8.43 لتر/100 كم. ده متوسط إستهلاك لسيناريو استخدام أعتقد إنه مشابه تقريبا لإستخدام ناس كتيرعشان بس الناس ماتقولش الـ GEN.2 وحش إستهلاك بنزين و الكلام ده. على فكرة الإستهلاك ده تقريبا نفس استهلاك Hyundai Elantra 1.6 في نفس الظروف علما بأن العربيتين نفس الوزن تقريبا +/- 10 كجم.

يااخى انا عاجبنى موضوعك ومشاركتك والردود بجد بجد انت منظم قوى ودقيق (انا بحسدك )هههههه
الف الف مبروك والعربيه مع صاحبى هنا فى الشغل وبيشكر فيها جدا وشكل العربيه بيعجبنى جدا
ملحوظه كلامك صح الصح عن مقارنتها بالاستهلاك مغ الالنترا لانها معايا
وتقبل تحياتى

[tech_lover]

المشاركة الأصلية كتبت بواسطة lol64 يااخى انا عاجبنى موضوعك ومشاركتك والردود بجد بجد انت منظم قوى ودقيق (انا بحسدك )هههههه الف الف مبروك والعربيه مع صاحبى هنا فى الشغل وبيشكر فيها جدا وشكل العربيه بيعجبنى جدا ملحوظه كلامك صح الصح عن مقارنتها بالاستهلاك مغ الالنترا لانها معايا وتقبل تحياتى

ألف شكر و الله يبارك فيك.
أنا بحاول أجنب الناس اللي بتقارن العربية دي بعربيات تانية كمية الإشاعات و المبالغات السلبية اللي في ناس عملاها عليها اللي مش عارف سببها إيه جهل و لا حقد و أديهم صورة من الواقع. أنا نفسي أثناء لما كنت لسة بقارن بينها و بين عربيات تانية عانيت برضه من كمية الفتي اللي الناس بتقوله من غير تجربة. و لولا إني ركبت العربية مع ناس صحابي و زملائي وعدد من أعضاء مصر موتورز اللي شاركوا بأمانة أشكرهم عليها و البحث الدقيق المفصل اللي أنا عملته على النت من منتديات من كل أسواق بروتون (ماليزيا-إندونيسيا-مصر-بريطانيا-الخليج) ماقدرش أعرف كنت هشتريها و لا لأ. أكيد مش كل الناس هتعمل اللي أنا عملته ده كله. فياريت المعلومات اللي بحطها توفر عليهم النقطة دي.
طبعا أنا مش بقول إن كل كلامي لازم يكون 100% صح. بس على الأقل معظمه أكدته من كذا مصدر أو من تجربة شخصية.
و تحياتي ليك.

[bassol200]

ربنا يباركلك فيها .. بس انا عندى سؤال .. هى بتقفل عدادها؟؟ على اى حال لو حد جربها ياريت يقول .. لان موضوع 240 ده يستاهل يتجرب بصراحه لو حد جربه ياريت يقول او يقول مثلا جابت اخرها كام