ارشيف الاستراحة 2011

[mar mar]

المشاركة الأصلية كتبت بواسطة corsair يا عم وليد ايه بس في ايه انا اول مره اشوفك في الحاله ديه وبعدين صلي علي النبي كدا ومتشمتش بتوع المطرية فينا هههههههههههههههههههههههه وبعدين التريقة ديه في طبع اغلبية الشعب بس انا معاك انها بتقلب في الاخر بقلة ادب وزوق والكل بيتاخد في الرجلين يعني علشان توفيق عكاشه ولا اسبايدر ده جم العباسية يبقي كل اللي في العباسية زيهم لا طبعا وبردك لما الكلبة اللي اسمها علياء المهدي ديه كانت في ميدان التحرير هل كل البنات اللي هناك زيها لا طبعا يبقي في النهاية نوصل لنقطة واحده ان كل واحد فينا له رئيه وهو حر فيه بدون تجريح في الاخر وتخوين

معلش يا استاذ وليد مسحها فيا انا
بس روق كده مافيش حاجه تستاهل واانا اصلا بعشق العباسيه دي فسحتي الوحيده

[طارق ابوذيد]

أرجو من الجميع تقبل أراء الاخرين ولا داعى لاى عصبيه وعلى الجانب الاخر يجب على اى عضو ان يقول رأيه بدون اى تجريح فى الطرف الاخر

[Neo206]

يا رب أصلح حال بلادى
و ولى أمورنا من يصلح

[akerima]

المشاركة الأصلية كتبت بواسطة dr.wael7yran انا اسف بجد يا استاذ وليد على وصولك لمثل هذه الحالة .. الناس نسيت موضوع فليقل خيرا او فليصمت .. و اللي بيحصل في البلد دي يا استاذ وليد فكرني بخطاب حسني مبارك بتاع يوم الثلاثاء .. فاكره ؟؟؟ اللي قال انا عشت في البلد دي و هتدفن في البلد دي .. يومها البلد اتقسمت نصين .. و كان في ناس قدامي بتجهز نفسها تنزل تمشي - شوية المراقيع - اللي في التحرير .. و انا .. كطبيب كان في الميدان يوم 28 .. و لما كفنت اتنين شباب زي الورد كل اللي عملوه انهم نازلين يقولوا لأ .. و لما معرفتش انقذ حد تاني لأني اضرب عليا قنابل و انا واقف بعالج الناس.. كنت موش طايق اسمع اسم حسني مبارك .. لأن اللي يطلق قواته بهذه الوحشية على ناس عزل .. لا يهمه الناس دي ولا البلد دي و لا يمكن يكون انسان حتى .. بس خدت عهد على نفسي .. رغم غضبي الشديد من كل اللي بيؤيد مبارك قدامي .. انه حاهط لساني في بقي و موش هاتكلم معاه .. و انه هادعيله في سري يشوف الحقيقة زي ما انا شفتها .. و اني هادعي لبلدي بالخير .. و انه لو الناس اللي في الميدان دي مشيت و حسني لسه قاعد .. انا هانزل و ان شاء الله اقف هناك لوحدي .. و عدت الايام .. و غار حسني .. و قامت الاحداث تاني .. و لقيت نفس الوحشية تاني .. و متزعلش مني يا استاذ وليد .. بس الناس اللي عينها ضاعت دي يا استاذ وليد .. ملهاش تمن ؟؟؟؟ و الشباب اللي ماتوا هناك .. مطلوب من اهاليهم انهم ينزلوا يمسحوا الميدان و ينضفوه من دمهم علشان الاتوبيسات تمشي هناك براحتها .. و الهجوم المتخلف و الغبي على المستشفيات الميدانية هناك يوم الاحد و الاتنين و اللي راحت ضحيته دكتورة شابة جميلة .. الدكتورة دي بلطجية يا استاذ وليد ؟؟؟ و الوزير الكداب المدلس اللي طلع يقول الشرطة مضربتش خرطوش واحد .. و انا بأم عيني شايف اكتر من 300 شاب في المستشفى اللي في الكنيسة مصابين بالخراطيش .. جرب تقف لشاب وسيم جدا و تقوله احنا اسفين بس انت في جسمك فوق الخمسين بلية موش هنعرف نشيلهم و هتعيش بيهم كده ... جرب تدور في هدوم جثة شاب على بطاقته علشان تقف تتعازم انت و عشرين دكتور مين فيكم هيبلغ اهله .. ......................... ......................... ..................... من حق الناس انها تتظاهر باللي هي عايزاه .. و تقول رأيها بحرية و بأدب ... سواء في العباسية .. او في التحرير .. انما علشان في التحرير انا بقولك لأ في وشك .. و بقولك اني اخترت سكة الحرية الكاملة و معنديش استعداد ارجع اضرب تاني و اسكت .. تقوم تموت مني 50 بني ادم و تصيب اكثر من 4000 بني ادم .. 4000 بلطجي .. 4000 مثير للشغب .. 4000 عميل .. بس انا هقولك حاجة واحدة يا استاذ وليد .. انا لو مكان المشير .. و خايف على مصر اوي كده .. و خايف على شباب مصر اوي كده .. كنت هاستقيل بعد موت اول شاب في التحرير .. علشان اقول للناس كلها .. انه دم المصري غالي اوي .. غالي اوي اوي اوي .. اغلى من الكرسي بتاعي .. اغلى من اني عايز اجيب اللي يغطي عليا .. و هاقول كلمة اخيرة .. لو فعلا خلاص شايفين انه مصر كلها مفيهاش رجالة تمشي البلد .. مصر بلد الرجالة اللي بجد ولاد البلد اللي بان معدنهم بجد ايام الثورة و اللجان الشعبية لو موش شايفين فيها غير قتالين القتلة دول اللي قاعدين باشوات في مكاتبهم .. و انهم يا اما هم يحكمونا و يضيع دم الناس اللي ماتت و تضيع عيون الشباب اللي اتفقعت و يطلعوا منها زي الشعرة من العجين .. يا اما البلد تضيع مننا .. لو انتم شايفين كده بجد .. تبقوا غلطانين اوي .. و مع ذلك .. انا اكن لك كامل الاحترام و التقدير .. و بادعي ليك و ليا و لمصر كلها تعدي على بر الامان .. و يا رب كلنا الحقيقة تبان واضحة قدامنا .. و على فكرة بقى .. متحطليش البطل القومي توفيق عكاشة في العباسية و تقولي متتريقش انا كده ممكن اموت من كتمة التريقة .. : ROFL_C~118: فرفش يا عمنا و ان شاء الله هتعدي

كلامك يا دكتور بجد يستحق يتبروز يتحط ورا كل ولحد فينا - دم المصريين غالي والحرية غالية ومصر اغلي من الكل

انا من الناس اللي فعلا كانت ممكن تنزل العباسية لاني من مؤيديي المجلس العسكري وشايف ان البلد محتاجاه لغاية ما يبقي فيها مؤسسات من تاني - لكن بعد يوم السبت الدامي اللي راح فية شهداء مش تاني - عاشر - كرهت كل من يمد يد السوء لاي مصري مهما كان

مع اعتبار ان سواء الناس اللي موجودين في التحرير او العباسية كلهم مصرين واهالينا كلنا - انا مش من القاهره انا من اسكندرية وكان عندنا في كذا تجمع في جامع ابراهيم وامام المنطقة الشمالية وفي ميدان فيكتور عمانويل والتلات تجمعات مكانوش راضيين عن اللي بيحصل امام مديرية الامن مع ان اللي يشوف اللي بيحصل المفروض ان دول محسوبين علي الثوار لكن اقسملك ان اللي كان بيهاجم المديرية ملوش اي دعوة بالناس اللي كانوا في المظاهرات

اخيرا وبعد ما الانتخابات اثبتت للكل ان المصريين لا يهمهم الا شيء واحد وهو نهوض هذه البلد وحزب الكنبة كما يطلق عليهم ملوا اللجان الانتخابية - يعني الناس دي قوه مش اقل من اي حد نزل مظاهرات وبرضة بيحبوا بلدهم - مفيش كلام يتقال تاني مهما اختلفت اتجاهات واراء المصريين بس كلنا متفقين علي حاجة واحدة


احنا بنحب بلدنا اوي

[mohammed fathi]

جامده جدااااااااااا الفكرة دى