ارشيف الاستراحة 2011

[محمد فيصل]

:joy 23:: joy23::joy2 3::j oy23::joy23 ::jo y23: :joy 23:: joy23::joy2 3::j oy23::joy23 :

[dr.wael7yran]

اولا شكرا لاهتمامكم جميعا ..fficeffice" />

و ثانيا شكرا ليك يا باشمهندس وائل وهارد حالا على كل اسئلتك ..

و طول عمرك منطقي و انت واحد من الناس اللي شجعوني اكتب هنا ..

و ثالثا انا اسف يا جماعة ..

نسيت اني دكتور و انتم موش كده

و دخلت بيكم في اقصى الشمال و انتم اصلا بره الموضوع ..

كان المفروض اتدرج اكتر من كده ..

بس طالما دخلنا في الغويط يبقى نكمل لحد الاخر..

اكيد موت طفل رضيع قدامكم كان هيجننكم..

بس..

يوسف لم يكن حالة استثنائية ..

انا كل يوم..

والله العظيم كل يوم بيجيلي حالات شبه يوسف..حالات كتير ..

و موش انا بس..

ده في كل مستشفى اشتغلت فيها..

من الاخر

كل يوم في اطفال بتترفض لان اهاليها معهاش فلوس ..

او لانه مفيش مكان ..

او لانه مفيش امكانيات..

كل يوم في موش اقل من 100 يوسف بيموتوا..

في القاهرة و بره القاهرة

ده العادي بتاع كل يوم ..و ركز معايا لو سمحت

يوسف ..

انا موش قادر انساه و واجعني جدا لانه من الحالات القليلة اللي معرفناش نعملهم حاجة ..

لا انا ..

و لا زمايلي .. عندي و في الحضانات التانية

و لا التمريض..

و لا معارفي في 18 مستشفى حكومي و خيري..

و لا اهلي..

و لا حتى اصحابي اللي كانوا مستعدين يتبرعوا ..

مسيبتش حد في حدود معرفتي مكلمتهوش..

و لو حكيتلك كل حالة انا مقدرتش اساعدها هيتقطع قلبك اكتر و اكتر و هتكرهني اكتر و اكتر..

و في نقطة انا قلتها و محدش خد باله منها ...

اني عرضت عليه انه يقعد و يحاول يتصرف في الفلوس براحته ..

الى ان يقضي الله امرا كان مفعولا ..

بس هو رفض تماما..

عارف ليه يا باشمهندس وائل ..

لانه في اقرار معمول على ايدين محامي عقر بيميضيه على نفسه في المستشفى (اللي انا و اخد الحضانات فيها ايجار)و ملتزم باتباع قوانينيها و حسابتها ..لازم يقر بانه عارف مصاريف المستشفى و ملتزم تماما بسداد جميع النفقات..

و رفض يمضي على الاقرار..

و انا قلت له بلاش اقرار ..

و مع ذلك رفض ...

الراجل كان مستني اقوله قعد ابنك ببلاش و مالكش دعوة ..

و انا يومها مقدرتش اعمل كده..

في ايام تانية كتير بقدر اعمل كده ..

بس اليوم ده ما قدرتش ..عايز تصدق انت حر

موشش عايز تصدق انت حر برده ..

يومها كلمت طوب الارض و مالقيتش حل ..

و هو ماحاولش يتصرف..

مقليش طب حطه و انا هتصرف..

ما كانش عنده غير جملة واحدة ..

هات الولد يا دكتور ..

و انا كنت قربت ابوس ايديه ..و هو هات الولد يا دكتور..

فارجوك متقلش اني خدت الموضوع باستهزاء..

مكنتش حكيته و لا فرق معايا..

انا كرهت نفسي و بلدي اليوم ده لانه انا الدكتور صاحب المشاريع ما كانش معايا 6000 و لا 3000 و لا معرفش كام علشان اساعده..

انا مينفعش اقول كده بس انا كان معايا 150 لاخر الشهر و افتكر انت بقى الماتش كان يوم كام..

انا الدكتور صاحب المشاريع و المستشفيات كنت راكن العربية اللي جايبهالي ابويا لانه يومها ماكنش معايا تمن البنزين اللي احطه فيها ...

ده منظر؟؟

دي عيشة؟؟

عايزين الحقيقة ..

خدوا الحقيقة

يوسف ولد مات لانه ابوه معهوش فلوس..

انا كل يوم بيكلمني 4 -5 معهموش فلوس و عندهم يوسف برده

كل يوم ..

من مستشفيات الحكومة..و المستشفيات الخيرية

بيكلمني موش اقل من 4 اباء عندهم ولاد عايزين يلحقوهم و مفيش فلوس..

طب لقيت فلوس ليوسف ..هلاقي لغيره و لغيره و لغيره ؟؟؟

علشان كده انا بفكر في حل ..

حل جذري يضمن انه اللي حصل ده ميتكررش ..

انه في اليوم اللي موش هاعرف اساعد فيه يوسف..

الاقي اللي يساعده ..

و شكرا الاهتمامكم

و اسف اني صدمتكم ..

[محمد فيصل]

من واقع ردك يا دكتور وجدت ان :
1.الفقير لا يتزوج ولا ينجنب فى بلد تقتل اهلها واولادها بعدة طرق
2.لاداعى لوجود :الطبيب /المهندس /المحامى /المدرس /اى مهنة صاحبها شريف وبالتالى على الدنيا السلامة
3.اهلاً ومرحباً بكل صاحب مهنة ومحتال ونصاب لانة ببساطة هو من يسطيع العيش فى تلك البلد القاتلة لاهلها وابنائها كل يوم وكل ساعة
4.هذا الرد هو رد عام وليس رد على شخصك فهو رد عن واقع بلد خيرها مخصص لفئة معينة والباقى له الله
اخيراً من كان امره على الله فلا يحزن
ان مع كل عسر يسر ان شاء الله لهذا الشعب المطحون

[dr.wael7yran]

اسمحلي بقى يا باشمهندس ارد على اسئلتك ..fficeffice" />


اسمحلي ابدأ بالربح ..


انت كررت انه موش عاجبني ..


و انا بقولك انه عاجبني جدا و مريحيني جدا..


عارف ليه ..


لانه انا اللي محدده ..و ده مكاني و محدش غصبني..


و الله انا ممكن اقول انا هكسب 1000 جنيه في اليوم..و حد له حاجة عندي ..اللي يقدر على مصاريفي اهلا و سهلا و اللي ميقدرش يشوف غيري..


بس لأ يا باشمهندس ..


احنا و مازلنا ارخص حضانات القاهرة..بافضل خدمة طبية يمكن تقديمها في حدود امكانيتنا..


احنا 4 دكاترة..


قرفنا من وزارة الصحة ..و استقلنا منها لانها غير ادمية..


و قررنا نبدأ من الصفر ..


اللي كان معاه عربية باعها ..


و اللي كان وارث حتة ارض باعها..


و اللي ابوه كان محوشله قرشين لجوازه خدهم..


و عملنا المركز ده ..


و كان عندنا نظرية ..الناس كلها نفسها توكيلات العربيات تعملها..


رخص نفسك هتتشغل اكتر .. ربنا هيبارك و هننتشر اكتر


يعني اليوم عندنا كان ب 400 ( غلي طبعا دلوقتي) لما كان كل الحضانات اللي زينا ب 600 و 700 جنيه ..


قلنا ربح قليل و نخدم الناس احسن.. احسن من ربح كتير و الناس تدعي علينا..


و برده الناس بتدعي علينا الحمد لله ..


هو قليل بس احنا الحمد لله راضيين بيه..


نظريتك الاقتصادية سليمة..


احنا فعلا بنجمع تمن الاجهزة ..


بس نسيت حاجة مهمة ..
الجهاز مبيشتغلش يوميا ..
و الفلوس دي بتروح تصرف على بيوتنا
صيانة الاجهزة


و بيع الاجهزة .. و تكهين الاجهزة..


الجهاز اللي بتجيبه ب 65 الف هتبيعه مستعمل بنص تمنه ..


زي العربيات بالظبط..


انما احنا الصراحة بنكسب..


بس في سؤال ..هو انا موش مسموحلي اكسب ؟؟؟


ثانيا : موضوع اجري اللي سيبته
يا جماعة انا اول حاجة سيبتها اجرة ايدي
اي حاجة غير كده تكاليف...تكاااااااليف.. و لازم تدفع..


اظن انه انا وضحت اني مأجر مكان في مستشفى


يعني الادوية اللي بتصرف بتاعة صيدلية المستشفى .. موش انا


و السرنجة اللي بتصرف بتاعة مخزن المستشفى .. موش انا


و التحليل اللي بيتعمل بتاع معمل المستشفى .. موش انا


اللي قدرت اسيبه و اتصرف فيه هو اجري..


و الله اعلم انا كنت محتاجه قد ايه ..


بس سيبته انا و شركائي ( اللى هم مأجرين معايا برده )


و التمريض ساب اجره لما شافني تنازلت عن اجري


اكتر من كده موش هاقدر اتصرف .. و لو وعدت اتصرف يبقى انا اللي هادفع..


ثالثا: الاقساط و البنوك ..


انت معاك حق ..


بس حط نفسك مطرحي ..


انت دكتور .. و مندوب البنك و مندوب الشركة ماشيين بيدوروا عليك


لانك فعلا متأخر..و بيتعمد يحرجك


في عيادتك.. في المستشفى اللى انت بتشتغل فيها..


عند مديرشئون العاملين عندك ..
و تخيل منظري و انا متأخر و بتحايل طب مشيها شهر كمان
و المندوب يتهددك و يتوعدك


ايه رأيك .. و انت زي ما قلت يا باشمهندس راجل دكتور و ليك سمعتك في السوق ..


و الشركات دي هي اللي هتسعفك في الصيانة ..


يبقى هتعمل قرد و لا موش هتعمل قرد علشان تدفع اللي عليك ..؟؟


رابعا : ال 30 طفل


ربنا قدرنا .. و بعد الضنك و الجمعيات و البنوك


اتشهرنا برخص سعرنا و خدمتنا الطيبة للناس..


و لما – بعد سنين شقا و ضنا – ربنا فتحها علينا


اسسنا بمجهوداتنا الذاتية مركز متكامل زي مركزنا الخاص


و لا يقل عنه في رأس المال


في مسجد شهير جدا بالمهندسين ..


و الاطفال هناك بتتعالج بالمجان تماما من فلوس اهل الخير


بطريقة شرعية و منظمة..


و احنا بنباشر الاطفال هناك مجانا و لوجه الله..


في محاولة بسيطة منا لحل المشكلة


محاولة جدية اه بس موش كفاية خالص


بس يوم يوسف ده كان يوم من ايام الضنك و الحمد لله


ما كانش لسه في مركز و لا شهرة و لا حاجة من دي..


و حاولت .. و ربنا شاهد اني حاولت ..


خامسا : 3000 الاف و 6000 الاف..


:] :]


انت صح .. و مكنتش بحسبها و قت ما باكتب


بس انا ما كانش معايا الا 150 جنيه و الله


و كان عليى قسط بالف جنيه فاضل موش عارف هاجيبه منين


و محدش رضي يسلفني و الله يومها ..كلمت ناس كتير و الله استلف منها علشان خاطره


قولي يا باشمهندس ..


شفت كام دكتور بيستلف علشان العيانين بتوعه ؟؟؟


اجاوبك ..


انا شفت كتير ..


سادسا : المستشفى هتسجنه ..


اه ..لو كنت انا سبته للمستشفى كانت هتسجنه..


لأن زي ما وضحت مأجر في مستشفى و ملزم باتباع قوانينها و حسابتها..


العملية موش بطيخ ..


و لان المستشفى دي ياما ناس اتعالجت فيها و ضربوا الطناش ..


و ناس تتعالج و بعد كده يقعدوا يفاصلوا..


فالمستشفى اتخذت الاجراءات اللي تضمن الحصول على حقها ..


بس انا مسيبتوش للمستشفى ( ضد اجراءات و قوانين المستشفى)


و انا قلت امشيها ودي و من غير ورق بس هو مارضاش
بس هو اللي كان فاقد الامل في الدنيا اوي..


سابعا :


ابطل الشغلانة دي ؟؟


يا راجل .. ده احنا نتعد على صوابع الايد ..


هي المشرحة ناقصة قتلى ..


خد المعلومة دي على الماشي ..


معظم اطباء الاطفال حديثى الولادة المؤهلين مطلوبين بالاسم في الخليج و السعودية..


و كله بيسافر..المرتب هناك لا يقل15 الف جنيه ما شاء الله


ده غير العربية و السكن و مدارس الولاد


رغم انه مصر فيها محافظات بالكامل مفيهاش حضانات..


والمحافظات اللي فيها ..مفيهاش كوادر تشغلها ..


يبقى بقى كل واحد يرضى بدوره في الحياة و يستحمل ..


و قدره انه يفني عمره في كتبه و شغله و خدمة الناس


و الناس علشان النظام ..


تسب و تلعن فيه ..





ثامنا : و ده موضوع فني شوية ..


جمدوا قلبكم


الولد كان داخل على جهاز تنفس صناعي..


يعني حالته كانت متأخرة جدا


و احتمالاته الصراحة كانت قليلة


و انا قلت للاب كده .. وده واجبي لانه لو الولد حاصله حاجة و انا موش قايل لابوه الحقيقة هتبقى مشكلة.. و يمكن ده اثر جامد في رد فعله..


انا عملت للولد الاسعافات الاولية


و حطيته على جهاز اسمه الامبوباج ( شبيه يدوي للتنفس الصناعي)


يقدر يمشي ساعة لحد ما نتصرف


بس كان في خطوة لو عملتها كان هيقعد عندي


و نقله كان هيبقى خطر على حياته..


و انا قلت 15 يوم على اقل تقدير


بس الشفا من عند الله


يعني ممكن يقعد اقل ..


و احتمال كبيير يقعد اكتر ..


و لو احتملت مسئوليته .. كان صعب على


و متنسوش .. و خلوا قلبكم جامد ..


انه كل يوم بيجيلي من الحالات دي 4 او 5


ولو شيلت ده ..هاشيل التاني ازاي..و غيره و غيره


بس متخافوش ..


المركز الخيري بيشيل الاطفال دي و اكتر


الحمد لله





يا رب اكون رديت على معظم اسئلتك ...


و متزعلش مني ..


انا خضيتك ..


و صدمتك و صدمت غيرك..


بس انا بحاول افكر مع الناس ..


و بقول الحقيقة و بدون تجميل..


و تقبلوا سلامي ..

[dr.wael7yran]

و اخيرا ...
انا موش بقول هنا علشان التبرعات ..
انا بقول الكلام ده هنا لاني شفت نماذج مضيئة بره و حلول عملية يمكن تنفيذها لحل المشكلة دي جذريا و بعيد عن ام الحكومة اللي لا بتحل و لا بتربط و لا البني ادم فارق عندها اصلا..
و كان نفسي اتناقش اعمل ايه..
اتحرك ازاي ..
انا قلت موضوع يوسف لشد انتباهكم لفظاعة المشكلة ..
علشان نلاقي حل عملي بعيد عن التبرع و اهل الخير و الكلام اللي المفروض يبقى فرعي موش هو الاساسي ...
بس حاولوا تشوفوا الصورة الكبيرة معايا ..
و تقبلوا سلامي جميعا ..