كيفية ضبط مسمارى البنزين والهواء فى اللادا 2107

[أبوسارة]

السلام عليكم ورحمة الله
كنت عاوز أعرف اتجاه تقليل وزيادة االبنزين والهواء والسلانسيه ( بالمقارنة بعقارب الساعة ) فى السيارة لادا 2107 رادياتير عادى وياريت صورة طبيعية لأماكن المسامير دى
ولكم جزيل الشكر

[zing0]

استاذ أبو سارة
أو
أبو يحى

رديت على حضرتك قبل كده

بص يا ريس مبدئياً ضبط الكربراتير يتحدد أكتر من استهلاك البنزين (و تهبب سن البوجية) و ريحة العادم و الدخان الأسود من الشاكمان دى مؤشرات تقولك الكربراتير محتاج ضبط أكيد موضوع ضبط الهوا و البنزين فى الكربراتير من الموضوعات اللى عاوزة تجربة و حساسية شوية لو الكربراتير عندك فابريكا (مغيرتش بيكات قبل كده يعنى اللى موجود 112/150/150/150) هتقفل الهوا عالآخر (من غير متقرّط) و تفتحة لفتين كاملين و البنزين لفه واحده و ممكن تزود سنه كمان لحد متظبط السلانسية على 800 لفه/د ==================== لو البكات متغيرة يبقى حوار تانى ضبط الكربراتير ============= - المفروض تكون حرارة المحرك فى الدرجة العادية للتشغيل قبل ضبط الكربراتير, بمعنى ضبط الكربراتير و العربية -سخنة مش باردة, و يكون ضبط السلانسية حينها على 750 - 800 لفة/ دقيقة إعمل نقطة بداية للضبط, و هى: 1- مسمار الهواء: يتم ربطه بهدوء إلى قاعدته ثم فتحه 2 لفه 2- مسمار البنزين: يتم ربطة للآخر و فتحه 1 لفه, و يمكن زيادة نصف لفه لو المكنه مش عاوزه تدور. --------------------- بعد كدة الخطوات بالترتيب: 1- دور المكنه هتلاقيها مبرجله و صوتها عالى (جرار زراعى).... عادى 2- إربط مسمار الهواء للداخل, المكنه هتبرجل أوى و تترج و ممكن تتوقف, إرجع إفتح من وضع التوقف بمقدار نصف لفه فقط, و جرب تدور المكنه, لو مش عاوزه تدور زود نص لفه كمان و جرب. * هنا بقى اللعبه: هتزود نص لفه كل مرة و تنتظر فترة لا تقل عن 10 ثوانى علشان المحرك يستجيب للتغير براحته. و هتفضل تزود بالطريقة دى (نص لفه و تنتظر 10 ثوانى و تتابع صوت المكنه بودانك مش من خلال عداد RPM ) المفروض المكنه يبقى صوتها ناعم و منتظم , زود برضه لحد ما تلاقى مفيش تغيير فى الصوت مع فتح المسمار / أو لما تلاقى المكنه هتبدأ تبرجل تانى, إرجع لأفضل وضع سابق. كده أوعى تلمس مسمار الهوا تانى. 3- إفتح مسمار البنزين من نقطة بداية الضبط (اللفه الكامله) بمقدار ربع إلى نصف لفه علشان تضبط الـ RPM بتاع السلانسية سواء عالى أو واطى. ========================= المفروض بعد الشغل ده: --------------- مسمار الهواء يكون مفتوح بمقدار نصف لفه من نقطة بداية الضبط (يعنى 1 و نص : 2 و نص لفه) مسمار البنزين يكون أقل من ( لا يصل إلى) 2 لفه كامله غير كده يبقى الكرباتير نفسه مش مضبوط و محتاج البشمهندس معتز بتاع الكربراتير و لازم تغير البكات بتاعته ملحوظة: يجب التأكد من كفاءة نظام الإشعال (تقسيمة الكاتينه و الأبلاتين و الكوندنسر و البوجيهات و الموبينه و أسلاك البوجيهات قبل ضبط الكربراتير لأن الحاجات دى بتأثر) و كمان التأكد من نظافة فلتر البنزين و الهوا و الكربراتير نفسه و عدم إنسداد البيكات. بعد الضبط , إطلع مشوار حوالى 10 كيلو عالأقل, و بعدين شوف شكل البوجيهات (السن مش القلاووظ) - لو عليها كربون (مهببة) يبقة بنزين زيادة - لو لونها أبيض أو رمادى فاتح يبقى هوا زيادة - الصح يبقى لونها بنى الفاتح (بيج) مائل للرمادى مفيش مشكلة و دى صور من الكتالوج لتوضيح أماكن مسامير البنزين 1 و الهواء 2

و شوف اللينك ده
http://www.masrmotors.com/vb/showthread.php?t=117329

لو حضرتك بتسأل على اتجاه الزياده و التقليل, عادى زى أى صاموله أو مسمار
مع عقارب الساعه بتربط و تقلل, عكس عقارب الساعه بتفك و تزود

[أبوسارة]

شكرا لحضرتك
بس كنت عاوز أعرف اتجاه التقليل والتزويد فقط لأن العربية عالية سنة صغيرة وأنا بحب كل حاجة تبقى مظبطة ( كان عندى عربية قبلها رينو 12 اتعلمت فبها حاجات كتير ) ومش عايز أمد ايدى فى اللادا ال ماأكون عارف كل حاجة
وشكرا لسيادتك

[أبوسارة]

اتجاه لف المسامير فقط ( تزويد وتقليل ) أفادكم الله

[zing0]

يا باشا أقرأ الرد للآخر

لو حضرتك بتسأل على اتجاه الزياده و التقليل, عادى زى أى صاموله أو مسمار مع عقارب الساعه بتربط و تقلل, عكس عقارب الساعه بتفك و تزود

مبدئياً سيب مسمار الهوا و قلل من مسمار البنزين (رقم 1 فى الصورة)