يوم صعب جدا فى مرور 6 أكتوبر !!!!

[Eng/salwa]

السلام عليكم ورحمة الله وبركاته
إخوانى الكرام الاعضاء المحترمين لمنتدانا المحترم

ذهبت اليوم مع زوجى لتجديد رخصة السيارة فى مرور اكتوبر
إزدحم مرور اكتوبر جدا عن زماااان ايام الروقان اول ما سكنا فى اكتوبر
من 20 سنة كانت الدنيا رايقة وجميلة

أولا لاحظت ارتفاع فى الضريبة
دفعنا للجيتز 3 سنوات المبالغ الآتية
700 الضريبة
310 تامين اجبارى
45 ثمن الاوراق للتجديد
10 ملف لصالح افراد الشرطة
75 ثمن المثلث وشنطة الاسعافات برغم انى معى القديمة
ولكن قالوا لازم ايصال من الشباك وبالتالى لازم نشترى جديد
20 اكراميات لرافع البصمة واحضار الملف لشهادة البيانات وغيره
ومافيش فايدة فى الاكراميات اللى مش عارفه ليه وكل واحد بيعمل شغله
لا أكثر ولا أقل بس حاجة تغيظ
وطفاية الحريق بيغلسوا علينا علشان نشترى واحدة جديده
وقالنا القديمة لازم لها صيانة وكله كلام علشان ياخذ 10 ولا 20 جنيه وخلاص
وثمن طفاية الحريق 140
والغريب ان فيه ناس اشتروا 2 مش عارفه ليه


انا فاكرة ان الترخيص الاول للسيارة فى يناير 2011
كان اسهل واسرع وارخص طبعا من كده

وكل شوية يقولوا الsystem وقع
وطبعا دى حركة علشان نمشى ونيجى بكره
وطبعا ماخلصناش كل حاجة اليوم
غير موضوع المخالفات فوق ولولا ان كمان اماكن السيدات رايقة
عن طوابير الرجال كان الموضوع بقى مأساه اكبر من كده

بس بصراحة يوم صعب يصيب الواحد بالاكتئاب
والناس كلها بتتخانق مع بعضها
ومافيش حد طايق حد ولا طايق نفسه حتى
غير بقه التدخين اللى فعلا حاجة صعبة جدا
والمكان مغلق وسئ وضيق ولا تهوية
ورجعت مش قادرة آخد نفسى

والسيارة طلعت الحمد لله بدون مخالفات
ودفعت تقريبا 1300 جنيه للتجديد 3 سنوات وأخلص
ولا أرى هذه الوجوه غير بعد 3 سنين ان عشنا وكان لنا عمر

يوم صعب

[محمد فيصل]

بكل تأكيد يوم الذهاب للمرور من اصعب الايام بسبب الروتين والمحسوبيات وقله الضمير والرشاوى ومختلف العبط الحاصل فى هذا اليوم
الحمدلله على مروريوم المرور على خير
يسر الله لنا جميعاً اابعد عن مخالفات المرور والذهاب إلى اى وحدة مرور فى بلد العجائب

[ahmed_eng2001]

ربنا يديكى الصحة ... و يعفو عنا جميعا

[Eng/salwa]

السلام عليكم ورحمة الله وبركاته

ذهبنا اليوم للمرة الثانية على التوالى لمرور 6 أكتوبر
وصلنا اليوم بدرى عن امس
حوالى 8:30 تقريبا
طلبت تانى ملف السيارة
وقفت منتظرة اكثر من نصف ساعة علشان البيه الشاويش
عاوز اكرامية تانى لاحضاره تانى
ماهو امبارح خلص بقه بكل ما فيه
واحنا فى يوم جديد
من غيظى بقه قلت مش هدفع له تانى
الفلوس اللى بياخدوها مننا دى اكيد مافيهاش بركة
وصل الملف لووووووووووول
وقفت فى الطابور المخصص للسيدات شباك 5 وبصراحة كان رايق جدا
الحاجة المختصة بالسيدات سيدة محترمة وخلوقة جدا
خلص لى الورق بسرعة وارسلتنى بالملف للمراجع اول شباك
برضة راجل محترم جدا
انتهى الموضوع ؟؟؟؟؟ مش مصدقة !!! معقول
قالى فى خلال نصف ساعة استلم رخصة السيارة
جلست وقلت الحمد لله لسة الساعة 10 صباحا
وامامى وقت كافى
امتحان مادتى الساعة 12 ولازم اذهب للكنترول لفتح مظاريف الامتحان
لتوزيعها على الطلبة باللجان لانى رئيسة القسم
ربنا يسهل هلحق بإذن الله
انتظر النصف ساعة وخلااااص بدلا من الرجوع تانى بكرة
علشان نخلص تصحيح الامتحان غدا بإذن الله
انتظر
انتظر
انتظر
بعد سااااعة وليست نصف ساعة
قلت اقوم أسأل تانى
أتارى كمان الموضوع تانى فيه اكرامية أخيرة بقه للاستلام
حاجة تقرف بقه بصراحة
ده ابتزاز
حسبى الله ونعم الوكيل
فضلت ارددها انا وكل اللى واقفين
لغاااية الساعة 12 الا 10 دقائق جاء الفرج
الله اكبر
سمعت اسمى بينادى عليه الشاويش ولا الموظف المختص
على شباك 12
وقمت جريا
ومسكت الرخصة
وقلت يا ولااااد الحلاااال
عذبتونا
مش عاوزة اشوفكم غير بعد 3 سنين
ان شاء الله
حسبى الله ونعم الوكيل

[وائل احمد السيد]

حمد لله على السلامة
والف مبروك عقبالى انا اخر السنة
المهم احنا ياريت نعمل شكوى ضخمة للداخلية للنظر فى امر المرور دة مش معقول القرف والذل والاكراميات والبلطجية اللى بيكونو موجودين بالمرور لعرض مساعدتهم للنصب لازم يكون مكان المرور ادمى ومريح وكل حاجة تخلص بطريقة سريعة مش معقول أعمل الرخصة فى يومين كاملين او يوم كامل حرام المفروض لو فية نظام الموضوع كلة مايأخدش غير ساعة او اتنين على الاكثر
ياريت نشوف موضوع الشكوى دى من التاخير وشكوى من الاتاوات والاكراميات والشكوى تكون لوزارة الداخلية لعل وعسى
مبروك
وتحياتى للجميع