لو انت جديد فى السواقة ممكن تجيب جدبد ولا قديم

[Xpert]

هات بيجو 405. عربيه حلوه و رخيصه و قطع غيارها موجوده و برستيج برضه بالنسبه لعربيه عيله و بتاع.

[lol64]

انا لما جبت عربيه كنت باتمرن سواقه عليها حبه حبه بعد الساعه 1 بالليل وماكنتش مستعجل وانت كمان حاول تسوق فى اوقات رااااااااااايقه ومتستعجلش والثقه هاتجيلك سنه سنه
وانا من رايى بلاش قديم هاتكره العربيات من اولها

[TELEBK]

بسم الله الرحمن الرحيم

أولا : ألف مبروك علي الفلوس إللي ربنا كرمك بيها ، ولازم تعرف إنها إمتحان ليك في الأول والاخر ، علشان تعرف تتصرف فيها بطريقة صح وكويسة ومتخسرهاش .
ثانيا : بالنسبة لموضوع إنك جديد في السواقة وشراء عربية جديدة أو قديمة ، أحب أوضح لحضرتك صورة مهمة جدا ، وهوه إن الطريق مبيرحمش حد سواء جديد أو قديم والحافظ هو الله ، لكن بالنسبة للقديم في السواقة بيبقي أكتر خبرة وتعامل مع المفاجآت بتاعة الطريق وبيقدر ياخد التصرف الأمثل بسرعة عكس الجديد إللي بياخد وقت يفكر فيه حتي ولو ثواني وده بييجي علي حسابه أو علي حساب الغير ، ولو ربنا ستر بتيجي في الصاج وده أمره سهل طالما بعيد عن البشر ، فنصيحتي ليك إتمكن الأول من سواقتك ومن تحكمك في العربية وبعدين إعمل إللي إنت عاوزه .
ثالثا : رأييي بالنسبة للعربية جديدة ولا قديمة ، تعالي نحسبها شوية .... إنت محتاج إيه في العربية دلوقتي .. 1 - تكييف 2 - باور " إن أمكن " 3 - زجاج كهرباء 4 - شكلها جميل 5 - موديل بعد ال 2000 ،،،، المواصفات ديه ممكن تتلاقي في عربية مستعملة إستعمال خفيف ونضيف وتكون ما تتخطاش الأربيعنات أو تكسرها شوية مثلا زي الأكسنت أو الكيا برايد " وممكن عن طريق رواد المنتدي المحترمين والكرام تلاقي طلبك بإذن الله " ، وبعد ماتتعلم كويس عليها وتتمكن منها تقدر تبيعها وماتخسرش فيها كتير وتكمل وتشتري عربيه جديدة وتكون متمكن عليها وتقدر تتحكم فيها مش هيه إللي تتحكم فيك .
رابعاً : بالنسبة للأعطال صدقني مش القديم بس إللي بيظهر فيه أعطال لألألألألأ ده الجديد برضة بيكون فيه أعطال أه بتكون خفيفة بس هيه برضه أعطال بس بتكون والحمد لله علي قدها وصغيره ، فيعني رأيي توكل علي الله وهات مستعمل بحاله كويسة أفضل ليك زي ماقال لك والدك .
وبالتوفيق
د / خالد

[data]

انا مشتكر جدا لكل من قام بابداء رئيه
وشكر خاص ليك يادكتور خالد
افدتنى كثيرا والله

[damdam41]

انا كنت زيك كده بالظبط و قررت اجيب حاجة مستعملة اقعد بيها ست شهور و بعد كده ابيعها و دى خلاصة رؤيتى الان
- صعب تلاقى مستعمل حالته حلوة الا لو كسر زيرو
- العربية الجديدة احساس تانى خالص لكن فى نفس الوقت القديمة بتخليك متزعلش عليها خالص
- خد بالك ان طرق مصر منيلة بستين نيلة يعنى حتى المحترفين فى السواقة برضه قارفنين منها
- لو بتمشى فى زحمة كتير يبقى ابعد عن المانيوال لانك بما انك لسه بتتعلم يبقى اكيد هاتخبط او تتخبط لو بتمشى فى زحمة و اسالنى انا عن الموضوع ده كل يوم بمشى من الدقى لبدابة الدائرى زحلفة و بشوف الناس بتخبط فى بعض خصوووووووووووصا الستات و ما ادراك ما الستات فى السواقة
- السواقة مش حاجة صعبة هى عاوزة تركيز و تبقى فايق لكن الجزء الميكانيكى فيها هاتتعلمه فى ظرف شهر لكن الباقى بقى بيبقى تركيز و هدوء اعصاب (عكس الستات اللى لو حد كح يجيبوا فرامل للاخر)
- نصيحتى الاخيرة اما تجيب حاجة جديدة و تحاول تمشى بيها فى امان هادية شوية لخد ما تاخد على العربية و تحس بكل حاجة فيها و ياريت لو اوتوماتيك هاترتاح جدا
او تجيب حاجة كسر زيرو بس يبقى معاك واحد امين و بيفهم كويس
انا عن نفسى دلوقتى عاوز ابيع عربيتى و اجيب حاجاة اوتوماتيك و عالية عشان المطبات و الزحمة