لو معايا 35 اجيب مستعمل واريح دماغى ولا اجيب جديد واقسط

[صانع الخيال]

السلام عليكم
انا عايز اسالكم بس بامانة ربنا يا جماعة الى ملهوش فى العربيات ميفتيش
عشان دول تحويشة العمر بحلال ربنا
المبلغ 35 الف جنيه
اجيب مستعمل واريح دماغى من وجع القلب بتاع القسط
خصوصا انى هكون ملتزم بتسديد القسط وفى نفس الوقت بجيب بنزين وبتابع صيانة ولو لقدر الله حصل حاجة فى العربية خبطة او اى مشكلة هكع بردو
فهكون مش ملاحق وبالتالى تقريبا كدا هشحت
ولا اجيب جديد زى لانوس مثلا يعنى هكون دافع 50% والقسط هيبقا مش كبير
والجديد يستاهل شوية تعب
وكمان عايز نصيحكم لو هجيب مستعمل اجيب ايه وليه والاسعار فى حدود كام
ولو هجيب جديد اقرب المزانية يعنى مشطحش عن ال 70 الف وايه العربية الى اجبها وليه
ولا اشطح لمثلا 80.85 واحمل على القسط وايه العربية الى اجبها وليه

كمان عايز اعرف ازاى احسب القسط سؤا على 5 سنين او على 7 سنين
وعايز اعرف انهى الافضل فى المدتين لانى مستكتر مدة 7 سنين
وعايز اعرف ابتدى انزل انهى معرض لو رسيت على الجديد يعنى ولو عايز اشوف المستعمل اروح سوق العربيات ولا ابتدى ازاى وعروض النت دى كويسة ولا كلو نصب

ملحوظة دى اول مرا افكر فى امتلاك عربية وانا مطلع رخصة من حوالى 3 شهور
واتعلمت السواقة كذا مرة يعنى مش مرة واحدة

منتظر ردودكم

[ahmed el gendy]

بص يا باشا انت بتقول انك لسه متعلم السواقه حتي لو سواق كويس ولسه متعلم اكيد الخبره العمليه هتفرق كتير وفيه مواقف كتير هتقابلك لازم تتصرف انت بمخك ومش هتكون اتعلمتها فنصيحه لوجه الله خليك ف المستعمل اهو لو لاقدر الله العربيه اتخبطت منك اهي العربيه رشه دوكو بدل المره عشره لكن لو زيرو اولا هتقلل من تمن العربيه ثانيا انت نفسك هتزعل اوووووي علي الدوكو الاصلي اللي عمره ما بيتعوض لانه الدوكو الوحيد اللي بيحمي جسم العربيه من الصدأ فنصيحه ابدأ مستعمل لو تجيب عربيه زي 128 تتعلم عليها لمده 6 شهور بالكتير اوووووووي يبقي كده تمام وبعدين تبيعها وتجيب اللي نفسك فيه زيرو او مستعمل موديلات حديثه مفيش مشكله ما انت بقيت معلم لو حكايه انك 128 الاول صعبه يبقي خليك ف مستعمل افضل من زيرو ممكن تجيب هيونداي اكسيل معقوله او سيات ابيزا او فيات بونتو او سكودا فيليشيا كل ده كويس بس خد بالك من قطع الغيار لو انت من القاهره اي عربيه هتلاقي قطع غيارها زي الرز لو انت من المحافظات يبقي افضل لك هيونداي اكسيل قطع غيار زي الرز وببلاش وحاول تكون حاله العربيه كويسه عفشه موتور وجسم طبعااا وهتبقي تمام لكن انا مش مع حكايه انك تزنق نفسك عشان الاقساط خااااالص حتي لو هتمشي علي رجليك لان العربيات ليها مصااريف معروفه هتبقي اقساط ومصاريف وما تعرفش هيحصل ايه ف ال5 سنين اللي جايين

بالنسبه لحسبه فوائد الاقساط لو افترضنا ان تمن العربيه 150 الف والفايده السنويه 8% مثلا رغم انها ممكن تبقي اكتر من كده وحضرتك هتقسط مثلا 100الف لمده 5 سنين يبقي كده الفايده السنويه اللي هي 8% بتنضرب ف عدد السنين اللي هي 5 سنين يبقي افايده ف ال5 سنين هتكون 40 الف بالاضافه للمبلغ اللي انت قسطته اصلا اللي هو 100الف يبقي انت هتدفع ف ال5 سنين 140 الف يتم تقسيمهم علي عدد الاقساط او عدد الشهووور
ارجو اكون افدتك ف شيء

[esafegypt]

حضرتك ممكن تجيب عربيات كتيرة فى حدود ال 35 الف اللى معاك زى ما أ/ احمد الجندى قال لحضرتك بس اهم شئ تعمله وانت بتشترى انك تتفرج على عربيات كتير فى معارض كتير ولما خلاص تاخد قرار ان فى عربيه عجبتك وتمنها كويس على قد الميزانية يبق تروح تجيب سمكرى عربيات شاطر يشوف لك العربية والافضل ان السمكرى يكون من مكان بعيد عن المعرض علشان فى بعض الاوقات سمكرية بيكونوا عارفين اصحاب المعارض وبيجاملوهم
وفى نفس الوقت حاول تبعد عن العربيات الشاذة اللى ملهاش قطع غيار كتير خليك فى هيونداى او سيات ابيزا او فيات بونتو او سكودا فيليشيا وهكذه وممكن تلاقى لادا موديل حديث وال35 الف هتغرقها وتخليها جديده لانج لان اللادا لما بيتصرف عليها بيبان فيها يعنى عندك مثلا لو لادا 2105 هتلعب لها بين ال 17 وال 21 الف
لو لادا 2107 موديل 2007 هتعمل لها 34 الف بس هتبق معاك عربيه لو صرفت عليها اكنك معاك زيروا وفى نفس الوقت اى ميكانيكى هيفهم فيها وهتشترى قطع غيارها من اى مكان فى مصر واقتصاديه وحماله شقي وتستحمل معاك المشاوير الصعبة وعائلية والموديلات اللى بعد 2005 ممكن تلاقيها تكييف و باور يعنى انت وشاطرتك وفى موقع اسمة كونتاكت كار ممكن تلاقى عليه عربية كويسة وهتلاقى جميع الانواع انت اختار الماركة فى المستعمل وهو هيجيب لك اللى انت عاوزة http://www.contactcars.com
وعموما اى عربية لازم يكون معاك سمكرى موش ميكانيكى لان السمكرى هيعرف العربية متركب لها ربع وال نص وال عاملة حادثة وال ايه ظروفها وبالتوفيق ان شاء الله وابق طمنا انت جبت ايه

[صانع الخيال]

انا بفكر فى الاكسنت لان شكلها عجبنى لانها تشبه للعربيات الجديدة فايه رائيكم فى العربية دى وايه احسن موديل ليها وسعرها كام لو العربية حالتها جيدة جدا
وعايز اعرف ايه الفرق بين 1300cc و 1500cc
بخصوص القسط انا حسبتها على الانوس باعتبار انها ب 70 الف لاقيت ان القسط هيكون فى حدود 850 جنيه على 5 سنين وانا راتبى 2000 جنيه هيكون كويس ولالا
وعايز اعرف بس لو العربية المستعملة موديل 2000 هتكون كويسة ومش هحس بفرق جامد بينها وبين عربية زيرو موديل 2012
لانى لسا محتار بين اجيب جديد ولا مستعمل

[esafegypt]

كل سنه بتعدى على العربية بتفرق فى كفائه العربية يعنى موديل 2002 مثلا هتبق احسن من موديل 2000
اما عن فرق الموتور ال 1300 او 1500 cc
الموتور هيفرق معاك فى استهلاك البنزين وفى الصيف مع التكييف لو العربيه مكيفة لكن من وجه نظرى المتواضعة لو الموتور 1300 cc بس حالته كويسة يبق اشتري ومتخافش لكن لو تعبان يبق تجيب ال 1500 طبعا لو متوفرة يعنى الاختيار بحسب حاله الموتور