|
|||||||
| سوزوكى Suzuki بدات شركة سوزوكى نشاطها فى عام 1909 كشركة اقمشة لاكن مع الثورة الصناعية فى اليابان تحولت لانتاج السيارات عام 1952 وهيا تخضع حاليا لشركة جنرال موتورز حيث تملك الاخيرة نسبة 20% من اسهمها كما تمتلك سوزوكى شركة ماروتى الهندية Maruti من اشهر موديلاتها: سويفت ماروتى التو ليانا وايجنيس وجيمنى وجراند فيتارا و SX4 XL7 |
 |
|
|
أدوات الموضوع |
|
#1
07-12-2011, 05:42 PM
|
|||
|
|||
حكايتي مع المرور........>>>
السلام عليكم ورحمة الله وبركاته...
الاخوة الافاضل اعضاء اجمد منتدي .. طبعا زي ما حضراتكم عارفين اني دخلت عالم السيارات من اوسع ابوابه من حوالي 6 شهور... وطبعا كالعادة انه تم الشراء بالتوكيل والرخصة ...وطبعا لا الرخصة قربت تنتهي .. المفروض اني اقوم بالنقل والتسجيل ولكن .... يا معلمين اخوكم ميعرفش اي شيء ف حوارات العقاري والمرور والاشتغالات دي ...وطبعا ملقيتش اي علاج لحالتي الا اني اخوض التجربة بنفسي وهي كلاتي : طبعا العربية مرور اسكندرية وانا من الهرم جيزة ..سافرت اليكس عشان اجيب شهادة المخالفات والبيانات ...وحصلت علي شهادة المخالفات بس ...وقالي البيانات لا ...محتاجين العربية عشان نفحص لان الملفات اتحرقت في الثورة...يا نهار بيج..! رحت منفض للدنيا واخدت شهاتي ورجعت محافظتي ... وتاني يوم صليت الفجر ورحت علي العقاري عشان اسجل وانقل ...وطبعا عشان العربية ( جراند ماروتي 2005 )"البيه بتاع العقاري خلاني ادفع 1000 جند وعشرين....بيس بقي ماهي جراند مش عادة....! وبعدين روحت علطول اشتريت ورق تجديد سنتين ب 35 جند وبعدين قررت اتجه مباشرة علي مرور فيصل ..لان كل ده كنت في الشهرالعقاري اللي في بين السرايات.. وفي مرور فيصل حيث الاحترام المتبادل بين المواطن والموظف ..وحيث ان مفيش اي بلطجية ولا ناس بتتسنكح عليك وانت بتفحص ولا حاجة..وكمان مش هتلاقي ناس بتتنطط عليك وكانك خواجة ..ابدا ابدا يا جماعة ....ده مرور فيصل ده يا سلام ..كانك في الجنة الموعودة...! تريقة يا جماعة والله طبعا اثناء الفحص ..حضرتك بتدخل عربيتك ..وتركن وتاخد ورقك وتروح علي كشك كدة تحت الكوبري واقف فيه ظابط ب3 نجوم...هيختم ويكتب كدة شوية كلام بالاحمر كانها طلاسم سحر...وبعدين يقولك هات رقم الموتور والشاسيه... هتلاقي كدة واحد مالوش لازمة لابس عفريتة زرقا ومكتوب علي ضهره فني بصمة....بس اوعي حد يغلط ويقول اسطي (هناك يا فندم كل الناس بتقوله يا بشبهندس وطبعا هو بيعيش دورالهندسة علي ابوه) ..!المهم يعني البشمهندس ده هيكتب رقم الشاسيه والموتور علي الورق بتاعك ويختم...بس قبل الختم لازم تقفشه 5 جند جديدة....معرفش ليه وقالي عايزها جديدة...! وبعدين هتلاقي واحد لابس بلوفر صوف بني وقاعد كدة زي العرضحالجي بتاع المحاكم....ده بقي يامعلمين اهم واحد ف الليلة دي ...ده هو المهندس بجد بتاع الفحص...ولا فحص ولا دياوله...المهم هيفضل يعقدلك الدنيا لحد ميقفش منك المعلوم... وبرضه هيختم علي الورق.. وبعدين هتلاقي واحد قاعد كدة وقدامه شوية شواكيش هتعرف علي طول ان ده البيه اللي بيفحص الطفاية وبرضه بيختم ...(خلي بالكو قبل اي ختم لازم انت كمان تدفع المعلوم احسن هيعملك فيها القطط الفطسانة) واخيرا تروح للباشا ابو 3 نجوم ويكون معاك المثلث والعاكس...هتلاقي كدة عسكري واقف وقدامه طابور بني قادمين مستنيين يختم المثلث والعاكس...واخيرا تركب يا معلم ويقولك دوس بنزين ,,,ويساله خلاص ياباشا ؟ يقوله خلاص ..كدة عنب يامعلم وخش بقي علي التقيل.. تسيب ميدان الفحص وتروح علي المكان اللي بيكون زحمة دايما..وهتلاقي نقل قيد وتجديد ..هتقف في الطابور طبعا ...وتدي الورق للاستاذة الموظفة تراجعه وتقولك روح ادفع التامين ..وعشان انا هجدد سنتين دفعت 180جند ..وترجعلها تاني هتاخد الورق وتكتب لك الضريبة وتقولك ادفع 475 جند ده الضريبة وتامين اللوحات.وهاتلي 4ورقات صرف و4 ورقات استعلام ..والله معرفش بتوع ايه..! بعد حضرتك ما يطلع عينك ف الطابوربتاع الخزينة ..تروح للمدام تاني وتديها الوصل..هتقولك حمدالله علي السلامة ..فك اللوحات وتعالي اسمع اسمك.... هتلاقي واحد كدة بره المرور يقولك ..ايوة يا باشا فك لوحات ؟ ويقفش 5 جند... ترجع تسمع اسمك وتاخد رخصتك باسمك.... والف مبروك يا معلم ... حبيت اقول الخطوات بالتفصيل لاني طلع عين امي وملقيتش اي حاجة علي النت عن الحوار ده... بس نصيحة لله : لو حضرتك عصبي ..بلاش تروح احسن عشان لو اتخنقت ممكن تقتل حد فيهم والدال علي الخير كفاعله... 
|
|
#2
07-12-2011, 08:26 PM
|
|||
|
|||
رد: حكايتي مع المرور........>>>
هههههههه
بجد عندك حق والله انا قابلت كل الشخصيات اللى انت بتقول عليها ده من اول الظابط لحد بتاع الطفايه بس الى فقر فيهم المهندس ده كنا هنرخص عربيه بتاعة واحد صاحبى فى مرور فيصل والعربيه ملاكى المنوفيه مرور السادات والمهندس بعد ما اديناله البصمه قالنا تروحوا بقى مرور السادات تعملوا تاكيد على البصمه ورقم الشاسيه وتسلموا النمر وتجولى تانى صاحبى طلع 100 جنيه قال خلاص مش مهم سلموا النمر هنا واحنا نوديها بمعرفتنا ولا الظابط تحس انه شاب روش كده ولابس سلسه وانسيال وساعات وحظاظات كتيره كده فى ايده
|
|
#4
07-12-2011, 09:21 PM
|
||||
|
||||
|
رد: حكايتي مع المرور........>>>
اعتقد ان ال 5 جنيه جديدة عشان يعنى متكونش عارف رقمها وبالتالى تبلغ عنها وتتمسك معاه ويتعمله قضية
__________________
|
|
|
|
