وديت العربية توكيل النيسان للصيانة، طلبوا مني 29،000 ريال!!!

[hendyms]

السلام عليكم

رحت توكيل النيسان عشان أعمل صيانة ال 100،000 لعربيتي الصني موديل 2004، فقالوا لي أنها ستتكلف 29 ألف ريال؟!!!!!!!

استغربت جداً لأنهم تقريباً عايزيني أغير كل حاجة فيها

لكن الحاجات الأساسية اللي طلبوا مني أغيرها على وجه السرعة و اللي أنا مش فاهمها لأن أنا مابهمش حاجة في الميكانيكا هي كالتالي:

1-الرادياتير: قالوا إنه مصدي كله و لازم يتغير بالكامل ( مع إن العربية مابتسخانش مني! مش فاهم ليه لازم أغيره؟ مافيش طريقة تانية؟)

2- علبة دريكسيون، مع كل الليات: لي الضغط العالي و الواطي و لي الدريكسيون الداخل و الخارج، طلبوا مني أغير ده بالكامل لأنهم لقوا رشح زيت دريكسيون من تحت. طب لازم أغير كل ده؟ مافيش طريقة للإصلاح؟؟

3- مساعدات أمامية و خلفية بالإضافة للمقصات الأمامية. برده مش فاهم: هل لازم أغير كله و لا في حل بديل؟ علماً بإنه فعلاً أحد الشكاوى الرئيسية في العربية هو صوت التزييق و الصرير مع الملفات و عند المطبات.

أرجو الإفادة من الإخوة الأكارم أصحاب الخبرة

و جزاكم الله خيراً

[lonedoctor]

حياك الله
التوكيل يقول اللى هو عاوزه واحنا نعمل اللى على مزاجنا
سيبك من الكلام ده كله هما موش واخدين بالهم انه عربية صنى موديل 2004 لو اتباعت فى السعودية يوم ما يضربها الدم هتجيب 15000 ريال ولا ايه؟
نصيحة بيعها وهات زيرو من الايجار اللى بينتهى بالتمليك حاجة محترمة كورولا ولا حاجة وسيبك من الصنى دى يا اما ميكانيكى ابن حلال ب الف ولا الفين ريال هيظبطها ميه ميه
تقبل تحياتى

[hendyms]

يا باشا طبعاً أنا هنفض للتوكيل،،،، ده عايزني أغير كل حاجة و أحط جديد ما عدا الكنبة اللي ورا،،
على العموم أنا عايز أظبط كل حاجة برة بس باسأل عن البدائل المتاحة قبل ما أروح لاي ميكانيكي لأن الميكانيكية اللي هنا الفتي عندهم أسهل من شرب المية.
فلو عندك فكرة عن التلات حاجات دول يا ريت تفيدني و أكون شاكر ليك جداً

[lonedoctor]

المشاركة الأصلية كتبت بواسطة hendyms يا باشا طبعاً أنا هنفض للتوكيل،،،، ده عايزني أغير كل حاجة و أحط جديد ما عدا الكنبة اللي ورا،، على العموم أنا عايز أظبط كل حاجة برة بس باسأل عن البدائل المتاحة قبل ما أروح لاي ميكانيكي لأن الميكانيكية اللي هنا الفتي عندهم أسهل من شرب المية. فلو عندك فكرة عن التلات حاجات دول يا ريت تفيدني و أكون شاكر ليك جداً

انا عايش فى مكة حضرتك فين فى السعودية؟ لو انت من الغربية انا اعرف فى مكة الاسطى طه ده اخ وصديق وميكانيكى وكهربائى درجة اولى يظبطها 100%