الصناعة المصرية .. يعنى ايه ؟

[ahmedsherif1990]

من غير رغى كتيير انا كنت عايز اعرف ليه التقفيل المصرى -مش فى العربيات بس-فى كل حاجة من وجهة النظر العامة اللى يشكلها اغلبية عظمى من فئات المجتمع وحش..
سألت نفسى كتير ايه اللى خلى صناعة بلدك بهذا القدر من الابتعاد عن فئات المجتمع
ومن هذا المنطلق احب اجاوب على السؤال اللى فات من وجهة نظر 3اشخاص وهم
المستهلك ,التاجر ,المصنع
نبدأ
1-المستهلك (ليه ما بتشتريش الصناعة المصرى ياعم؟)
-رد وقال : انا ايه اللى يخلينى اشترى حاجة مصرى 1/2 عمر وممكن اشترى حاجة مستورده (غالبا صينى )و حمالة اسية و كمان ارخص
2-التاجر(ليه ما بتبيعش بضاعة من انتاج أو تقفيل مصر)
و هنا كان فيه واتنين تجار
الاول
-كان التاجر اللى عنده ضمير و يبيع بأمانة قال
بص يابنى انا ما باجبرش الزبون على حاجة هو اللى يشترى و هو اللى يختار و عندى من ده و عندى برضه من ده بس المستورد اكتر عشان الطلب عليه اكتر و فى الاخر انا عايز الزبون مرتاح عشان اعرف اكل عيش


- التانى
ده بقى التاجر اللى ذمته يجرى فيها عربية فيرارى و بايع اى حاجة عشان الفلوس
سألته و بعد الضغط بالاسئلة المتتالية لم يسعفه ذكائه ووقع و اعترف
"بص يا باشا انا عندى الاتنين و عندى ده ليه زبون وده ليه زبون "
ازاى
"كل واحد عامل نفسه فاهم ييجى و يقول انا عايز حاجة مستورده و حلوة و سعرها حنين "
آجى مديله المصرى و العلبة مكتوب عليها صنع فى الصين -او اى حتة -وده لعدة اسباب
1-ما ينفعش اشترى المصرى و يتركن ع الرف
2-كل واحد كان بتعجبه حاجة و سعرها معقول و يشوف المصرى يفضل الصينى لانه فى نفس السعر
3-ادينى عقلك فى بضاعة من المانيا مثلا سعرها فى اى حتة مثلا 100 جنيه و عندى زيها مصرى (بس انا بقول عليها المانى )و ب10 جنيه بس ببساطة انا عايز اكسب الزبون و فلوس الزبون
يعنى لو قاللى هات ابو 100 الاصلى هاجيب -وده الزبون الصايع -و لو قاللى هات ابو عشرة يرضه هاجيب
سألته و قلتله "طب لو اشترى منك ابو 10 ب 100 "
رد عليا وقال "حد الله بينى و بين الحرام يا باشا " هههههههه

نيجي لاخر واحد و هو المصنع
سالت العامل المصنع للشىء و قال
انا ليه انتج و ماحدش يشترى و بعدين ادينى بآجى كل يوم المصنع و اسجل حضور و امشى القط عيشى فى حتة تانية ما هى خربانة خربانة ..بصراحة عنده حق


مش عايز ابقى بشترى المصرى و اتدبس -انا- ولا عايز اشترى المستورد و المصرى احسن منه -فى بعض الحالات-مش بالضرورة يبقى المصرى وحش بس حط نفسك مكان اللى بيقفل و بيصنع
خليك موضوعى و احكم وفى الاخر دى فلوسك
المصرى لو لاقى اللى يشكر فى صنع ايده هيبدع-و الله العظيم ها يبدع- بس تلاقى واحد عايز يشترى مثلا عربية و تلاقى 100لسان يقوله -ابعد عن التقفيل المصرى -و هو ما جربوش وده اسمه العلمى (الكائن الفتاى )
و ارجو ما كنتش طولت عليكو
و مستنى ردكوا على اول موضوع ليا فى المنتدى العظيم ..مصر موتورز

[lol64]

موضوع جميل ومنظم واحييك عليه يااستاذ احمد
والله انا واحد من الناس اللى نفسها تشترى تقفيل مصرى لكن حط نفسك مكانى او مكان اى واحد من الشعب المطحون ده
اغلبنا مش هاقول كلنا طبعا بنطفح الكوته على راى المثل عشان تحوش لك قرشين ده لو قدرت تقدر تشترى بيهم عربيه
فلازم تشترى عربيه تطمن لها ويكون قلبك مستريح وانت سايقها
تجربتى انا كواحد من الناس فضلت الف فى النت كله وهنا فى المنتدى عصرت الاقسام والمواضيع عصر قبل ماشترى وجمعت اراء انا التقفيل المصرى لسه بيتحسس طريقه
ناهيك عن الاستهبال فى العمل المشهور به العامل المصرى لانه مش واخد حقه لا فى شغله ولا فى بلده اساسا
وطبعا ماكتفتش بكده سالت الناس وشفت عربياتهم هنا معايا فى الشغل وفى العائله تقفيل مصرى مش قد كده
فطبعا دى فلوسك وانت خايف عليها صعب قوى فى ظروف الواحد المهببه دى اجازف واشجع التقفيل المصرى مش وقته خالص بالنسبه لى
لو الواحد مرتاح شويه اقتصاديا كنت شجعت لكن حاليا انا بشجع برشلونه
تحياتى لك على موضوعك الرائع اخوك علاء

[ahmedsherif1990]

المشاركة الأصلية كتبت بواسطة lol64 موضوع جميل ومنظم واحييك عليه يااستاذ احمد والله انا واحد من الناس اللى نفسها تشترى تقفيل مصرى لكن حط نفسك مكانى او مكان اى واحد من الشعب المطحون ده اغلبنا مش هاقول كلنا طبعا بنطفح الكوته على راى المثل عشان تحوش لك قرشين ده لو قدرت تقدر تشترى بيهم عربيه فلازم تشترى عربيه تطمن لها ويكون قلبك مستريح وانت سايقها تجربتى انا كواحد من الناس فضلت الف فى النت كله وهنا فى المنتدى عصرت الاقسام والمواضيع عصر قبل ماشترى وجمعت اراء انا التقفيل المصرى لسه بيتحسس طريقه ناهيك عن الاستهبال فى العمل المشهور به العامل المصرى لانه مش واخد حقه لا فى شغله ولا فى بلده اساسا وطبعا ماكتفتش بكده سالت الناس وشفت عربياتهم هنا معايا فى الشغل وفى العائله تقفيل مصرى مش قد كده فطبعا دى فلوسك وانت خايف عليها صعب قوى فى ظروف الواحد المهببه دى اجازف واشجع التقفيل المصرى مش وقته خالص بالنسبه لى لو الواحد مرتاح شويه اقتصاديا كنت شجعت لكن حاليا انا بشجع برشلونه تحياتى لك على موضوعك الرائع اخوك علاء

اولا العفو و الشكر لله
بص يا سيدى مثلا
انت قلتلى انا عايز اشترى عربية حلوة مثلا و تقفيل نضيف رشحتلك عربية من ضمن كذا واحدة و انت اخترت الاكثر قيمة بجانب السعر (كماليات اكتر و امان اكتر و خامات انضف ) بس يعيبها -من وجهة نظرك ان التقفيل مصرى-على راى ناس كتييير منهم مجرب و منهم مش مجرب و بيفتى هتختار ايه
طب لو قلتلك ان العربية دى تقفيل بلدها و خبيت عليك انه تقفيل مصرى هتعمل ايه ؟
بلاش العربيات
خلينا مثلا فى الاكسسوارات معتقدش لما تدفع 5 ج فى حاجة مصرى و اسمك جربتها هتأثر فى حاجة ولاتدفع 20ج فى حاجة التاجر ممكن يغشك فيها ؟ ولا ايه

موضوع جميل تسلم ايدك

[lol64]

لا لا انت كده بتتكلم على خداع فى البيع انا بتكلم ان الظروف قدامك واضحه
هاقولك على حاجه يااحمد انا مثلا اشتريت كورى لان فلوسى متجيبش المانى او (يابانى تقفيل بلده )وخفت من الصينى فمسكت العصايه من النص واخترت حاجه كورى بحبها وتقفيل بلدها
وتصدق وتؤمن بالله انا شفت نفس عربيتى(التوكيل) خليجى مع ناس هنا فى سينا بدو اقسم بالله الدهان تحس انه افضل وتقفيل حاجات زى الانذار والسلوك بتاعته من تحت الطابلوه والكاسيت المتغير بحاجه وهميه اللى بيركبهم الحاج غبور فى مصر وعرفت الفرق

عموما ادعو الله ان الظروف تتحسن ومصر كلها ابداع بس ريحنى تجدنى (فهمت قصدى؟)