تقييم امانة لأسبرانز A516 من احد مالكيها ...... ادخل مش هتندم

[BASSEM BESO]

بسم الله الرحمن الرحيم

اولا انا حبيت اطرح تقييمى للعربية رغم انى عارف ان فى كثير من الأعضاء المحترمين الأساتذة طرحو هذا الموضوع اكثر من مرة بس انا حبيت اقول رأى يمكن يفيد حد ونبدأ بمعلومات عن سيارتى اللى انا راكبها
استلمت العربية يوم 11/1/2010 بعد 3 ايام من حجزها بس دة عشان كنت طالب لون اسود احب الألوان لى فى كل شىء دة كان موجود فى المصنع كتير منة المهم كنت حجزها من ابو الفتوح اللى فى المعادى
استلمت العربية الساعة2 اتنين رحت رخصتها فنفس اليوم كانت كل الأجراءات سهلة الحمدلله اول مشوار روحتو بيها كان اسكندرية طلعت مع اسرتى وتقييمى كالأتى:
1- العربية مريحة جدا جدا فى السفر ثبات عالى سرعة عالية كلة تمام الحمدلله .
2- موتور العربية لاهو يابانى ولا المانى ولا حتى صينى دة ماتور من شركة مشهورة جدا عالميا هى شركة استرالية اسمها AVL بتكنولوجيا المانية والموتور قوى يعنى فوق الجيدجدااا .
3- عفشة العربية هى هى بالظبط عفشة اللانسر البومة نظام تعليق مستقل بس ناشفة جداجداجداجدا ودى اوحش حاجة فيها بأمانة بس شغالة فى اصعب الشوارع اللى عندنا مصر دى لوشوارع اصلا
4- صالون العربية واسع ومريح رحنا 5 افراد مرتاحيين جدا
5- الكماليات اللى فى العربية هى اللى محليها كتيراوى وتخليها تتفوق على معظم السيارات اللى فى فئتها زى اللانوس و الفيرنا ( مزبلة مصر الأولى )
وفيها كل الكماليات ماعدا الأيرباج مفيهاش ايرباج ولاحاجة كل الكماليات اللى فيها وحدة رفع واربعة زجاج كهرباء و فتحة شنطة وتانك من الداخل وفتح الشنطة من الريموت وجهاز انذار وتحكم فى حجم الأضاءة الأمامية خصوصا فى السفر وكاسيت و سى دى كلاريون عالى المستوى يفوق السونى والبيونير (بدون مبالغة ) وهذا ينزل للملاكى وليس التاكسى تكييف العربية روعة تلاجة اذا ضبطة على اعادة توزيع الهواء الداخلى و 5 جنوط اسبور.

6- توكيل العربية وهو اهم حاجة بالنسبة للناس احب اقول اما رحت صيانة ال1000 ك للتوكيل اللى فى ميدان الجيش لقيت الملاكى مع التاكسى مع الدايو واخر هيصة بس اما روحت صيانة ال5000 وجدت مفاجأة سارة بالنسبة لى وكل ملاك اسبرانزا لقيت نقلو التوكيل شوية بعد القديم ب100متر والقديم خلوة للتكسيات فقط دخلت لقيت حاجة ماشاء الله 7 نجوم والله معاملة شيك من مهندسى الأستقبال بالمناسبة هما اتنين واحد اسمة سيد والتانى كريم شباب فى سننا كدة مية مية متعاونين لأقصى درجة بعد مايكتب اللى انا عاوزة فى امر التشغيل يقوم يبص معاك على العربية لو فى حاجة خطيرة ولا حاجة بعد كدة يأما تنتظر العربية فى قاعة مكيفة وجميلة وشيك بجابها مصلى اذا حبيت تصلى وملحق بها بوفية مشروبات يأما تسأل على موعد استلام العربية وتروح تخدها بعد كدة فى الميعاد المتفق علية وبأمانة شديدة جدا هو احسن من غبور بكتتتتتتتتتتتير جدا .

تظبيط العربية :
نواكل امامى وخلفى و اشارات و ابواب ومرايات وحلية تانك وشماسات وستاير جانبية وخلفية وفامية جانبى تبقى راكب احلى عربية

ملاحظة : انا روحت التوكيل عشان اغير ماكينة رفع الزجاج عند 3000 كيلو وغيرهالى من غير مشاكل وفنيين عاليين المستوى و العربية دلوقت عاملة 6576 ك .

مميزات العربية :
1- سعرها معقووول جدا وتتقرن مع فئات اعلى منها .
2- كماليتها كتير جدا وجميلة .
3- قطع غيارها متوفرة بكثرة فى التوفيقية والحرفيين وشارع دمشق واحمد سعيد .
4- توكيل ميدان الجيش اكثر من رائع بأمانة .
5- مريحة جدا فى المشاوير الطويلة .
6 - تطبق نظرية القيمة مقابل النقود
7- شكلها الفخم من الأمام من الخلف لا .
8- موتور قوى يشد ويسحب العربية ويعيش .

عييوب العربية :
1- عفشة ناشفة جدا
2- رعشة خفيفة مع التكييف (حظبطها فى التوكيل فى صيانة 10000 )
3- شكمان مش جيد لكن مقبول
4- صوت السى دى ليس قويا بالرغم من وجود 6 سماعات لكن صغار
5- الأنوار الخلفية بتبوظ بسرعة رديئة جدا
7- نوع الكاوتش غير جيد الى حد ما

انا نقلت تجريبتى ليكو بكل امانة فسامحونى لأطالة وانا اول مرة اشارك فى المنتدى فأرجو معرفة ارائكم وانشاء الله اجيب صور لعربيتى المرة الجاية وانا على فكرة ركبت عربيات كتير والحمد لله زى النترا وفيرنا وسيراتو ومازدا 3 و نيسان صنى وهوندا سيفيك و فيات 132 و128

[odaoda]

تجربة جميلة ومقبولة جدا وانتشرت بشكل ينم عن انها عربية تستحق سعرها وثقة الناس فيها

[freewelly]

لك جزيل الشكر على نقل تجربتك والسيارة انتشرت بشدة هذه الايام وانا فكرت فعلاً اشتريها لكن الاراء متفاوته فيه اللى يشجعك وفيه اللى يخليك تصرف نظر عنها تماماً ومش عارف لغاية دلوقت اشتريها ولا! على العموم اللى فيه الخير يقدمه ربنا ومرة اخرى شكراً جزيلاً

[حازم شاهين]

شكرا على التقرير الجميل و ربنا يبارك لك فى العربية

لكن فى معلومة محتاجة تصحيح

و هى بخصوص موتور عربيات اﻹسبيرانزا (ACTECO)

جميع المحركات بسيارات إسبيرانزا مصنوعة فى الصين فى مصنع شركة شيرى للمحركات

و انا بأكد على المعلومة دى للجميع منعا للبس و اللغط فى المعومات

الموتور صينى التصنيع بالكامل

و ده رابط موقع شركة شيرى للمحركات
http://www.cheryacteco.com/en/

أما دور شركة AVL فهو تصميم المحرك فقط و هى بالمناسبة شركة نمساوية (Austrian) و ليست أسترالية

و ده الرابط لموقع الشركة

https://www.avl.com/home



و شكرا مرة أخرى على التقرير

[luckyman]

تمام بس احب اعمل تصحيح لمعلومة بسيطة وهى ان المحرك المجهزه به السيارة ليس لشركة استرالية انما هو صنع صينى وبالتعاون والاشراف من شركة نمساوية AVL
وهذا لا يعيب السيارة فى شىء انما هو ميزة حيث انها تعتبر الشركة الصينية الوحيدة والاولى التى بدات بانتاج المحركات بمصنع منفصل كما اتن لها مركز تطوير وابحاث بالتعاون طبعا مع كبريات بيوت الخبرة العالمية وهى ميزة وبدأت بالفعل بتصدير بعض المحركات لتجهيز بها سيارات اوروبية امثال فيات الايطالية لتجهيز بعض موديلاتها الجديدة بها
شيرى تجربة تستحق الاحترام والوقوف عندها وان كانت ليست الشركة الاولى من حيث ارقام الانتاج الا انها الاولى من حيث النوع والنوعية اتمنى ان يكون المنتج المجمع المحلى على قدر المستوى المطلوب وان لا يفرط فى نوعيات المواد المغذية فى التجميع وان تفعل المصانع الام فى الصين الرقابة والجودة لكسب زبائن جدد والا فالبقاء للاصلح ودمتم بود