اشتريت جهاز ديفيدي تتش و عاوز واحد كويس يركبة

[DocAmro]

السلام عليكم ورحمة الله و بركاتة
انا جبت جهاز GPS DVD touch من برة نوعة RoadMaster و كنت عاوز من حضراتكم ترشحولي محل او شخص بيفهم كويس يركبهولي في عربية النترا..

وشكراً مقدماً

[Injection]

بص ياباشا, هو شكل حضرتك ركبته علشان ردى جاى متأخر, فيه أدريان فى جامعة الدول العربية, وفيه محلات كتير فى ميدان السواح تقدر تقوم بالمهمة, الموضوع سهل جدا وحضرتك ممكن تعمله بنفسك بمفك, لأنه كل فك وتركيب فأى محل صوتيات يقدر يعمله, ومش لازم محل مشهور.

وألف مبروك على الكاسيت الجديد.

[DocAmro]

الف شكر Injecton باشا علي ردك
انا لسه معملتش فيه حاجة كنت مستني رد.. بفكر والله اركبة بنفسي بس مش عارف التوصيلات هتبقي سهلة ولا صعبة
و معاه gps antenna مش عارف هركبها ازاي...
لو حضرتك عندك معلومات عن الموضوع يبقي زي الفل...
ولو هركبة عند محل تعرف هيبقي عاوز حدود كام؟

جزاك الله خيراً

[Injection]

لو حضرتك من هواة شغل ال do it yourself ممكن تعمل الموضوع كله بنفسك, والجى بى أس الantenna بتاعه بيتركب على التابلوه عند الزجاج الأمامى كده أو فوق العربية أو عند المراية, أى مكان واضح.

تكلفة التركيب متهيألى لن تتعدى ال 30 الى 50 جنيه, بس طبعا هتتغير حسب المكان.

أدريان ليه فرع فى شارع جامعة الدول, وفيه فى شارع المطبعة فى الهرم, وفيه كمان فى ميدان الحجاز بس ماعرفش المكان بالظبط.

هو يفضل حضرتك تركبه عند حد أحسن علشان ال DIY نتاجئه بتبقى أحيانا صادمة, وأى محل صوتيات كويس هيركبه لحضرتك, علشان المشكلة هتبقى فى خلع الكاسيت القديم من مكانه وخاصة لو حضرتك مفكتهوش قبل كده.

وفيه محل صوتيات عند سنترال القبة, على اليمين بعد الكوبرى فى أتجاه روكسى عند مطحنة القهوة لو حضرتك تعرفها, فيه محل أنذارات ومحل صوتيات, دول ناس كويسة وفاهمة وأتعاملت معاهم قبل كده من فترة.

وربنا يسهل لحضرتك المهمة

[DocAmro]

روحت من يومين لمحل أدريان اللي علي طريق الأوتوستراد جنب سيتي ستارز و سئلته عن تركيب الجهاز قاللي اركبهولك... قلتلة بكام .. قاللي 150 جنية !! رديت عليه 150 جنية ليه هو انا جايبة بكام عشان اركبة ب150 ! و رحت ماشي !!!
ان شاء الله هركبة بنفسي و ابقي اقولك النتايج

شكراً علي تواصلك واهتمامك