انا طالب المشورة من اهل المعرفة

[smra]

السلام عليكم يا جماعة كل سنة وانتم طيبين بمناسبة الشهر الكريم
شوفوا بقى انا محتار ومش عارف اتكلم مع مين عاوز اللى يدلنى, انا معايا عربية 127 سوبر فيورا موديل 87 من يوم ما اشتريتها كلفتنى كتير عشان تبقى عربية حلوة لغاية ما بقت 100- 100 ميكانيكا وعفشة ورادياتيير وفتيس5 غيار من كل ناحية كمان غيرت كاوتشاتها تيوبلس بس المشكلة انها عايزة سمكرة ودوكو دلوقتى قدامى عربية حلوة بالتكييف وانا عاوز اشتريها بس لازم ابيع دى الأول عايز اعرف سوقها تجيب كام دلوقتى ولكم الشكر مقدما ادعولى بقى ربنا يفتحها فى وشى

[hazem_khidr]

لو حالتها حلوه و رقم كارتيره و ما رشتش دواخل اطلب فيها 17 الف جنيه
و ممكن تقل الف ولا اتنين بس ما تزيدش عن كده

[smra]

الف شكر يا استا\ حازم بس لو راشة دواخل ويعنى ايه رقم كارتيرة معلش تعبتك

[hazem_khidr]

بص يا سيدي
رقم كارتيره معناها ان رقم الشاسيه بيبقي في الحوض اللي فيه الموتور كده في حته ضعيفه
كتير من ال 127 المكان دا بيجي فيه بارومه و اصحاب العربيات بتروح المرور و تنقل رقم الشاسيه علي القايم
علشان لو الرقم راح نتيجه البارومه او السمكره مش حيعرف يرخص العربيه

علشان كده لما تلاقي عربيه و رقم الشاسيه علي الكارتيره تعرف ان العربيه دي متحافظ عليها و نضيفه.
اما بالنسبه لمعني كلمه راشه دواخل
معناها ان العربيه دي ما رشتش القوايم بتاع الباب و حوض الموتور و السدر اللي متثبت عليه الكابود
و الشنطه و الستاره الخلفيه و دا بيدل ان العربيه ما اخدتش اي خبطه قبل كده في الاماكن دي.
و دي لازم واحد يكون فاهم في العربيات ياخد باله منها لان من الصعب علي واحد جديد يعرفها

[smra]

شوف يا سيدى وانا باشتريها الميكانيكى بتاعى قاللى انها مارشتش جوة بس وانا بارخصها فى الفحص لقيت رقم الشاسيه على الصاجعلى الجمب اول ما تفتح الكبوت علطول بس كان متغطى بوية عشان كدة عرفت انها كانت مرشوشة وان الميكانيكى ده اى كلام معلش اصلى لسة باتعلم العربيات واحدة واحدة شكرا تانى لتعبك بعد ده كله ايه رأيك اعرضها بكام ولا استنى عليها شوية يمكن الأسعار تعلى بعد عمر طويل