مطلوب وظيفة مدرس إنجليزي في مدرسة دولية في الخليج - أرجو النصح

[egyptiandiver]

السلام عليكم أحبابي في مصر موتورز،
أنا أحمد مدرس إنجليزي و عندي الحمد لله خبرة في المدارس الدولية، المهم أنا عاوز أسافر السعودية أو أي دولة خليجية و اشتغل مدرس انجلش أو مساعد للطلاب الضعاف هناك، المسألة اني مش عارف المدرسين المصريين هناك بياخد كام و إيه ظروف العقد و أسمع إنو مبيدوش مرتب في الصيف؟ تنصحوني بإيه و لو تعرفو مدارس كويسة أقدم فيها، و لو حد مدرس و عارف إيه نظام مدرسين الانجلش المصريين هناك... يا ريت ما يبخلش علي بالنصيحة،

جزاكم الله كل خير و حسن لكم و لنا أجمعين الاحوال،
أخوكم أحمد
--------------

[3bd0]

هوا بصراحة انا مش مدرس وماليش علاقة بالتدريس خالص،
بس انا مستعد أجاوب حضرتك على اي سؤال في ظروف المعيشة بشكل عام

وكحاجة أساسية كده في كل الوظائف، لو عاوز ترتاح، مططلعش من بلدك من غير عقد عمل في ايدك.
معظم الناس (بالذات اللي معهمش شهادة جامعية) بيضطروا يجو الاول بتأشيرة زيارة ويقولك ابقى ادور على شغل هناك. ده يبقى اكبر غلط لواحد زي حضرتك، انتا راجل مدرس ومصري، صدقني هما اللي محتاجينك مش العكس (قليل قوي من اهل البلد اللي بيحب الإنجليزي لدرجة انو يطلع مدرس فيه).

فنصحتي ليك انك تتفق على كل حاجة وانتا في بيتك معزز مكرم، وتمسك العقد وتدرس شروطهم قصاد فلوسهم كويس جدا. والاحسن والاحسن كمان ان يكون ليك حد في نفس المدينة تتصل بيه يديك فكرة عنهم.

ولو في عند اي حضرتك اي سؤال انا تحت امرك

[egyptiandiver]

ألف شكر ليك يا أستاذ عبدو على رد حضرتك الكريم علي، طيب مثلاً معدلات الاجر في مدينة ذي الرياض أو جدة لشقة صغيرة أو ستديو في المدن الخلججية إلي تعرف عنها معلومات رنجها من الرخيص للغالي في حدود كام؟ عشان الإيجار من أكتر التكاليف إلي هناك و في نفس الوقت السكن شركةً مع ناس تانيين أكيد مش مريح، و يا ريت لو في مدرسين في مدارس دولية في الخليج ميبخلوش علي بالمعلومات، و جزاكم الله جميعاً خير الجزاء، أخوكم أحمد سامي

[3bd0]

والله مقدرش اديك رقم بالظبط لأني مش عايش هناك، بس 99% مش اقل من 1000 ريال في الشهر وده مبلغ قليل كمان
اقل من كده هيبقى غالبا سكن عمال او مبنى ايل للسقوط
فكرة الاستديو مش منتشرة اوي، بس ناس كتير بتتشارك في شقة واحدة عادي

في مدارس كتير، بالذات غير الحكومية، بتوفر سكن للمدرسين (بيبقى عندهم عمارة، او مجمع سكني) انا رأيي ان ده احسن حل لو متوفر لحضرتك، حتى مبدأيا لحد ما تاخد على وضع البلد. احساسك بالغربة هيبقى اقل + المواصلات من والى المدرسة هتبقى اسهل

السكن مع ناس تانية مش وحش اوي، بالذات لو مع ناس مصريين او مع مدرسين (مش تبع المدرسة)، هيخفف عليك التكاليف وكمان مش هتبقى مرتبط بعقد وبالتالي تطلع في وقت اول ما تلاقي حاجة احسن

نقطة اخيرة: لو المدرسة مش هتوفر سكن، لازم تديك بدل سكن، خد بالك من النقطة دي في العقد

[egyptiandiver]

مفيش مدرسين مغتربين يا جدعان؟