|
#1
04-10-2012, 02:31 PM
|
||||
|
||||
حكايتـى......... مع الكارونة
السلام عليكم جميعا إخوانى الكرام
مرحبا بكم فى الجزء الثالث من سلسلة حكايتى اللى بحاول أسرد فيها اللى بيحصل معايا بالظبط فى عربيتى ، واه اللى بعمله بالظبط علشان كلنا نستفاد الموضوع بدأ معايا من يوم مافكيت العربية من جوا الصالون وكده لاحظت ان الكارونة مع المشى وخصوصا فى السرعات من 80 ونتا طالع بيكون لها ونة طبعا راجعت على الزيت لقيته تمام كان زيت 140 والدنيا زى الفل بس لاحظت ان فيه فايظ فى الكارونة من فوق وكان بيرشح زيت الحاجة التانية انها كانت بتخبط مع المشى ونتا بتنقل الغيارات وخصوصا من الأول للتانى ومن التانى للتالت قولنا ماشى لما لقيت الموضوع زاد روحت لواحد متخصص كوارين وفتايس فى حدايق القبة (الكلام ده كان قبل العيد الصغير اللى فات ) قاللى الكارونة مبوشة من جوا وهتحتاج عمود بنيون وترس تاج (تمنهم 1200 جنيه لو لقيتهم ) ونا من جوايا عارف ومتيقن ان كارونة ال131 والشاهين ضعيفة ومش بتاعت شغل ده عمود البنيون :  المهم قولت ماشى اهى كده كده ماشية على ماتفرج وساعتها نشوف هنعمل اه ساعتها استشرت ناس جميلة اوى من أعلام المنتدى فى الموضوع ده وقالولى على وصفات وخلطات عشان تكتم الصوت وبالفعل عملت الوصفات وكانت بتكتم شوية وشوية وترجع تانى لكن كانت ماشية والفايظ بتاع الزيت من فوق كان بينفخ وطبعا بتقل معايا الزيت وصوتها يعلى المهم واحد صديقى من المنتدى قاللى انا عندى حلها واتفقت معاه اعدى عليه ونشتغل فيها جبت حاجات بناءا على طلباته وبناءا على انه عملها قبل كده فى عربيته وعربية صديقه والحاجات اللى جبتها : 1- علبتين صنفرة روديه ناعم وخشن 2- كيلو شحم متعدد الأغراض 3- زيت فلفالين 140 4- علبة زيت شنبر 5- اويل سيل كارونة 6- جوان الكرتيرة اللى ورا بتاع الكارونة بدأنا الشغل فيها من بعد العصر وعلى ماقفلناها كانت منتصف الليل ملينا الزيت وطلعت جربت العربية تمام وزى الفل ونا مروح بقى تفاقمت المشكلة الكرونة صوتها بيخشن ، طيب اعمل اه أركن فين ونا كنت مروح من الدقى ورايح على التجمع وبتخشن ونا على كوبرى اكتوبر ، يعنى ماينفعش تقف فضلت مسايسها خااااالص وماشى ع التانى من عند التحرير لحد مانزلت من كوبرى اكتوبر نزلة المقطم طبعا من كتر السخونة الكارونة كانت هتقفش وقفت بيها واستنيت بالعافية روحت البيت على الساعة 3 ونص وبرضو ماشى ع التانى عرفت ان خلااص مفيش امل وانها باظت ولازم أجيب واحدة جديدة الساعة 4 الفجر وانا من امبارح فى الشارع ، قولت مش هروح غير لما اصلحها والصراحة كنت حاسس انى اتعلم عليا ونا نازل عزبة شلبى وبالظبط عند ميدان السواح كانت بتتكسر وقفشت خالص بعد الميدان بشوية ركنتها ونزلت وكنت متفق مع واحد معرفة بيشتغل فى البولونيز سألته على الكارونة قاللى 750 جنيه وكنت خلاص هجيبها وأعدلها على عربيتى وخصوصا انى مش بحب فرامل ال131 صاحبنا بقى ماجاش واتأخر قولت اتمشى شوية فى العزبة كل اللى عنده كرونة 131 بيتكلم فى عمودين مقفولين وضمان أسبوع وفى واحد باشا بيقول 2300 وضمان شهر يافرحه الحاجة بيك بالصدفة لقيت يافطة كبيرة مكتوب عليها سلامة أخصائى كوارين 131 يابانى وشاهين ولادا وبتاع قولت أكلمه ايوه يا عم سلامة انت فين قاللى سوانى وأنزلك كانت الساعة 9 الصبح ولسه العزبة مفيهاش سريخ ابن يومين حكيتله على اللى حصللى واللى دوشتكوا بيه ، قاللى انسى ماينفعش طبعا اللى عملته وقاللى عندى حلها وراح مشاورلى على فارغة بتاعت 131 زى اللى راكبه عندى بالظبط قاللى هتاخدها وتروح تركبها وتجيبلى القديمة وهتدفع 800 تما قولتله زى الفل طبعا كان يوم السبت ميعاد مقابلة رابطة ملاك السفينة ال132 كلمنى أستاذ/ مصطفى عاطف وعرف المشكلة اللى انا فيها وفى الحال قرر هو والأستاذ ايمن الروبى انهم يقابلونى استنيت والحمد لله وصلوا بالسلامة أخدنا الفارغة وروحنا على العربية وفى الطريق إتصلت بمحمود عفشة صاحبى وفكينا القديمة وركبنا التانية الأكسات كانت مختلفة رجعت على سلامة وأخدت منه أكسين جداد وركبتهم وطلعت بالعربية الحمدلله لكن العربية كانت بترج جامد من سرعة 50 ونتا طالع حاجة تسد النفس وخصوصا بعد المصاريف اللى صرفتها قعدت يومين راكن العربية ونفسى مقفوله منها اوى المهم امبارح روحت على كمال الخراط متخصص فى الكرادين فى ميدان الظاهر بيبرس قرب باب الشعرية والحمدلله ظبط الكردان والعربية الحمدلله بقت كويسة الكارونة تمنها 800 جنيه من عند سلامة فى عزبة شلبى دروس وعبر : ماتحاولش تفك كارونتك ولا تعمل فيها اى حاجة اهم حاجة ماتنقصش زيت الكردان هو روح العربية ومهم اوى يتراجع عليه دوريا سيبك من الخلطات والكلام اللى ملوش لازمة ده اثبتت الفيات ان الجر الخلفى فاااااشل طيب بالنسبة للكارونة الجديدة هى كانت بتاعت اللادا الجيب ومشغولة جوا الفارغة بتاعت ال131 يعنى مش بتاعت 131 أصليه ، لكن بتقضى الحال وعلى أد تمنها الكرونة اليابانى لل131 مشاكلها كتير على سبيل المثال لا الحصر الأكس لو حصل فيه حاجة بترمى الكارونة كلها بتفوت الموتور بسرعة لأن اليابانى عير الفيات بالنسبة لمعدل الدوران ونقل العربية من الثبات ، ده غير مشاكل تانية ممكن تحصل فى الفتيس ونسبة نحاجها 60 % او اقل لأن سلامة بيقوللى كان لسه عنده واحد مغير كرونة يابانى ب 1500 جنيه واترمت واخد واحدة تانية فيات من عنده ادعولى ربنا يسترها معايا ومعاكم يارب لأن العربية دى كل ما أدفع فيها جنيه بتأدبنى بعشرة بالنسبة للكارونة القديمة واللى حصل فيها انا متوقع اننا ماربطناش البنيون كويس وبالتالى فك ونا ماشى لكن الكردان حافظ على الفلانشة بتاعت الكارونة انها تفضل فى مكانها لكن البنيون قعد يلعب لحد مااتكسر وقفشت  ربنا يسترها معانا ومعاكم يارب وأى حد عاوز إستفسار فى الموضوع ده انا مش هتأخر عنكم تحياتى وإحترامى أخوكم هشام الجزار 
|
|
#2
04-10-2012, 02:36 PM
|
||||
|
||||
رد: حكايتـى......... مع الكارونة
شكر واجب وتحية تقدير وإحترام لإخوانى أ\ مصطفى عاطف أ\ أيمن الروبى م\ عمرو السيسى م\ محمد مرسى وطبعا مش هنسى م/ كارز أدماير م/ حمدى المخترع التعديل الأخير تم بواسطة Hisham.Elgazzar ; 04-10-2012 الساعة 02:46 PM
|
|
#3
04-10-2012, 02:46 PM
|
||||
|
||||
رد: حكايتـى......... مع الكارونة
موضوع جميل جدا يا هشام بية
ومعلش قلبى عندك ولو اعرف والله كنت جتلك بس انا اعرف تاكسى كتير مركب يابانى او فولفو وما فيش اى شكوى اية الاختلاف
__________________
يااااااااااااا رب إرحمنا بقدرتك علينا 
|
|
#4
04-10-2012, 02:52 PM
|
||||
|
||||
رد: حكايتـى......... مع الكارونة
متتبطرش علي عربيتك في ناس تتمني تكون عربياتها دفع خلفي وربنا يباركلك في الكارونه اللي ركبتها علي فكره في واحد صديق والدي قالو ان في الظاهر في باب الشعريه ناس متخصصه في ميكانيكا وعفشة ال 132 - 131 - 125 - 124 فيات وهو قالي هيبقي يقابلني في مره ويعرفني علي صنايعيه هناك تمام واي شغل ابقي اروحلهم
__________________
 استفسر عن دهان سيارتك !!! اللهم لك الحمد كما ينبغي لجلال وجهك وعظيم سلطانك ورشة إيه آي أوتو بينت لسمكرة ودهان السيارات
|
|
#5
04-10-2012, 02:54 PM
|
||||
|
||||
رد: حكايتـى......... مع الكارونة
ومع الأسف الجديدة سعرها 800 جنيه لكن أخدت معاها مصروف نثريات كتير اوى وصلت 1500 جنيه تخيل لو كان سعرها اساسا 1200 كنت وصلت لكام ؟؟ الحاجة التانية موضوع الكردان وتظبيطه وتعديل الفرامل الخلفية ومتاهات تانية كتير كمان اللى عرفته ان اليابانى الأكسات بتاعته عزيزة وممكن تضطر تغير دفرنس كامل لو اكس اتكسر عموما الخير فيما اختاره الله انا ماكانش قدامى اختيارات كتيرة وخصوصا انى كنت مبيت فى الشارع وعايش كابوووس ربنا يحفظنا جميعا شكرا اوى على إهتمامك يا صديقى وعلى فكرة دكتور الكرادين اللى حضرتك وصفتهولى الله اكبر عليه معجزة بكل المقاييس ربنا يحفظه
|
 |
|
|
