مصطلحات هاتجنني

[thegiant_2]

انا اموت واعرف المصطلحات دي يعني ايه ياريت اي حد فاهم يقوللي
يعني ايه موبينه-- كتاوت-- كبالن-- مشاحم-- سيلانسيه-- كرادين
معلش يا جماعة انا لسه جايب عربيه جديد ومحتاس مع الكلام ده

[mr_astra]

المشاركة الأصلية كتبت بواسطة thegiant_2 انا اموت واعرف المصطلحات دي يعني ايه ياريت اي حد فاهم يقوللي يعني ايه موبينه-- البوبينة هى وحدة رفع الفولت (بوبينة تكرير) من 12 فولت وهو جهد البطارية الى الافات الفولتات طب لية بنعلى الجهد بالشكل دة عشان يكون قادر على المرور بين قطبى البوجيهات على صورة او شكل شرارة اللى بدورها قادرة على احداث حريق البنزين داخل غرفة احتراق المحرك ويحدث الانفجار مولدا قوة كبيرة قادرة على ضغط البستم لاسفل وينتج حركة ترددية ومنها نحولها الى حركة دورانية كتاوت-- هو نقط تلامس بنقدر بية نشغل اى جهاز كهربى زى مروحة التبريد - المارش- حتى اللمبات والكلاكس ممكن نركب ليهم كتاوت انما لو اعتمدنا على نقاط التلامس الاساسية اللى فى العربية سرعان ما هيحصل ليها تاكل وتلف بمعنى اخر بنستعيض عن مفتاح النور مثلا انة يتحمل شدة التيار بتاع اللمبات ونخلى وسيط بنقط تلامس قوية هو اللى يستحمل شدة التيار المسحوبة للمبات كبالن-- هى وصلة مرفقية ليها حركات امام وخلف ولاعلى ولاسفل وهى وسيلة نقل الحركة من الفتيس الى كاوتش السيارة عن طريق وسيط وهو اكس الكوبلنج مشاحم-- بقت موضة قديمة خلاص وهى عبارة عن بنز مزود ببلف وظيفتها اننا ممكن نشحم حاجة متحركة زى مثلا صليبة كردان او جلبة مقص سيلانسيه هى سرعة دوران المحرك بدون الضغط على البنزين يعنى وحضرتك واقف فى اشارة مثلا والعربية دايرة ...الموتور ساتها بيكون داير على السلانسية وعادة ما بيكون 750 لفة / دقيقة بتزيد عدد اللفات دى بالضغط على دواسة البنزين -- كرادين هى وصلة طولية واصلة بين الفتيس والكارونا يعنى وسيط نقل حركة وبيكون راكب عليه عدد 2 صليبة وعدد واحد كرسي والكرادين موجودة فى العربيات الدفع الخلفى انما الجر الامامى مش بيكون فيها وخلى بالك انها راكب عليها صلايب فيها مشاحم معلش يا جماعة انا لسه جايب عربيه جديد ومحتاس مع الكلام ده

اى حاجة تطلبها ما تترددش والرد فى الاقتباس

[thegiant_2]

المشاركة الأصلية كتبت بواسطة mr_astra اى حاجة تطلبها ما تترددش والرد فى الاقتباس

متشكرين اوي يا غالي وس}ال اخير ايه هي الطنابير

[mr_astra]

الطنابير هلى اللى بتخلى العجل يلف وبيركب على الطنابير تيل الفرامل
واكيد بتسمع مشكلة التيل والطنابير لانهم من الحاجات اللى بتتغير باستمرار خصوصا تيل الفرامل اللى هو بيوقف العربية

[tameromarw]

تحيه للمجهود الرائع والشرح الوافي ومحاوله مساعدة المستجدين
شكرا من القلب

سؤالي ممكن شرح دائرة الفوانيس الامامية مع الكتاوت والبطاريه وباقية الدائرة

لاني عايز ازود قدرة اللمبات وعربيتي راكب فيها كتاوت بس عايز اراجع عليها وامد ايدي فيها علشان افهمها