|
#1
19-02-2011, 01:52 AM
|
||||
|
||||
** أيام في امستردام - جنيدي الذي لا نعرفه **
بسم الله الرحمن الرحيم
الموضوع ده تأخر كثيرا ،، كان المفروض أكتبه من فترة طويلة بس بسبب ظروف الثورة ،، مكنشي هيكون مناسب أبدا عرضه في هذا الوقت دلوقتي الحمد لله بعد نجاح الثورة و هدوء الأوضاع نسبيا قلت أنزله بقه من ناحية إن إحنا نحاول نرجع لحياتنا الطبيعية و نخفف شوية عالناس الشد العصبي الناتج عن الأيام المجيدة اللي مر بيها الوطن الحبيب يمكن جزء منكم يعرف إني كنت في رحلة لأوروبا أساس الرحلة كان مدينة كولون في ألمانيا لزيارة معرض أثاث عالمي هناك حيث الآثاث مجال عملي و طبعا كان فيه هناك مقابلة لصديق عزيز آخر ،، ممكن تعرفوا تفاصيلها من اللينك ده بعد ذلك شديت الرحال لامستردام ،، هولندا كنت قبلها بفترة طويلة ،، مكلم أخونا الأكبر أ / محمد جنيدي و الصراحة إن مسار الرحلة اتحول لامستردام بفضل تشجيعه ،، و هريته اسئلة و استفسارات و أعمل أيه و أروح فين و اخد معايا أيه و الراجل الصراحة لم يتأخر أبدا في المساعدة بأي معلومات بل و الأكثر من ذلك كما ستعلمون من الموضوع لدرجة إنه كان عايز يستضيفني في بيته ،، و بيتكلم بجد ،، و أنا رفضت طبعا لأني عارف إنه وراه عائلة و مسئوليات و أنا واحد جاي يتفسح في أوروبا غير إني كان المفروض اسافر أنا و صديق ،، مجاش في آخر لحظة بعض صور بداية الرحلة من كولون لامستردام و القطر التحفة في رحلة استغرقت ثلاث ساعات و نصف لم اشعر بهم     الوصول لمحطة قطار امستردام الرئيسية  و بعد الوصول ابتدي الاتصال ب أ / جنيدي ،، اللي كنت بتصل بيه قبل ما اركب القطر اساسا و حصل موقف سخيف جدا جدا ،،، موبايلي كان عمال يقطع شحن و يدوب اسمع كلمتين من أ / جنيدي ،، تعالالي في الحته الفلانية هتلاقي مش عارف أيه و الخط يقطع ،، افضل ماشي و أروح هنا و هنا ،،، و أ / جنيدي حالته اصعب مني عشان جاي بعربيته و منطقة المحطة دي اساسا الركن فيها ممنوع و بيعمل مغامرات عشان يستناني و الحمد لله بتوفيق ربنا و الصدفة البحته اتقابلنا رغم عدم وجود اتصال ،، كان موقف غريب شوية أنا ماشي بشنطة مقطوعة و سايبها في حتة اساسا عشان مش عارف أمشي بيها و مرافقني متشرد هولندي (( علي فكرة مش كتير – و البلد لحد كبير أمان في وجهة نظري )) ،،و ألاقي أخيرا صوت مصر أ / جنيدي ،، بس بيزعق ،، مين ده ،، مين ده ،، قلتله معرفشي ،، واحد عرض يساعدني ،، مشاه طبعا أ / جنيدي و قالي ابعد عن الأشكال دي ،، خطر و هوب يا عيني الراجل شال الشنطة اللي زي العجل و حطه في شنطة عربيته و حسيت بالأمان ،،، ههههه خدني لفه سريعة كده و قالي أنا عارف أنتا عايز تشيش !! ،، قلتله طبعا يا باشا خدني علي قهوة المصريين ،، الشاي السخن في الجو البرد و الشيشة و الصحبة الحلوة و الناس كلها مرحبين و لما أقول قهوة مصريين فهيا بكل ما تحمل معني الكلمة قهوة مصريين ،، تو ما تدخل للباب تحس أنك رجعت القاهرة صوت الطاولة و الدومنة و الشاي و التليفزيون العالي و القفشات   الصراحة كنت أول مرة اقعد قعدة طويلة نسبيا مع أ / محمد جنيدي و هو شخصية رائعة بحق ،، تحس إنه إنسان عايش في المكان و الزمان صح ،، هوا إنسان عارف إنه ابتدي حياة جديدة في بلد جديدة ،، و عارف برده إنه ليه جذور مش هينفع يقطعها إنسان متوازن ،، بني حياة جديدة علي اسس ثقافة قديمة مش عارف اشرح وجهة نظري بس يمكن بقية الموضوع تشرحه اتكلمنا في حاجات كتير عن هولندا و عن مصر و عن الانترنت و عن تجاربه في المنتديات و عن و عن المهم يعني ،،، أ / محمد ،، رجع يصمم إنه عيب يا أحمد إنك تنزل في فندق و إحنا مبنصدق حد يجيلنا من مصر و مش هينفع تنزل في فندق ،، الحمد لله ،، أقنعته إن ده الأفضل بالنسبة ليا و محبش أكون ضيف تقيل باتصالاته و علاقته ضبطتلي فندق يملكه واحد مصري ،، موقعه في نص البلد زي ما طلبت منه ،، و قمنا من عالقهوة و روحنا علي الفندق و ضبطني برده في أوضه فيها اربع سراير ،،، ههههههه و ده كان أول يوم و استنوا البقية ،،، يتبع
__________________
 
|
|
#2
20-02-2011, 01:33 AM
|
||||
|
||||
|
رد: ** أيام في امستردام - جنيدي الذي لا نعرفه **
متابع باهتمام التقرير اللى طال انتظارة
|
|
#3
20-02-2011, 02:06 AM
|
||||
|
||||
|
رد: ** أيام في امستردام - جنيدي الذي لا نعرفه **
والله مستنى التقرير ده من بدرى لدرجه انى حسيت انك يا احمد نسيت خلاص تعمل الموضوع .
وتحياتى للاستاز جنيدى ودايما مجتمعين على الخير ان شاء الله  ومستنى تكمله التقرير بفارغ الصبر 
|
|
#4
20-02-2011, 02:45 AM
|
||||
|
||||
رد: ** أيام في امستردام - جنيدي الذي لا نعرفه **
 متابع و مستنى تكمله الموضوع يا استاذ احمد لانه واضح من البدايه انه سوف يكون ممتع
__________________
  كريم على
|
|
#5
20-02-2011, 03:23 AM
|
||||
|
||||
|
رد: ** أيام في امستردام - جنيدي الذي لا نعرفه **
الله يخلليك يا أ/ احمد
والف شكر على المقدمة التى لا استحقها وان كان هناك من يستحقها فهو بالتأكيد اخى صديقى م/وائل مجدى لانة فعلا هدانى صديقا على مستوى عالي من الرقي والثقافة والتواضع..
|
 |
|
|
