خبرتي مع شروخات الفيات 128 و عمل الزرجينة

[محمود كامبا]

السلام عليكم, الفيات 128 ايا كان الموديل بتاعها في الاغلب لازم تلاقي شروخات فيها, و لازم اول حاجة تعملها لما تشتري 128 تروح على طول ورشة سمكرى و يكون اهم حاجة صاحبها امين و شغله نضيف و بيفهم, انا كان عندي شروخ كتيرة جدا في العربية و كنت خايف جدا في الاول و كنت كاره العربية بس بعد كدا عرفت انها حاجة عادية جدا و حلها بسيط بعون الله عز و جل





ما هي اسباب الشروخات في ال28 ؟ انا جمعت كام سبب مهمين جدا و الحلول بتاعتهم

1) المساعدين البايظين و الحل بكل بساطة لو حضرتك عندك مساعدين محجرين او ناشفين ياريت تغيرهم و تجيب حاجة جديدة و بلاش استيراد

2) الطرق الوعرة و المطبات, ال128 صاجها ضعيف من الاساس و مش بتسحمل المطبات على السرعات العالية و الحفر و البلاعات (عن شوارع مصر الحرير اتحدث) يعني اول لما تحس انك ماشي على طريق غير ممهد امشي على مهلك و هدئ السرعة و كل حاجة هتبقى تمام

3) حادث اصطدام لقدر الله و طبعا حلها الوحيد انك تقول اذكارك و تمشي على مهلك و تاخد بالك من طريقك

4) صدأ او بارومة و حلها انك تحاول متجبش ميه على حوض العربية كتير و حاول تروش حاجة تمنع الصدأ




الشروخات في ال128 تتركز غالبا في النصف الاولاني من العربية عند تحت الحوض و عند الصدر من تحت و عند قاعدة الرادياتير و عند شداد الموتور, انا كان عندي شروخات كتيرة جدا في العربية, الشروخات اول لما تشوفها و تعرف مكانها اول حاجة تعملها انك متستناش ساعة زيادة و روح فورا عند السمكري بتاعك او اي سمكري عموما عشان تلحمها, انا اول لما جبت العربية مكنتش مهتم بموضوع الشروخات دا و كنت فاكر انه مش بيكبر طبعا دا غلط لأن الشروخات بتكبر مع الوقت و ممكن لقدر الله العربية تنشق نصين, المهم دلوقتي السمكري بينزل تحت العربية و بيشوف فين الشروخات و يعلم عليها و ينضف مكانها و يبتدي يلحم, انا عملت الشغل دا كله عند ورشة عم خالد في السيدة زينب راجل امين و محترم و شغله نضيف, بس نصيحة لازم تفك الرادياتير و تبص تحتيه عشان ممكن تلاقي شرخ مستخبي زي ما انا عملت كدا و لاقيت شرخ كبير جدا مستخبي تحت الرادياتير, و بعد ما بيلحم الشروخات روح اشتري حاجة اسمها "بلاك" و علبة تنر, البلاك دا بيتحط على الشروخات عشان يمنع تعرضه للهواء و الماء و يمنع عنه الصدأ و يقويه, لما تيجي تلحم شروخات غالبا ممكن يحل الماتور او اي جزء ميكانيكي او ممكن يحل الفرشة و كل دا بيرجع لمكان الشرخ, كدا موضوع الشروخات ان شاء المولى عز و جل اتحل و مش هيرجع تاني طول ما انتا بتحافظ على العربية و بتاخد مطبات براحة و فيه ملاحظة مهمة جدا هي انك كل اسبوع تنزل بنفسك تحت العربية و تشوف لو فيه شرخ جديد ظهر او لو شرخ قديم رجع او اي حاجة ظهرت بس لازم تعمل check كل فين و فين و زي ما اتفقنا اي شرخ جديد روح اعمله على طول و مش هيكلفك كتير ممكن من 20 جنيه لحد 40 جنيه, انا لحمت عربيتي ب300 جنيه نظرا لكثرة الشروخ




-- بعد ما تخلص الشروخ فيه حاجة اسمها زرجينة, الزرجينة كلمة بتتقال على الحاجة اللي محتاجة ترجع مكانها, يعني لو الحوض ضيق لازم تعمل زرجينة عشان يوصل ل99 سم, او لو العجلة مأخرة لازم تعمل زرجينة عشان ترجع مكانها, و هكذا, في حالتي العجلة الامامية عندي كانت مأخرة 2 سم لورا و عملت زرجينة, الراجل السمكري بياخد المقاسات و يجيب جنزير كبير بيربطوا في شمعدان العجلة و يشد لقدام بواسطة مفتاح لحد لما يوصل للمقاس السليم, يعني اول حاجة بنعملها هي لحام الشروخات و بعد كدا بناخد المقاسات و بنشوف لو محتاجة زرجينة ولا لأ, نصيحة بلاش تعمل زرجينة عند اي بنزينة بالذات الوطنية و بلاش تروح عند اي سمكري يعمل زرجينة روح عند واحد فاهم عشان دا شاسية و مقاسات مش اي حاجة و بالنسبالي الشاسيه و العفشة اهم بكتير جدا من الاجزاء الميكانيكية, بعد ما تعمل اللحامات و الزرجينة روح اعمل ظبط زواية و اهم حاجة شوف المساعدين كويسين ولا لأ, لو ناشفين غيرهم عشان من وجهة نظري لو المساعدين بايظين يبقى الشروخات هتظهر تاني, و لو محتار تجيب مساعدين نوع ايه انا شخصيا جبت مساعدين ايطالي اسمهم بوما ب420 جنيه من الدقي و ماشاء الله ناعمين و كويسين


و دي كانت خبرتي مع الشروخات و الزرجينة, يارب اكون هونت عليكم المشاكل و ساعدتكم و شكرا

[saleh samir]

موضوووووووووع مفيد .. جزاك الله خيرا

[msm_classic]

: THUMBS~220::T HUMBS~220::TH UMBS~220::THU MBS~220::THUM BS~220::THUMB S~220::THUMBS ~220::THUMBS~ 220:تسلم ايدك والف شكر على المعلومات المفيدة : THUMBS~220::T HUMBS~220::TH UMBS~220:

[momen_bondok]

فين مكان السمكرى دة بعد اذنك وهل هو كويس وفاهم ولا اية

[marshloking]

شكرا ليك على الاضافه الجميله دى لو فى امكن رقم حضرتك علشان اسالك على حاجه ياباشا او كلمنى على رقمى 01113639335