المشورة من اهل الخبرة و الذوق

[mffg]

اخوانى فى المنتدى الاعزاء - انا على وشك شراء سيارة و محتار بين سيارات عديدة و مختلفة و عايز اخذ رأيكم لو سمحتم - انا امكانياتى حاليا ممكن لغاية 200.000 جنيه و انا اعمل فى الخليج منذ سنوات و محتاج سيارة للاستقرار فى مصر - كنت محتار بين المرسيدس e200 موديل 2001 و بين النيسان اكس تريل زيرو - و بين التويوتا برادو 2007 - و بين البيجو 5008 زيرو - و بين الرينو فلوانس زيرو - و علما بأن كل هذه السيارات فى هذا المبلغ او اكثر قليلا و مفيش مشكلة لو زاد المبلغ فى مقابل حاجة عدله اركبها و تستمر معى فترة - و ارجو من اهل الخبرة فى هذا المنتدى العظيم افادتى و حيث اننى فى حيرة قوية جدا من امرى و مش عارف اخذ قرار فى الانسب - نفسى اركب سيارة كبيرة 4*4 زى اللى فى الخليج عندى - و نفسى اركب سيترة فخمة الناس تحترمها فى كل مكان حتى لو قديمة زى المرسيدس - و نفسى اركب سيارة حديثة و فيها اوبشن و مريحة بس خايف ما تتوافق مع الشوارع فى مصر و كذلك لعب العيال فى الشوارع و سواقين الميكروباس اللى بيخبتوا فى الناس فى الشارع بسبب و من غير سبب - و الواحد ينحسر على شقاه كل يوم - و لا السرقات الموجودة من عصابات السيارات حاليا فى مصر ؟ - مش عارف و الله يا ريت يا اخوانى رأيكم حتى لو ارائكم مخالفة للعرض بتاعى - لو فيه حاجة انتم شايفينها انسب لى ممكن تنصحونى بيها - و جزاكم الله الف خير mffgmffgmffg@hotmail.com

[mffg]

[QUOTE=mffg;619224]اخوانى فى المنتدى الاعزاء - انا على وشك شراء سيارة و محتار بين سيارات عديدة و مختلفة و عايز اخذ رأيكم لو سمحتم - انا امكانياتى حاليا ممكن لغاية 200.000 جنيه و انا اعمل فى الخليج منذ سنوات و محتاج سيارة للاستقرار فى مصر - كنت محتار بين المرسيدس e200 موديل 2001 و بين النيسان اكس تريل زيرو - و بين التويوتا برادو 2007 - و بين البيجو 5008 زيرو - و بين الرينو فلوانس زيرو - و علما بأن كل هذه السيارات فى هذا المبلغ او اكثر قليلا و مفيش مشكلة لو زاد المبلغ فى مقابل حاجة عدله اركبها و تستمر معى فترة - و ارجو من اهل الخبرة فى هذا المنتدى العظيم افادتى و حيث اننى فى حيرة قوية جدا من امرى و مش عارف اخذ قرار فى الانسب - نفسى اركب سيارة كبيرة 4*4 زى اللى فى الخليج عندى - و نفسى اركب سيارة فخمة الناس تحترمها فى كل مكان حتى لو قديمة زى المرسيدس - و نفسى اركب سيارة حديثة و فيها اوبشن و مريحة بس خايف ما تتوافق مع الشوارع فى مصر و كذلك لعب العيال فى الشوارع و سواقين الميكروباس اللى بيخبتوا فى الناس فى الشارع بسبب و من غير سبب - و الواحد ينحسر على شقاه كل يوم - و لا السرقات الموجودة من عصابات السيارات حاليا فى مصر ؟ - مش عارف و الله يا ريت يا اخوانى رأيكم حتى لو ارائكم مخالفة للعرض بتاعى - لو فيه حاجة انتم شايفينها انسب لى ممكن تنصحونى بيها - و جزاكم الله الف خير
ايه يا حبايبنا شباب المنتدى الخبرة و الهندسة المصرية كلها ؟؟ فينكم ؟ محدش اداني مشورة و مسمعتش ارائكم ؟ معلش هتعبكم معايا شوية بس استحملونى لأنى معنديش خبرة كفاية بالمناسب فى الوضع الحالى فى مصر من سيارات و ما يستجد على الساحة و ايه المطلوب و ايه اللى مش مستحب - اخوكم بقاله كتير بعيد عن ارض مصر الحبيبة - ربنا يسعد اهلها و ينصرهم و يرجع حقوق المظلومين و الخيرات اللى اتسرقت منها و ترجع تانى مصر بلدنا ام لكل الدنيا و لا يحتاج شبابها ان يتركها و يضيع احلى ايام عمره فى بلاد غريبة سعيا لحياه افضل و البحث عن تأمين المستقبل لأسرته لتنعم بحياه كريمة

[amr elsisi 1]

حمد الله علي سلامتك
سيدي الفاضل من فضلك ادخل علي اقسام السيارات واعرف مميزات كل عربية في زهنك
انا افضل 4في4

[mr_astra]

حاسس ان الـBMW اقرب الاختيارات
عربية قيمة وشياكة وامان واوبشن وشكل رياضى وسواقة رياضية وسعرها فى اللذيذ
فكر!!!!!!!!!!!!!!

[Marlborooo]

كان ليا رأي متواضع احب اضيفه ، حضرتك طالما وصلت لفئة سعرية 200الف او ازيد شوية يبقي طبعا تركب عربية زيرو تكون انت اول واحد ركيبها وتاخد زهوت العربية وتضمن انك مش هتغير في العربية غير زيت وبنزين بس لمدة اكتر من 5 سنين ،، او ممكن نحسبها من ناحية تانية ممكن حضرتك تجيب عربية كسر الزيرو تكون ماشية مثلا من 10الاف ل 35 الف كيلو وفي الحالة دي العربية هتعتبر برده زيرو وهتكون امكانيتها اعلي من العربية اللي هنجبها زيرو

نيجي للكلام بتاع حضرتك : حضرتك بتقول مرسيدي e موديل 2001 ، طبعا ناس كتير نفسها تركب عربية مرسيدس عربية شيك وامكانيتها كتييير جدا وثبات ممتاز ... الخ بس تفتكر حضرتك عربية بعد 11 سنة هتكون بنفس حالتها اكيد طبعا لا كل حاجة حضرتك في العربية ليها عمر افتراضي واكيد هيكون فيه نسبة استهلاك في العربية مهما كانت العناية بالعربية
مثلا لو العربية مشت 150 الف كيلو وحالتها ممتازة هيكون اكيد في اجزاء عمرها الافتراضي انتهي سواء في الماتور وغيره ساعتها حضرتك اللي هيجي عليك الدور عشان تصلح الاجزاء ديه
فكده المرسيدس خرجت من المقارنة

البيجو : البيجو عربية محترمة عربية فرنساوي ، بس ليا تعليق عليها عربية ملهاش سوق في مصر من الاخر حضرتك هتشتريها ويوم ما تحب تبيعها هتخسر في تمنها ومش هتتباع علي طول تقيلة شوية في البيع ، من الاخر صفقة خسرانة حضرتك هتحسر فيها فلوسك مش عشان هيا عربية وحشة ابدا بس مش مرغوبة ، انا عارف اني بحسبها بعملية شوية بس برده حضرتك مش هتتدفع مبلغ قليل وحرام لما تخسر نص تمن العربية
يبقي البيجو بره اللعبة

التيوتا البرادو نفس كلام البيجو بالاضافة والله اعلم قطع غيارها اعتقد مش متوافرة بسهولة
وكمان اعتقد سعرها اعلي شويتين

نيجي للعربيات الزيرو اللي في رينج الفلوس اللي معانا :
الرينو الفلونس: بتبدأ من 122 وبتنتهي في 150 عربية كويسة وان كان بعض الناس ليهم تعليقات عليها في قسم الفلونس وابتدت تنتشر في مصر ، عيبها سعر اعادة البيع سيء حبتين

سكودا فانتزيا : ودي حضرتك انا ميال ليها شوية ، عربية ممتازة و ثباتها رائع وافضل من الجيتا في العفشة وسعر اعادة البيع كويس وشكلها شيك وليها برستيج حلو
السعر من 158 الي 215 الهاي لين ،، وفي منها بمواصفات خليج مختلفة في الجنط ومعرفش بصراحة مختلفين في ايه تاني

في حضرتك كمان سكودا سيوبرب ودي مش منتشرة اوي ممكن عشان سعرها غالي شوية و وسعر اعادة البيع سيء يعني الفنتازيا افضل في النقطة ديه
سعرها 213 الف فول اوبشن مانيول ومعرفش اتوماتيك بكام

فيه حضرتك باسات : وديه عربية محترمة وشكلها شيك جدا وليها برستيج نقدر نقول قريب من المرسيدس ، طبعا حضرتك انا مجيبتش سيرت الجيتا عشان الاسكودا الفنتازيا افضل الاتنين نفس الماتور بس الفرق في العافشة والفانتزيا اعلي وافضل عموما
عيوبها : 1400 سي سي tci هورس باور 120 او اكتر شوية مش متاكد من الرقم سحبها كويس جدا بس لازم بنزين 95 البنزين الموصي به ،،، اعتقد قطع غيارها غالية شويتين ممكن حضرتك تخدل علي قسم الباسات وتراجع اسعار قطع الغيار اذا حضرتك معنكدش مشكلة مع البنزين ال95 او اسعار قطع الغيار يبقي مفيش مشكلة
السعر فول اوبشن اوتوماتيك 235 ، هاي لاين وديه بعيدة شوية عن الرينج اللي محددينه 279 ملناش دعوة بيها

نيجي للنيسان اكس تريل: والله حضرتك انا شايف كويس جدا سعر اعادة البيع كويس مش هتخسر فيها اوي وقطع غيارها ارخص من البسات علي ما اعتقد وحضرتك يا ريت تراجع المعلومة ديه عشان انا مش متاكد منها
لو حضرتك ناوي علي عربية 4*4 زيرو النيسان هيكون الاختيار المثالي ( رأيي الشخصي)
السعر221


نيجي للعربيات كسر الزيرو ال4*4 عشان حضرتك ميال ليها اكتر :
هيكون قدمنا جيب رانجلر موديل 2010 و2011 وهتكون ماشية حوالي 20 الف كيلو
سعرها في المتوسط 200 الف كانت نزلة زيروبحوالي 240 او ازيد شوية ( موديل 2012 ازيد 20 الف في السعر من الموديل ده عشان فيه شوية تعديلات في الماتور )

وممكن جيب شيروكي موديل 2008 او 2009 تكون ماشية حوالي 30 او 40 الف

وممكن حضرتك تراجع اسعار المستعمل علي موقع كونتاكت كار وموقع دوبيزل


والف مبروك مقدما علي اي عربية حضرتك تختارها