سايس السيارات مشكله لازم ليها حل ضرورى

[odican]

السلام عليكم
بجد يا جماعه مشكله سايس السيارات دى لازم يكون ليها حل بسرعه قبل من لاقى نفسنا مضطرين نتعامل معاهم كوظيفه ثابته و معترف بيها فى مصر
حرام اللى بيحصل دا
مش ممكن ان يكون عندك شغل فى الدقى و تروح تركن قدام شغللك تقوم دافع للبيه السايس 5 جنيه .
خلصت شغل و قولت تفوت تجيب ساندوتش من جاد شارع التحرير كمان تدفع للسايس 5 جنيه باركينج.
تروح عند جامعه القاهرة تجيب ملزمة لاختك ولا اخوك تدفع 5 جنيه باركينج حتى لو هتمشى بعدها ب 5 دقائق.
دا غير البنزين واللى بتدفعه لعمال المحطه
يا جماعه الناس دى بتبص لصاحب العربيه كانه حرامى و فلوسه كتير عشان كدا لازم ناخد منه شويه.........مع انك ممكن تكون شارى العربيه دى زىى كدا عشان تودى بنتك بيها المستشفى لانك بتروح بيها اكتر من مرة وش عايز تبهدلها فى المواصلات او تشم ريحه سجائر ممن انعدم عندهم الحس و الذوق و الشعور بالغير
لازم نلاقى حل للموضوع ده والا هنلاقى نفسنا بندفع كل يوم مش اقل من 10 جنيهات باركينج مع اننا بنركن فى شوارع عاديه شوارع بلدنا اللى احنا ملاكها واصحابها وبندفع ضرائب للبد دى عشان توفر لنا الشوارع و الاماكن لعربياتنا
لو ما اتخذناش موقف بجد مش هنلوم الا نفسنا فى الاخر لما نلاقى وظيفة السايس بقت فى كل حته و تدفع طول منتا ماشى فلوس اولادك اولى بيها
وعايز حد يقولى هل المنظمة المصريه لحقوق الانسان تقدر تقف معانا فى الموضوع ده؟؟؟؟
هل انا لوحدى بس اللى بتعرض للمواقف دى او هل انا لوحدى اللى بتضايق من الاشكال الواطيه دى ولا فى ناس تانيا معايا؟؟
بتتضايقوا برضوا ولا عادى مش فارقه معاكم؟؟؟

[spider_amrdiab]

الحل بسيط بس كلله يطبقه
انك ماتدفعش حاجه للسايس
سهلة اهى
و احكيلكم بقى على مواقفى
مرة ركنت مفيش 5 دقايق و لقيت السايس جايللى
ماعتيطوش حاجه وقفلى قدام العربية و قاللى مش حتمشى من هنا اللى لما تجيب جنيه
خبطته و جريت
تانى موقف واحد قاللى ادفع مقدم عشان انا ماشى دلوقتى
قولتله لا انا مش حدفع خالص
قاللى خللى بالك بقى من العربية
قولتله اى حاجه حتحصل للعربية تبقى انت اللى عملتها و حجيبك وروحت مشوارى ولا لقيته عمل اى حاجه
و الله الناس دى اجبن من ان احنا نديهم حاجه
مفيش بس غير اللى وقف قدام العربية (اللى ربنا يرحمه لو كان ميت و يشفيه لو كان عايش)

[HaMaDa-ToUBaR]

والله انا عن نفسى كرهت العربيات وركوب العربيات من الى بشوفة من قلة ذوق وبقت بحس انى بدل ما اروح مشوار بالعربية علشان ارتاح واريح نفسى بقيت اتعب ودمى بتحرق وبالى مشغول

بجد فعلا انا بقيت ناااادر جدا لما بخرجها واهو بقالى اسبوع سايبها فى الجراج ولا طايق اجى جمبها

[محمد رمضان ابراهيم]

يا جماعة محدش يدفع حاجة للناس دى واساسا مش من حقو انو ياخد حاجة دول بقو بيعملوها فريضةانا بقى حصل معايا نفس الموضوع مكنش عايز يمشينى نزلتلو وقولتلو مش هدفع حاجة وشدينا شوية وخت العربية ومشيت قلة ادب وبلطجة على الاخر

[وائل احمد السيد]

اخى العزيز انا شغلى فى ميدان المساحة وانت عارف ميدان المساحة مليان كل 3 او4 متر تلاقى واحد عامل نفسة سايس ولازم تراضية مش اقل من 5 يااما هتلاقى عجلة نايمة دة اقل حاجة
انا بعمل اية لما بركن الصبح طبعا يجى يقولى هتقعد كتير اقولة اة بتسأل لية فميعرفش يرد اقوم قايلة العربية دى تبع مكتب المرور اللى فى ميدان المساحة (لأنى عارف 2 منهم كويس جدا )واسيبة وامشى ولما اخلص شغلى وانا خارج اول لما يشوفنى يروح جايلى اقوم انا رايح الاول على مكتب المرور وأسأل على أصحابى هناك واقف معاهم شوية نتكلم ونهزر وبعد شوية أمشى وهو يجيلى علشان يساعدنى على الخروج وانا اجى اديلة فلوس ما ياخدش منى حاجة (الناس دى تخاف ما تختشيش ) خش فيهم شمال تلاقيهم رجعو ورا بس انت اعرف اساميهم علشان لو العربية حصلها حاجة تعرف تجيبهم
انا طبعا معاك ان المفروض اننا نركن عربيتنا فى اى مكان بس للاسف التسيب اللى البلد فيها وعدم وجود ظابط ولا رابط فى اى مكان ادى لهذا وخد بالك موضوع السايس دة اكيد مخالف لانهم لازم يكون معاة رخصة من الحى ويكون معلقها على صدرة وافتكر دة مستحيل لان ميدان المساحة يوجد فية باركنج بس دائما مليان
لو فية حد عندة أراء تانية ياريت عوزين نشوفها علشان نفيد ونستفيد
تحياتى