كلاكيت عاشر مرة... كربراتيور و لاّ إنجكشن؟

[zing0]

السلام عليكم
كلنا عارفين إن نظام الإنجكشن يعتبر تطور لنظام الكربراتيور
و فيه مليون موضوع عن المفاضله بينهم, و رغم إن معظم آراء الناس هنا نظرياً بتفضل الإنجكشن لأنه:
- بيوفر فى إستهلاك و ضخ البنزين
- بيخلى صوت الموتور أهدأ
ضبطه بيكون إليكترونياً و ده مبيخليش فيه مجال لعربيه تكركر أو تتبرجل
و مع ذلك:
- صيانته أصعب لأنها محتاجه متخصص و أجهزة دقيقه
- إستبداله و قطع غياره أغلى طبعاً من الكربراتيور
- مينفعش معاه بنزين 80 نهائى, لأنه حساس جداً للشوائب

طبعاً الكربراتيور عكس المميزات و العيوب اللى فاتت.
بس الغريب إن كل سواقين التاكسى لما بيجيب عربيه أنجكشن أول حاجه بيعملها هيا تغييرها لكربراتيور, هل ده معناه إن بالرغم من إن ضخ البنزين أعلى فى الكربراتيور إلا إنه أوفر بالنسبه لفارق سعر بنزين 80 عن 90/92/95 للإنجكشن؟

يعنى من الآخر: أيهما أوفرفى قيمة الإستهلاك؟ الكربراتيور أم الإنجكشن؟

[adamlion]

حسب نوع السيارة لكن مع الموديلات القديمة اى قبل عام 2000
انا افضل الكربيتير لكن بعد عام 2000 الانجكشن اكثر وفرا
تحياتى ادم

[sayed2077]

بص يا اخى هى مسألة نسبيه بمعنى
مثالا عربية زى الشاهين 75% منها بيكون كربراتير والباقى بيبقى انجكشن ففى حالة الشاهين الافضل مع اول مشكله مع الانجكشن يفضل تقلبها كربراتير ليه علشان الانجكشن فى الشاهين بيبقى غالى وصيانته صعبة ومش كله هيعرف يظبطهولك على ما اتذكر نظام الانجكشن فى الشاهين جديد كامل اصلى بيكون بحوالى 2000 جنية وده طبعا سعر غالى جدا

ففى الحالة ديه زى ما قولتا الافضل تقلبها كربراتير وعموما زى ما قال اخى الفاضل قبل سنة 2000 يفضل تقلبه كربراتير

نيجى بقى لعربيات زى الفرنا واللانوس و الريو وسيراتوا وكل الجديد عموما ده بقى مينفعش يتقلب كربراتير لان اللى يقلبة كربراتير يبقى بيضيع نفسه ليه لان الكمبيوتر اللى فى العربيات الجديده بيبقى مسئول عن كل حاجه غير الشاهين مثالا بيبقى الكمبيوتر مسئول عن نظام الانجكشن بس ومالوش دعوة باى حاجه تانى غير بقى عربيه زى السيراتو وكدا الكمبيوتر مسئول عن الاعطال و الحساسات و كله غير كدا العربيات ديه انظمة الانجكشن بتبقى متطورة فيها غير الشاهين مثالا ومثيلاتها وبيبقى اعطالها قليلة جدا واستهلاك البنزين فيها قليل جدا يعنى اقل مثال عربيه 1600 سى سى زى مثالا ال BYD ممكن تستهلك بنزين اقل من اللى بتستهلكه ال 128 ال 1100 سى سى

فالمسئلة زى ما انت شايف نسبية كل حاجه على حسب

وعموما نصيحتى لو حاجة الانجكشن متوفرة واسعارها معقولة يبقى خليك فى الانجكشن افضل بس لو قلية وغالية وبتبوظ بسرعة يبقى تقلب كربراتير بس زى ما بقولك الكلام ده مينفعش مثالا فى عربية زى اللانوس لان كل اللى هتغرمة فيها طقم رشاشات لو هتجيبه اصلى جديد هتلاقية ب 1000 جنية و كمان ممكن تجيبه استيراد ب 200 جنية يعنى ارخص حتى من كربراتير ال 128